Okhukalushila 28
28
Tsikhabi etsiitsa khulwa obuhulili
(Lawi 26.3-13; Okhuka. 7.12-21)
1Ne noba nohulila bulayi amakhuwa kOMWAMI Nyasayewo, niwitsulila okhukhola akamalakoke kosi aka ekhulaka inyanga yino, OMWAMI Nyasayewo alakhwemekha ikulu wamahanga kosi keshialo; 2ne tsikhabi tsino tsiosi tsilakhwitsila nitsikhunyoola, noba nohulila amakhuwa kOMWAMI Nyasayewo. 3Olaba oweikhabi mwitaala, khandi olaba oweikhabi mumukunda. 4Ebiamo biomubilikwo bilaba neikhabi, nebiamo bielilobalio, nebiamo biemirukochio, mbu amameeto ketsing'ombetsio nebimeeme biebiayobio. 5Eshimweloshio shilaba neikhabi, neinyunguyo eyokhunyooba. 6Olaba oweikhabi nosamula, khandi olaba oweikhabi nochelela.
7OMWAMI alachila abasukubo bosi abakhubuushilakahwo barootselwe imbeliwo; balarulila khunjila ndala okhukhuyinga, ne baleelukha imbeliwo khunjila musaafu. 8OMWAMI alalaka mbu ikhabi yibe khwiwe mubiachibio nomukosi aka orakhwo omukhono okhukhola; khandi alakhuheelesia ikhabi mushialo eshia OMWAMI Nyasayewo akhuheelesia. 9OMWAMI alakhutinyisia obe oluyia olutakatifu khululwe omwene, shinga olwa yakhwitsubila, noba nolinda amalako kOMWAMI Nyasayewo nochenda khunjilatsie. 10Mana tsimbia tsiosi etsiomushialo tsilalola shinga olwa okulikhwa khuliira liOMWAMI; ne balakhuria. 11OMWAMI alakhwinjiyia mubukaasu, mubiamo biomubilikwo nomubiamo biemirukochio, nomubiamo bielilobalio, mushialo tsana eshia OMWAMI yeetsubila abakuukabo mbu yakhakhuheelesia. 12OMWAMI alakhwikulila libiishilolie lilayi lielikulu, nakhuheelesia ifula khushialoshio munduukho yayo, nakhuheelesia ikhabi mumilimo chiosi chiamakhonoko; ne olahosinjia abamahanga amanji, habula iwe omwene shioleehola ta. 13OMWAMI alakhukhola obe omurwe, ne omushila ta; olabeetsanga hekulu honyene, ne hasi ta; noba nohulila amalako kOMWAMI Nyasayewo aka ekhulaka inyanga yino okhukeetsulila nokhukakhola; 14noreebera okhurula khwikhuwa liosi khukano aka emulaka inyanga yino, khumukhono musaatsa kata omukhasi mbu okhulonda khubanyasaye bandi nokhubakhalabanila ta.
Akeetsa khulwa obukhayi
(Lawi 26.14-46)
15Nebutswa noba norarechelesia omwoyo kwOMWAMI Nyasayewo, okhwitsulila okhukhola akamalakoke nende aka alachilisia kosi aka ekhulaka inyanga yino, tawe, kho ebilaka munwa bino biosi bilakhwitsila nibikhunyoola. 16Olaba mushilaamo shiobubii mwitaala, khandi olaba mushilaamo shiobubii mumukunda. 17Eshimweloshio shilaba mushilaamo shiobubii, neinyunguyo eyokhunyooba. 18Ebiamo biomubilikwo bilaba mushilaamo shiobubii, nebiamo bielilobalio, namameeto ketsing'ombetsio, nebimeeme biebiayobio. 19Olaba mushilaamo shiobubii nosamula, khandi olaba mushilaamo shiobubii nochelela.
20OMWAMI alakhuleerela eshilaamo shiobubii nobukoyani, nobukondeshelwi, mukosi aka orakhwo omukhono okhukhola, okhuula olwa oba nomalilaanwe, notiba bwangu; khulwa obubii bwebikholebio, shichila wandekha. 21OMWAMI alachila oluumbe lukhuhandekhwo okhuula olwa alaba nakhusishiye mushialo eshio eshia witsa okhwinjilamwo okhushibukula. 22OMWAMI alakhuupa neshiheela, nomurengo, nokhufwimba, nokhuyia omubili pia, khandi nolukanga, nemimela okhukwa amatere, nende ebikhwalo; bilakhulondachilila okhuula olwa otiba. 23Likululio nalio, elili ikulu womurwekwo, lilaba shinga omukasa; nalio liloba elili hasiwo lilaba shinga eshibia. 24OMWAMI alakhola ifula yeshialoshio yibe olufu nomuyeshe; bilakhukwakhwo okhurula mwikulu, okhuula olwa olaba nomalilaanwe.
