Chibkees 9
9
Vaajtswb Cogluz tu Naw-es
1Vaajtswb food kooshmoob tu Naw-es has niz cob tus has tas, “Mej yiad muaj tus muaj ki coos, kuas mej ha muaj xeesntxwz fuadvaad muz nyos pub ntajtes.#Chk 1.28 2Txhua yaad tsaj, tsi has tsaj nyeg, tsaj qud, naas, qaab, naag noog, has tej ntsez puabtsig ntshai mej. Kud yiad muas tej tsaj qhai tso tu mej kaab. 3Txij na muz kud pus txhua yaad tsaj, noog, has ntsez tu mej noj, is yaad ni tej zaws kwg kud ted pus tu mej noj liad. 4Tadsis mej tsi xod noj tej nqaj kwg txhaad ntshaab, tu qhob ntshaab yog yaad kwg ua kuas muaj txuj sa.#Lek 7.26,27; 17.10-14; 19.26; 2 Keb 12.16,23; 15.23 5Yog tuz twg tua neeg, kud yiad raw txid tuag tu tuz qhai. Yog tej tsaj tud neeg tuag, kud yiad raw txid tuag tu tej tsaj qhai is yaad nkaws. 6Yog tuz twg tua neeg, mas lwd tuz yiad muas tuz qhai tua is yaad nkaws, tu qhob Vaajtswb tsid neeg muaj tuz yaadntxwz zoo ni Vaajtswb.#Tsk 20.13; Chk 1.26
7Mej yiad muaj tuski coos, kuas mej tej xeesntxwz fuadvaad muz nyos pub lus ntajtes.”#Chk 1.28
8Vaajtswb has tu Naw-es has niz cob tus tas, 9“Txij na muz kud cogluz tseg tu koj has koj cob xeesntxwz, 10has txhua yaad kwg muaj sa, txhua yaad noog, has txhua yaad tsaj kwg nrug mej tiad hub lus nkoj luz. 11Kud cogluz tseg tu mej has tas: Kud yiad tsi tso dej luz nyaas txhua yaad kwg muaj sa kuas puadtsuaj ni zag na, has dej yiad tsi nyaas lus ntajtes kuas puadtsuaj ni na is zag ntxib liad. 12Lus cid kwg kud cogluz tseg muz istxhis tu mej has txhua yaad kwg muaj sa, 13mas yog kud yiad ua kuas muaj is tug duas zaaj siab tu saw cob fuas. Tuz duas zaaj qhai yog lus cid kwg kud cogluz tseg nrug neeg ntajtes. 14Thaws twg kud ua kuas muaj fuas rooz saw nruas ntug, ces tuz duas zaaj qhai yiad tshwd tuaj tu saw cob fuas. 15Kud yiad ncu ntsoob tej luz kwg kud cog tseg tu mej has txhua yaad tsaj, mas kud yiad tsi tso dej luz nyaas txhua yaad kwg muaj sa kuas puadtsuaj is zag ntxib ni liad. 16Thaws tuz duas zaaj siab tshwd saw cob fuas, kud pud tuz duas zaaj qhai, kud yiad ncu txug tej luz kwg kud taw cog tseg muz istxhis tu mej has txhua yaad kwg muaj sa nyos hub ntajtes na. 17Tuz duas zaaj na yog lus cid kwg kud cogluz tseg tu txhua yaad kwg muaj sa nyos hub ntajtes.”
Naw-es has Niz Cob Tus
18Naw-es cob tus kwg tiad hub lus nkoj luz yog: Xees, Haas has Yafej. (Haas yog Kana-aas vaid.) 19Naw-es pes tug tus na yog txhua yaad neeg kwg nyos hub ntajtes na cob yiadkoos.
20Naw-es yog neeg ua laj ua tes, niz yog thiaj tuz kwg xus cog txib hmaas ntaag. 21Thaws niz haws kua txib hmaas, ua tu niz qawg heeb, has niz ca ni hle rig tsho pw lasqaas hub tseb ntaws. 22Thaws Haas kwg yog Kana-aas vaid, pud niz vaid pw lasqaas ni qhai, niz txiad tiad muz has qha tu niz os tug tijlawg. 23Ces Xees has Yafej ha muz muas taw is lus tsho nteb nthuab kag tu nraw ostug nrawqawd has muas khuad tu saw ostug hawpwg. Ostug ha kwb thaws qaas muz tu hub lus tseb ntaws coj muz npug ostug vaid, ostug tig ntsejmuag tu is caag vid ostug tsi xaab pud ostug vaid lasqaas ni qhai. 24Thaws Naw-es zoo ciab tsid luz niz paws tej kwg niz tuz tus ntxiag ua tu niz, 25Naw-es ha has tas,
“Kana-aas rawg food tsi zoo liad!
Niz yiad ua niz os tug tijlawg qheb.
26Ca ni ua tuz Tswb kwg yog Xees tuz Vaajtswb tsawg!
Kana-aas yiad ua Xees qheb muz ni.
27Thob kuas Vaajtswb ua tu Yafej#9.27 Yafej: Lus npe na, lus suas has ni Henplais lu luz kwg has tas, “vaadmeej.” caajcez fuadvaad!
Thob Vaajtswb ca Yafej tej xeesntxwz nrug Xees yaad neeg nyos ua ke.
Kana-aas yiad ua Yafej qheb.”
28Tod qaas dej nyaas ntajtes taaz liad, Naw-es tseed ua neej nyos taw pes puas tsis cawg xyoo ntxib, 29has niz tuag tu thaws niz hnoosnyood muaj cuaj pua tsis cawg xyoo.
Селектирано:
Chibkees 9: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.