Chibkees 7
7
Dej Nyaas Ntajtes
1Tuz Tswb has tu Naw-es has tas, “Koj has koj tseb neeg ca ni muz nyos hub lus nkoj. Taaznrhiab tej neeg kwg nyos hub ntajtes tad na, kud pud koj tuas tug nyaz ha ni ua lus neej ncaajnceeg. 2Coj tej tsaj kwg hub is yaad xyaa nkiad, tadsis cob tsaj kwg tsi hub, coj is yaad is nkiad nrug koj muz nyos hub lus nkoj. 3Kua ni qhai, coj tej noog is yaad xyaa nkiad muz has. Ua ni na kuas txhua yaad tsaj has tej noog ha yiad muaj sa nyos has fuadvaad tu hub lus ntajtes na kua ntxib. 4Xyaa hnoos saw na kud yiad tso naag luz plaws cawg hnoos plaws cawg hmo tu hub ntajtes na, kuas txhua yaad muaj sa kwg kud tsid tseg liad kuas rawg puadtsuaj taaz hubtsig muz.” 5Naw-es ua txhua yaad rias ni tuz Tswb taw saadfwd tu niz liad.
6Thaws dej nyaas ntajtes Naw-es hnoosnyood muaj raw pua xyoo. 7Naw-es has niz tuz puj, niz cob tus, has cob nyaas puabtsig muz nyos tu hub lus nkoj kuas tsi rawg dej nyaas.#Mat 24.38,39; Luk 17.27 8Txhua yaad tsaj has noog, tej mawd tej phia, tej puj tej law, tsi has cob kwg hub lossis tsi hub, 9puabtsig nrug Naw-es muz hubtsig tu hub lus nkoj, rias ni Vaajtswb saadfwd liad. 10Xyaa hnoos tod qaas dej naag txiad laws lug luz nyaas ntajtes.
11Thaws Naw-es hnoosnyood muaj raw pua xyoo, txwd nkaws tu hnoos kawd xyaa lus os hlis ntuj, hnoos qhai ntuj ca ni tsaws dus ncas, naag laws lug saw ntuj luz tu hub ntajtes, has tej qhobdej txhiab qhais tej hawb haab phwj yog hub aab tuaj,#2 Pet 3.6 12has naag luz tu hub ntajtes na taw plaws cawg hnoos plaws cawg hmo. 13Tuas hnoos qhai Naw-es has niz tuz puj coj ostug pes tug tus: Xees, Haas, Yafej has pes tug nyaas nrug ostug muz nyos tu hub lus nkoj. 14Txhua yaad tsaj, tsi has tsaj nyeg has tsaj qud, tsaj luj tsaj yaw, naas, qaab, kaas, ntsawd, has txhua yaad noog puabtsig nrug cud muz tu hub lus nkoj hubtsig. 15Txhua tsaab yaad tsaj kwg muaj sa, puabtsig nrug Naw-es muz nyos hub lus nkoj, 16rias ni Vaajtswb taw saadfwd tu Naw-es liad. Ces tuz Tswb maad ni kia lus qhob rooj nkoj tu.
17Naag yeej luz tsi tu ni taw plaws cawg hnoos, has dej fuad sas zuj zug ua tu lus nkoj ntaas hlo tuz yeez liad. 18Dej ha nyaas sas heeb tuaj, has ntsiaj lus nkoj ntaas yeez saw nplaid dej. 19Dej nyaas sas zuj zug muz vub taaznrhiab tej hawb roos sas hubtsig, 20has dej tseed nyaas dhaw tej hawb roos sas qhai tu saw kawd tsis tshid liad has. 21Txhua yaad kwg muaj sa nyos hub ntajtes na tuag taaz, tsi has naag noog, kaas, ntsawd, tsaj nyeg, tsaj qud, has tej neeg yeej tsi seed hlo ni. 22Txhua yaad kwg txiaj ua paa nyos hub ntajtes na tuag taaz hubtsig. 23Tuz Tswb ua tu is puas tsaab yaad kwg muaj sa nyos hub ntajtes na, neeg, tsaj has noog tuag tu noos nrhiab. Tsuas tshuab Naw-es has cob kwg nrug niz muz nyos hub lus nkoj ha seed muaj sa nyos nyaz. 24Dej yeej tsi nqaig ni taw is puas tsis cawg hnoos.
Селектирано:
Chibkees 7: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.