25OMWAMI alachila norootswa imbeli wabasukubo; olarulila khunjila ndala okhubayinga, ne oleelukha imbeli wabwe khunjila musaafu; khandi oleekhola eshiriisio mubwami bwosi obwomushialo. 26Omulambokwo kulaba inyama yamanyonyi kosi akomulwanga, neyetsisolo tsiosi etsiomushialo, kata shialabayo outsiilusia ta. 27OMWAMI alakhunyasia namabure kalia keMisiri, namabumba, namabondo, namakakha, ebia oranyala okhuhonibwa ta. 28OMWAMI alakhunyasia namalalu, nende obubofu, nobukoyaani bwomwoyo. 29Olahaabahaabasia mushiteere, shinga ababofu olwa bahaabasia mushiilima, kata shiolakaasa khunjilatsio ta; ne olasandibungwa butswa, noyaaywa tsindaalo tsiosi, kata shialabayo oukhuhonia ta.
30Olakhwa omukhasi, ne oundi alakona ninaye; oloombakha inzu, ne shiolamenyamwo ta; olaraaka omukunda kwemitsabibu, ne shioleekhoonyela ebiamo biakwo ta. 31Ing'ombeyo yileerwa nolola, ne shiolaliakhwo ta; isishiliyo yilanuulwa imbeliwo, nolola, ne shiolachikalusilibwa ta, likondilio lilaheebwa abasukubo, ne shiolabakhwo noukhuhonia ta. 32Abaanabo abasiani nabakhaana balaheebwa abandu boluyia lundi, ne tsimonitsio tsilahenganga nitsihobokha khulwa amahoofu aka olaliibungwa ninabo eshiteere tulu; kata amaani komukhonokwo shikalanyala eshindu ta. 33Ebiamo bielilobalio, nebiobunyakhanibwo bwosi, lihanga elia oramanyilekhwo ta lilabilia; nawe olasandibwa butswa notubulwa tsindaalo tsiosi, 34okhuula olwa kalakhulalusia, akeenako aka tsimonitsio tsilalolanga. 35OMWAMI alakhunyasia amasikamo nebilenje nende amabure amabii aka oranyala okhuhonibwa ta, okhurula khushisisilo okhuula khulwotosi Iwomurwe.
36OMWAMI alakhuyila iwe halala nomuruchi oyo owa olaba niweemeeshe okhukhuruka, mwihanga elia oramenyilekhwo, kata iwe kata abakuukabo tamana ebweneyo olakhalabanila abanyasaye bandi, ababaatswa khubisaala nokhumachina. 37Olakwa eshiriisio, noluchelo, nelinyeko, mumbia tsiosi tsiabandu etsia OMWAMI alakhusamusiliamwo. 38Olachinga imwo inyinji notsia mumukunda, nebutswa olakhung'aasia induutu, okhuba tsisiche tsilachilia 39Olaraaka emikunda chiemitsabibu nochilima, nebutswa shiolanywakhwo khudivai kata okhunokakhwo tsinzabibu tsiene ta, okhuba tsinyende tsilatsilia. 40Olaba nemitseituni mushibalashio shiosi, nebutswa shioleebakhakhwo amafura keene ta; okhuba emitseitunichio tsilabungulukha ebiamo biachio. 41Oleebula abaana abasiani nabakhaana, ne shibalaba abobo ta; okhuba balayilwa mubuhambe. 42Emisaalachio chiosi nebiamo bielilobalio bilaba ebietsisiche. 43Omurende ouli hakari weenywe alaniina ikuluwo, hekulu muno; nawe oleekha hasi muno. 44Alakhuhosiakhwo amapeesa, ne iwe shiolamuhosiakhwo ta; ye alaba omurwe, nawe olaba omushila. 45Ebilaka munwa bino biosi bilakhwitsila nibikhulondachilila, nibikhunyoola, okhuula olwa oba nomalilaanwe; shichila shiwarechelesia omwoyo kwOMWAMI Nyasayewo, okhulinda amalakoke nende aka yakhulachilisia, shinga olwa yakhulaka ta; 46bilakhubakhwo bibe eshilolelo khandi eshiokhuhuka, khandi khulwibulolwo ebisoni nebisoni.
