Mataio 14
14
Ko te Mate o Ioane te Papatiho
(Mlk 6.14-29; Luk 9.7-9)
1I te taimi tēnā, kua fakalogo ia Helota te tupu o Kalilaia e uiga kia Iehu. 2Oi na lea vē atu ai ki ana kaukauna, “Ko Ioane te Papatiho tēnei kua toe ola mai; ko te ala ia e ia mafaia ai oi fai nā vāvega.”
3Na lea vēnā ona na fakatonu e ia ke puke ia Ioane ma noanoa, oi togi ai ki loto o te falepuipui. Na fai e ia te mea tēnei ona ko Helotia te āvaga a tona uho ko Filipo,#Luk 3.19-20 4auā ko Ioane nae fai lava ma lea kia Helota, “E fakahā i te Tūlāfono ke fai ia Helotia ma au āvaga!” #Lev 18.16; 20.21 5Na fofou lele ia Helota ke tāmate ia Ioane ka nae mataku i nā tino Iutaia, auā nae manatu kilātou, ko Ioane ko he pelofeta.
6I te fakamanatuga o te aho fānau o Helota, na hiva ai te afafine o Helotia i mua o te tupu ma te kau valakaulia uma. Na fiafia lahi lele ai ia Helota, 7oi na fai ai tana folafolaga ki te tautiti e vēnei, “Ko au e tautō atu ka kō fōki atua mo koe ho he mea lava e fofou koe ki ei!”
8Na lea atu ai loa te tautiti kia Helota e vē ona fakatonu ai ia e tona mātua, “Kaumai la nei kia te au i luga o he peleti lahi, te ulu o Ioane te Papatiho!”
9Na lagona e te tupu te fakanoanoa, kae ona ko tana tautōga kua uma te fai i mua o te kau valakaulia, na fakatonu ai e ia ke fai te mea e fofou ki ei te tautiti. 10Oi na fakatonu ai e ia ke tipi kehe te ulu o Ioane i loto o te falepuipui. 11Kua kaumai te ulu i luga o he peleti lahi ma na fōki atu ai ki te tautiti, oi na kave ai e te tautiti ki tona mātua. 12Oi na ōmamai ai nā hoko o Ioane kua kave tona tino oi tanu; ma na olo ai loa oi taku kia Iehu.
Kua Fafaga e Iehu he Toka Lima Afe
(Mlk 6.30-44; Luk 9.10-17; Ioa 6.1-14)
13Kua fakalogo ia Iehu ki te mea kua tupu kia Ioane, oi na fano kehe ai mai kinā, kua fano i he vaka ki he kogāfenua e tūfua. Kua iloa e tagata te mea kua fano ki ei ia Iehu, oi na tuku ai e kilātou nā nuku nae nonofo ai kae kua olo kui gāuta ma mulimuli kia te ia. 14Kua fanake ia Iehu ki gāuta mai te vaka, oi na ia kitea atu ai te tokalahi o te kaifenua. Na tumu tona loto i te alofa kia te kilātou, ma na fakamālōlō ai e ia nā tino o kilātou nae maua i nā tauale.
15I te afiafi tēnā, na ōmamai ai ona hoko kia te ia ma lea vē mai ki ei, “Ko kinei ko he kogāfenua e tūfua, ma kua pō foki. Uga kō nā tino ke olo ki nā nuku e tafapili mai, ke fakatau mai ni a lātou mea ke kai.”
16Kae na tali atu ia Iehu kia te kilātou, “E hē tatau ke olo, fōki ifo e koutou he lātou mea ke kai!”
17Na tali mai kilātou, “Oioti lava a tātou meakai i kinei, e lima ia falaoa ma he luagamata ika.”
18“Kaumai la ki kinei kia te au,” na lea vēnā atu ia Iehu. 19Oi na fakatonu ai e ia nā tino ke nonofo ki luga o te mutia; ma na tago ai ki nā falaoa e lima ma nā ika e luagamata, kua tepa ake ki te lagi, ma fakafetai ki te Atua. Kua tavaevae e ia nā falaoa ma fōki ki ona hoko ke tufatufa ki tagata. 20Kua kakai ia tagata uma ma kua mākokona. Oi na ao ai e te kau hoko nā toegā meakai, ma na tūtumu ai nā polapola e hefulu lua. 21Ko te nūmela o kilātou na kakai e lima afe ia tāulelea, kae hē faitaua ai ia fafine ma tamaiti.
Kua Havali ia Iehu i luga o te Kilitai
(Mlk 6.45-52; Ioa 6.15-21)
22Oi na fakatonu ai e Iehu ona hoko ke olo ki luga o he vaka ma ke muamua ki tētahi itū o te vai, kae kua uga e ia ia tagata ke olo ki o lātou kāiga. 23Kua mātuku atu ia tagata, oi na fano tautahi ai ia Iehu ki luga o he mauga ke tatalo ai. Kua pa ki te afiafipō kae koi iei tautahi lava ia Iehu i kinā; 24ka ko te taimi tēnā ko te vaka kua mamao atu ki loto o te vai ma nae tuki e nā galu, auā ko te matagi nae hau tonu lava i te muāvaka.
25I te vā o te tolu ki te ono i te vaveao, na fanaifo ai ia Iehu ki nā hoko o ia, e havali i luga o te kilitai. 26Kae i te kitea atuga o ia e kilātou e havali i luga o te kilitai, oi na mātataku lahi lele ai kilātou ma lea vē, “E, he aitu!”
27I te taimi lava tēnā, na vāgana mai ai ia Iehu kia te kilātou, “Fakamākekeke! Ko au tēnei. Koutou nahe mātataku!”
28Oi na lea atu ai ia Petelu, “Te Aliki, kāfai e moni ko koe, lea mai la ke fanatu au i luga o te kilitai kia te koe.”
29“Hau la!” na tali mai ai ia Iehu. Oi na tū ifo ai loa lava ia Petelu ki lalo mai te vaka kua kāmata oi havali kia Iehu i luga o te kilitai. 30Kae i te ia kitea atuga ko te matagi e mālohi, oi na lagona ai loa e ia te mataku ma na kāmata ai oi goto ki lalo o te vai. Ma na kalaga ai vē, “Te Aliki, fakaola kō au!”
31Na papae atu ai loa lava ia Iehu i te taimi tēnā oi tāofi mai te lima o Petelu ma lea vē atu ki ei, “Kai te taigole ātili lele o tō fakatuatua! Heā te na māhalohalo ai koe?”
32Kua hohopo ake kilāua ki te vaka, ma na toku ai loa foki te matagi. 33Oi na ifo atu ai kia Iehu nā hoko o ia nae i luga o te vaka ma lea vē atu ki ei, “E moni lava ko koe ko te Ataliki o te Atua.”
Kua Fakamālōlō e Iehu nā Tauale i Kenehaleta
(Mlk 6.53-56)
34Kua pa atu kilātou ki tētahi itū o te vaitūloto, ma kua tau atu ki Kenehaleta. 35I te mateaga o Iehu e nā tino i kinā, oi na logo ai e kilātou nā tino i nā koga uma e tuākoi mai, ke kaumai nā tauale uma kia Iehu. 36Na talohaga foki nā tino kia Iehu ke mafai nā tauale ke tau lava kua paki ake ki te pito o tona kofuloloa; ma ko kilātou uma na paki ki ei na fakamālōlōgia.
Селектирано:
Mataio 14: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust