Matiye 17
17
Vu ngi Yesu mimbiɗi
(Yo pura Mark 9.2-13; Luk 9.28-36)
1Hin merkeɗ a dirba nah na, Yesu a zuɓa Piyer waɗ Zak ati sukum naŋ Zaŋ, a jiɗ ti taŋ baˀ pal taŋ nga muwã madiɗa. 2Vu ngi Yesu a mbiɗi a mbuŋ taŋ: mihiri naŋ a zla a wucuɗ ka pas, zana naŋhay a mbiɗam njazlazl njazlazl ka li minjahha. 3Akẽh na, Moyis ati Eli a bigaka taŋ vu, ara kiɗam slir ati Yesu. 4Joˀ Piyer a zla a ɓa Yesu: «Buy, ndra misi aka na, naŋ kuy. Da ki wuɗ le na, yi sa ɗiyi mazlaɓ makir aka, pal da ka, pal da Moyis waɗ pal da Eli.» 5Hirak ti naŋ maɓi aruŋ vuna si na, keɗ na, gazlavay minjazlazla a so sirta taŋ. Yo ay a cino tir gazlavay tuwa: «Mbur hana i Mangal ɗu ya mawuɗaŋ haɗa, ya hĩhĩyaŋ ɓa yi winaŋ! Cinaka mingiɓi naŋ!» 6Mizli ngi seˀehey micinam kanah na, zluwun a ga taŋ haɗi teˀe, a ndilam midibiɗ a ruwuy a ruwuy. 7Joˀ Yesu a kiroho ng'avi taŋ, a wusa taŋ, a ɓa taŋ: «Slikiɗam! Ki zluwunam ta!» 8A zuɓaka hiri, keɗ keɗ na, mbur mekelem anta, sey Yesu pal naŋ. 9Ti taŋ mapoko sar ti muwã tuwa, Yesu a ɓa taŋ ɗaˀ le: «Gwat kum mupuraka hana, ko ki ra ɓaka ɓi nah da mbur ta wãˀ, hã da Mangal ngi mbur mislikiɗ le ti wuzla mumucahay ɗagay.»
10Dar mizli ngi si Yesuhoy a cufuɗaka Yesu: «Na buy ngi ɓimujuwahay a ɓam, sey Eli a so ɗagay na, vur mike?» 11Yesu a mbiɗa taŋ di: «Kanah ɓula, Eli a sa so ɗiya gwataya gar a muŋ. 12Amma yi ɓukum na: Eli a so le si, mizli a sinakaŋ ta, hã a gam di ka taŋ muwuɗam gar. Mangal ngi mburo kwana, a sa si bonoy asi haŋ taŋ aya.» 13Angi nah na, mizli ngi seˀehey a slaka wala nah le muduba, dambalaka a ɓa taŋ di i ɓi ngi Zaŋ mici mizli ar yam.
Yesu miɗiya mangal midiɗa kuli
(Yo pura Mark 9.14-29; Luk 9.37-43)
14Ti taŋ mindiloko avu zigiduwo na, mbur a girjoho ng'avu Yesu, a huruk huruk a mbuŋ naŋ, 15a ɓaŋ: «Buy, pura ircece da mangal ɗu ani, vur a diɗ kuli, ara gaŋ bonoy kuyta wãˀ. A diɗ gweˀ gweˀ ng'ar vu, malla ar yam. 16Yi ru di le zleˀe avu mizli ngi si kahaya, amma ko a ɗiyakaŋ gu ta.» 17Joˀ Yesu a zla a ɓi: «Kayya, kum mizli misi hirnga gidaŋhay! Mizli sulome malambaˀhay! I sa cifi ati kum hã ti vunaka? I sa ɓusukum hã ti vunaka? Sikiy di ng'aka!» 18Joˀ Yesu a buca setene tuwa ti gidaŋ, a bi ti vu mangala. Mangal a ɗiyi a haŋhaŋ si. 19Dar mizli ngi seˀehey a kirohoko pal taŋ ng'avi Yesu, a ɓakaŋ: «Ndr'i ɓulaka setene hana vuna gu ta vur mike?» 20Yesu a ɓa taŋ: «Asi tiɓi kumo naŋ geˀ preˀe. Gisiŋ, yi ɓukum na: pas mekeleme, da kum ada ti tiɓi a mevele, ko meciɗek ka zinga ngi lar ada#17.20 Lar hana a zilaka ti mi frasẽ mutarde, zinga naŋ a luguɗom di lar. tekeɗe kwana, da ki ɓaka muwã hana le: ‹Budugur baɗ ti ka nga digaˀ na, a sa budugur. Ko gwat masa fucukukum anta.» 21Amma sukwi ngi setene misi kahana na, a ɓul gu ta, sey ti dira dibiɗ ati gi dalyam far.
Yesu miɓa ɓi ngi muc naŋ ati ngi slikiɗ naŋ ti wuzla mumucahay ava ma
(Yo pura Mark 9.30-32; Luk 9.43-45)
22Ngi pas numuŋ, mizli ngi si Yesuhoyo micikilam gar taŋ a Galile na, Yesu a ɓa taŋ: «A sa vulaka Mangal ngi mbur asi haŋ ngi mizli. 23A sa kiɗakaŋ vagay, amma ar hin mimakir naŋ na, a sa slikiɗi.» Taŋ micinam kahana na, a likam haɗi.
Buutu mawurkaka ar hay ngi Bumbulvuŋ
24Ti taŋ mindilam a Kapernahum na, micikila buutu ngir hay ngi Bumbulvuŋ a soko ng'avi Piyere, a ɓakaŋ: «Kumani kumo, a wuruk buutu ngir hay ngi Bumbulvuŋ ta kwa?» 25Piyer a ɓi: «Hĩ, ada wuruku.» Ti Piyer mindil a haya na, Yesu a zla a ɓaŋ dumbuŋ: «Simoŋ, ka ki wuluk mbrike? Mawurkaka laada malla buutu da buy madiɗa ngi si ruwuyoy i waniy ka? I ziri taŋhay kwa? Malla mulakay kwa?» 26Piyer mumbiɗaŋ di, miɓaŋ: «I mulakay,» na, Yesu a ɓaŋ: «Da kine na, ziri taŋhay anta wurkam ta. 27Amma anja i gaka taŋ gwat ngi ji mevel ta. Aru nga miyam madiɗa, ka kunayele. Kilif ka masa ja dumbuŋ na, ɗuɗo di, wuna mi naŋ, kisa lum suloy pal a balama. Zuɓo di ngi wurka buutu ɗu ati ngi ɗike.»
Bible en Langue Guiziga © L’Alliance Biblique du Cameroun, 2011.