Mataio 13
13
Ko te Talafakatuha o te Tino Lūlū Haito
(Mlk 4.1-9; Luk 8.4-8)
1I te aho lava tēnā na fano kehe ai ia Iehu mai te fale, kua fano ki te matāfaga o te vaitūloto, kua nofo ki lalo ma akoako atu ki tagata. 2Ona ko te tokalahi o te kaifenua kua fakapotopoto fakatakamilo mai ki ona tafa, na hopo ai ia Iehu ki he vaka ma nofo mai ai i kinā, kae ko te kaifenua kua laulaututū ifo i te matāfaga.#Luk 5.1-3 3Na fakaaogā e ia nā talafakatuha ke fakailoa ai ki tagata te lahi o nā mea.
Kua lea vē atu, “Nae iei he tino na fano oi lūlū ni fatu haito i tona fātoaga. 4I te lūlūga e ia o nā fatu haito, na pakukū ai iētahi fatu haito ki luga o te auala, ma na ōmamai ai nā manulele oi kai uma lele. 5Ko iētahi fatu haito na pakukū ki luga o he mea fatufatua e tau hēai he kelekele i ei, ma na vave lele oi tutupu ake nā lau ona ko te kelekele nae hē loloto. 6Kae i te fanakega o te lā ki luga, na velahia ai nā tamā lākau ma na hēki mataloa kae kua kāmata oi magumagu, auā ko nā aka e hēki ola lahi ki lalo. 7Ko iētahi fatu haito na pakukū ki te mea nae ola ai nā vao mātuituia, ma kua ola ake nā vao mātuituia kua taomia ai nā tamā lākau, ma hēki mafai ai ke ola. 8Ka ko iētahi fatu haito na pakukū ki luga o te kelekele lelei oi na fua mai ai nā fuāhaito: ko iētahi na fua mai e taki tau helau, ko iētahi e taki tau ono hefulu ma iētahi e taki tau tolu hefulu.”
9Kua fakauma ia akoakoga a Iehu oi lea vē atu ai, “Kāfai e iei ni outou taliga, fakalogo mai la!”
Ko te Pogai na Fakaaogā ai e Iehu nā Talafakatuha
(Mlk 4.10-12; Luk 8.9-10)
10Oi na ōmamai ai te kau hoko kia Iehu ma fehili vē mai kia te ia, “Heā te fakaaogā ai e koe nā talafakatuha i au akoakoga e fai ki nā tino?”
11Na tali atu ia Iehu, “Kua uma te fakailoa atu kia te koutou nā mealilo i te Mālō o te lagi, kae ko hēki fakailoa ki iētahi tino. 12Auā ko te tino kua iei hana mea, ka toe fōki ki ei kae ke lava ai ma totoe mo ia; kae ko te tino e hēai hana mea, ka kave kehe mai ia te ia, ke pa lava ki he tamā mea kua ia te ia. #Mat 25.29; Mlk 4.25; Luk 8.18; 19.26 13Ko te ala ia e fakaaogā ai e au nā talafakatuha ke akoako ai kilātou, ona e kikila o lātou mata kae hē kilātou kitea, ma e fakalogo kae hē kilātou lagona pe mālamalama. 14Oi ko te vāloaga la tēnei a Ihaia e fakaaga kia te kilātou:
‘Ko nā tino iēnei ka fakalogo ma fakalogo,
kae hē mālamalama;
ma ka kikila ma kikila,
kae hē kilātou kitea,
15auā ko o lātou māfaufau e tuka,
ma kua poloka o lātou taliga,
ma tapuni o lātou mata.
Moinei ake e kitea e o lātou mata,
ma lagona e o lātou taliga,
ma mālamalama o lātou māfaufau,
ma liliu mai ai kilātou kia te au,
ma fakamālōlō ai kilātou e au.’#Iha 6.9, 10 (LXX)
16“Kae ko koutou, amutia koutou! E kitea e nā mata o koutou ma lagona e nā taliga o koutou. 17E takutino atu e au kia te koutou, e tokalahi nā pelofeta ma tagata o te Atua na fofou lahi lele ke kilātou kiteagia nā mea kua kitea e koutou, kae e hēki mafai e kilātou; ma na fia fakalogo ki nā mea kua fakalogo koutou ki ei, kae e hēki mafai e kilātou.#Luk 10.23-24
Kua Fakamālamalama e Iehu te Uiga o te Talafakatuha o te Lūlūhaito
(Mlk 4.13-20; Luk 8.11-15)
18“Fakalogo mai la, kae ke iloa e koutou te uiga o te talafakatuha o te lūlūhaito. 19Ko nā tino e kilātou lagona te fekau e uiga ki te Mālō o te Atua kae hē mālamalama lelei e uiga ki ei, e fakatuha kilātou ki nā fatu haito na pakukū ki luga o te auala. E hau ia Hatani#13.19 pe Tē e Kino oi hamu kehe nā mea na totō ki o lātou loto. 20Ko nā fatu haito na pakukū ki luga o te kelekele fatufatua, e fakatuha ki nā tino e kilātou talia ma te fiafia te fekau i te taimi lava e lagona ai e kilātou. 21Kae e hē loloto o lātou aka, ma e hē tūmau mataloa ai foki. Ko te taimi lava e pa mai ai nā puapuagā ma nā fakahāuāga ona ko te fekau, e vave lele oi uma to lātou talitonu. 22Ko nā fatu haito na pakukū ki te mea e ola ai nā vao mātuituia, e fakatuha ki nā tino e kilātou lagona te fekau a te Atua; kae ko popōlega o te olaga ma te mānumanu ki koloa o te lalolagi, kua taomia ai te fekau ma hē fua mai ai ni fua. 23Ma ko nā fatu haito na lūlū ki luga o te kelekele lelei, e fakatuha ki nā tino e lagona te fekau ma mālamalama lelei ai; e fua mai e kilātou nā fua, ko iētahi e taki tau helau, ko iētahi e taki tau ono hefulu, ma iētahi e taki tau tolu hefulu.”