47Okhuba shiwakhalabanila OMWAMI Nyasayewo nokhwikhoya nobusangaafu obwomumwoyo khulwa obunji bwebindu biosi, 48niko akalachila nokhalabanila abasukubo aba OMWAMI alaruma okhukhuyinga, noli neinzala, nobuloho, neshihechenye, notambanga ebindu biosi pe; alara likokolo lieshibia khwikosilio, okhuula olwa alaba nakhutibiye. 49OMWAMI alaleera lihanga lindi okhukhuyinga okhurula ehale, okhurula khundulo weshialo, shinga inditsu olwa yipulukha; nelihanga elia olulimi lwalio shioluhulilanga ta; 50lihanga eliakhanana mumoni, elirateeba likhuwa liabakofu kata elirachama abaraaka ta. 51Alalia ebiibulwa biemirukochio nebiamo bielilobalio okhuula olwa olaba notibiibwe; kata shialakhuleshela imele yosi, kata idivai, kata amafura, amameeto ketsing'ombetsio kata ebimeeme biebiayobio ta, okhuula olwa alaba nakhusishiye. 52Alakhwikalila mumataalako kosi, okhuula olwa tsingobatsio tsirambi etsietsingufu tsilaba nitsikwisiibwe mushialoshio shiosi, etsio etsia wali niwisichilanga; alakhwikalila mumataalako kosi mushibalashio shiosi eshia OMWAMI Nyasayewo yakhuheelesia. 53Olalia ebiibulwa biomubili kukwo, mbu emibili chiabaanabo abasiani nende abakhaana aba OMWAMI Nyasayewo yakhuheelesia, mubwikalilwi khandi mumanyasio aka abasukubo balakhunyasia. 54Omusaatsa khwinywe ouli omutorotoro, niyeenya okhutembelesibwa muno, tsimonitsie tsilahenga omwana wabwe nokhumookoola, kata khumukhasiwe owokhushilifushie, kata khumusikalo kwabaanabe aba ashisikala ninabo, 55naraheelesia omundu yesi khubo eshitonye shiemibili chiabaanabe aba alalia, okhuba shiatong'a neshindu shiosi ta, mubwikalilwi khandi mumanyasio aka abasukubo balakhunyasia mumataalako kosi. 56Kata omukhasi ouli omutorotoro niyeenya okhutembelesibwa khwinywe, ourafuchiilila kata okhuseena lilaaro lieshilenje khwiloba ta, khulwa obutorotorobwe nokhutembelesibwa, tsimoni tsitsie tsilahenga omusaatsawe owokhushilifushie nokhumookoola, kata khumwanawe omusiani kata khumwanawe omukhaana, 57nababisa likubo elirula hakari webilenjebie, kata omwanawe owa aleebula; okhuba alabalia mabiswi khulwa obutambi bwebindu biosi, mubwikalilwi khandi mumanyasio aka abasukubo balakhunyasia mumataalako.
58Noba noreetsulila okhukholanga amakhuwa kosi akamalako kano, akahandiikwa mushitabu shino ta, mbu oriitsenje eliira lino elioluyali neliamariisia, mbu YAHWEH NYASAYEWO; 59kho OMWAMI alakhunyasia amanyasio kamakana, iwe nende olwibulolwo, mbu amanyasio amakhongo akatsiilililanga, nobulwale obutinyu obutsiilililanga. 60Alakhukalusiliakhwo oluumbe lwosi lwaMisiri, olwa walinoriitsanga; nalwo lulakhuhandakhwo. 61Kata nende buli bulwale nabuli linyasio ebirahandiikwa mushitabu shiamalako kano ta, ebio nabio OMWAMI alakhurakhwo, okhuula olwa oba notibiibwe. 62Mana mulalekhwa nimuli butswa abatuutu obunji bweenywe, kata olwa mwalinji shinga tsinyininyini etsiokhwikulu obunji; shichila shiwahulila amakhuwa kOMWAMI Nyasayewo ta. 63Mana shinga OMWAMI olwa yamwikhoyela okhumukholela amalayi, nokhumwinjiyia, nilwo olwa OMWAMI alamwikhoyela okhumusishia nokhumumalilana; khandi muleehwa okhurula khushialo eshia winjilamwo okhushibukula. 64Khandi OMWAMI alakhusaalasia mumbia tsiosi tsiabandu, okhurula khushihesi shieshialo okhuula khushihesi shindi shieshialo; ne ebweneyo olakhalabanila abanyasaye bandi aba oramanyilenje, kata iwe kata abakuukabo ta, nibo ebisaala namachina. 65Ne mumahanga ako shiolanyoolakhwo obuhuluushi bwosi ta, kata shihalabaho habundu aha olanyala okhuseena eshilenje ta; nebutswa OMWAMI alakhuheelesia omwoyo omutechefu, netsimoni etsihobokha, naroho eyitoreelela. 66Obulamubwo buleeleesibwa imbeliwo; olariitsanga eshilo nende eshiteere, norabakhwo nobwisiichi khubulamubwo ta. 67Mutsuli olasunganga mbu Shiakhuha bweela! Mana nibwakheela olasunganga mbu Shiakhuha bwashia! Khulwa akeenako aka omwoyokwo kulariitsanga, khandi khulwa akeenako aka tsimonitsio tsilalola. 68Ne OMWAMI alakhukalusilia eMisiri mumaaro, oluchendo olwa ndakhusunjila mbu shiwakhalulola khandi ta; ebweneyo muleekusilia abasuku beenywe, mube abasumba nabakholi abakhasi abakule; ne shialabaho oumukula ta.
Oluluyia Union Version © Bible Society of Kenya 1975