Ko te Talafakatuha o nā Vao Kino
24Kua toe fai tētahi talafakatuha a Iehu kia te kilātou: “Ko te Mālō o te lagi e fakatuha vēnei. Na lūlū e he tamāloa ni fatu haito lelei i tona fātoaga. 25Kua pa ki tētahi pō ka koi momoe ia tagata, kae hau te tino e fai te tamāloa ma ona fili, oi lūlū nā fatuvao kino ki te mea e iei nā haito, oi toe fano kehe ai. 26Kua ola ake nā lākau kua kāmata tutupu nā ulu haito, ka kua hula ake ai foki ma te vao kino. 27Oi na ōmamai ai nā kaukauna a te tamāloa kua lea vē mai ki ei, ‘Te aliki, na lūlū e koe nā fatu haito lelei i te fātoaga; kae na vēhea nei oi ola ai nā vao kino?’ 28Kua tali atu te tamāloa, ‘Ko he tino nei e fili mai kia te au te na ia faia te mea tēnei.’ Oi lea atu ai nā kaukauna, ‘E fofou la koe ke olo kimātou oi laga ki luga nā vao kino?’ 29Kua tali mai te tamāloa, ‘Hēai, auā kāfai e laga e koutou nā vao kino, e ono laga fakatahi ake ai ma nā haito. 30Kae tuku vēia nā haito ma nā vao kino ke ola fakatahi ake ke pa ki te taimi o te helehelega. I te taimi tēnā, ka lea au ki nā tino helehele haito ke laga muamua ki luga nā vao kino ma tanoa fai lukulukuga, ma huhunu. Oi fātoā fakaputu mai ai nā haito ma kave ki loto o toku fale haito.’ ”
Ko te Talafakatuha o te Fatu Hīnapi
(Mlk 4.30-32; Luk 13.18-19)
31Na toe fai tētahi talafakatuha a Iehu kia te kilātou: “Ko te Mālō o te lagi e fakatuha ki he fatu hīnapi na kave e he tamāloa oi totō i tona fātoaga. 32Ko te fatu ia e pito hili ona taigole i lo fatu lākau uma, kae kāfai e ola ake, e kavea ma lākau e pito hili ona lahi i lo nā lākau fātoaga uma; ma e ōmamai nā manulele oi fai o lātou ōfaga i ona lālā.”
Ko te Talafakatuha o te Fefete
(Luk 13.20-21)
33Na toe fai foki hētahi talafakatuha e Iehu kia te kilātou: “Ko te Mālō o te lagi e vēia ko te fefete e fakaaogā e he fafine ke fai ai he falaoa. E ui lava ni tamā mea fefete te palu e ia ki ni fuagā falaoa e tolu, kae e fefete uma ai te paluga kātoa.”
Ko te Fakaaogāga e Iehu o nā Talafakatuha
(Mlk 4.33-34)
34Na fakaaogā e Iehu nā talafakatuha ke fakailoa ai nā mea uma iēnei ki tagata: nae hē mafai ke lea kia te kilātou i he mea e aunoa ma te fakaaogā e ia o he talafakatuha. 35Ko te mea tēnei na taunuku ai te kupu a te pelofeta,
“Ka fakaaogā e au nā talafakatuha
ke akoako ai kilātou;
ka fakailoa e au kia te kilātou
nā mea nae hē iloa e he tino
talu te foafoaga o te lalolagi.”#Hal 78.2
Kua Fakamatala e Iehu te Talafakatuha o nā Vao Kino
36Oi na fano kehe ai ia Iehu mai te kaifenua ma kua fano ki loto o te fale. Ma na ōmamai ai ona hoko kua lea vē mai kia te ia, “Fakamatala mai ake kia te kimātou te uiga o te talafakatuha o nā vao kino i te fātoaga.”
37Kua tali atu ia Iehu, “Ko te tamāloa na ia lūlūa nā fatu haito lelei ko te Ataliki o te Tagata; 38ko te fātoaga ko te lalolagi; ko nā fatu haito lelei ko tagata iēnā o te Mālō o te Atua; ko nā vao kino ko tagata iēnā o Hatani; 39ko te fili na ia totōa nā vaokino, ko te Tiāpolo tēnā. Ko te helehelega ko te ikuga tēnā o te olaga nei, ka ko kilātou e helehelea, ko te kau āgelu. 40E vēia ona fakaputu nā vao kino ma huhunu i te afi, e vēnā foki te mea ka pa ki ei kāfai e uma te olaga nei. 41Ka uga atu e te Ataliki o te Tagata ana āgelu, ma ka laga e kilātou ki luga mai tona Mālō, nā mea uma e takitakia ia tagata ki te agahala, ma kilātou uma e faiāmio mātagā, 42ma togi ai kilātou ki loto o te ogāumu kakaha, te mea ka lauē ma katigū ai o lātou nifo. 43Kae ko tagata o te Atua, ka huhulu e vē ko te lā i te Mālō o to lātou Tamana. Kāfai e iei ni outou taliga, fakalogo mai la!
Ko te Talafakatuha o nā Koloa e Mumuni
44“Ko te Mālō o te lagi e fakatuha vēnei. Na maua e he tamāloa he koloa tāua e tanu i he fenua. Kua tumu tona loto i te fiafia oi na toe tanu ai e ia ke galo, kae kua fano oi fakatau atu nā mea uma lele a ia, ma na totogi ai te fenua tēnā mo ia.
Ko te Talafakatuha o te Pēnina
45“Ko te Mālō o te lagi e fakatuha foki, ki he tino fakatau koloa e hakili pēnina tāua, 46ma i te mauaga e ia o he pēnina e hili te tāua, oi fano ai fakatau atu ana mea uma lele, ma fakatau mai ai e ia te pēnina tēnā.
Ko te Talafakatuha o te Kupega
47“Ko te Mālō o te lagi e fakatuha foki vēnei. E iei nā tino faifaiva e tatao to lātou kupega i te tai ke maua ai ho he itūkāiga ika. 48Kua tumu te kupega, oi toho ai e kilātou ki gāuta ma nonofo ai ki lalo oi fili nā ika: ko nā ika lelei e togi ki loto o nā polapola ka ko nā ika kino e tīaki. 49E vēnā foki lava te mea ka pa ki ei kāfai e uma te olaga nei: ka ōatu nā āgelu oi fili kehe nā tino agahala mai nā tino āmiotonu, 50ma togi ai kilātou ki loto o te ogāumu kakaha, te mea ka lauē ma katigū ai o lātou nifo.”
Nā Akoakoga Fōu ma nā Akoakoga Tuai
51Kua fehili atu ia Iehu ki nā hoko o ia, “E mālamalama koutou i nā mea iēnei?”
“Io,” kua tali vē mai kilātou kia te ia.
52Oi na lea vē atu ai ia Iehu, “Ko tēnei la te uiga. Ko nā faiākoga tau tokatahi uma o te Tūlāfono kua akoakogia i nā mea tau te Mālō o te lagi, e fakatuha ki he tino e iei hona fale, e tuku mai e ia ki fafo nā mea tāua fōu ma nā mea tāua tuai a ia, mai te potu e teu ai.”
Kua Teteke ia Iehu e Tagata o Nahaleta
(Mlk 6.1-6; Luk 4.16-30)
53Kua uma te fai e Iehu o nā talafakatuha iēnei, oi na fano kehe ai mai kinā, 54kua toe foki ki tona nuku. Na akoako e ia ia tagata i loto o nā hūnako, ma na ofo lele ai kilātou uma na fakalogo kia te ia ma fehili ai vē, “Ko fea nei te na maua mai ai e te tagata nei tēnei poto? Na mafai vēhea foki e ia oi fai nā vāvega? 55E hē ko ia nei tēnei te ataliki o te kāmuta? E hē ko Malia nei tona mātua? E hē ni uho nei e o ia ia Iakopo, Iohefa, Himona ma Iuta? 56E hē ko ona tuafafine uma nei iēia e nonofo i kinei ma kitātou? Ko fea la te na iloa mai ai e ia nā mea uma iēnei?” 57Ma na teteke ai e kilātou ia Iehu.
Kua vāgana atu ia Iehu kia te kilātou, “E mamalu te pelofeta i ho he mea, kae vaganā ai i tona lava nuku, ma i tona lava kāiga.” #Ioa 4.44 58Ona ko to lātou hē fakatuatua e hēki lahi ai ni vāvega na fai e ia i kinā.
Селектирано:
Mataio 13: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust