Okhukalushila 22
22
1Oralolakhwo ing'ombe yomwana weenywe kata likondilie nibikorile, mana niwibisa shinga ouraluutsi ta; okhukalusia obikalusie ewomwana weenywe. 2Ne omwana weenywe naba narali ahambi ninawe ta, kata noba nomukorwa, kho oshileere hango wuwo, obe ninashio okhuula olwa omwana weenywe ashienya, mana oshimukalusilie. 3Kata isishiliye, oshikhole orio; kata inguboye ochikhole orio, kata buli shindu shiosi shiomwana weenywe, eshiba nishimukorilekhwo nawe noshinyoolile, oshikhole orio; ne oreebisakhwo shinga ourabiluutsi ta.
4Oralolakhwo isishili yomwana weeny ve kata ing'ombeye nibikwile khunjila, mana niwibisa shinga ouraluutsi ta; okhukhoonya omukhoonye okhubibuusia.
5Omukhasi areefwala eshili shieshisaatsa, kata omusaatsa okhwifwala ingubo yeshikhasi ta; okhuba omundu yesi oukhola amakhuwa kano neshisinyo khuMWAMI Nyasayewo.
6Noba niwitsukhana nonyoola eshitsu shielinyonyi liosi, kata mumusaala kata hasi, nishili nebisosole kata amabuuyu, nalio linyina nilikonela ebisosole kata amabuyu tsana, orabukula nyina halala nebisosole ta; 7okhuula olwa olekha linyina litsie, ne ebisosole obibukule; mbu okaasenje, khandi mbu tsindaalotsio tsimeeteshe.
8Olwa oba niwumbakha inzu imbia, okhole omushingachi khundulo weshilama, mbu oleshe okhuleerela inzuyo eshiina shiamabanga, omundu naba nakwileyo.
9Oraraaka mumukundakwo kwemitsabibu imwo yetsimbia tsibili ta; ebiamo biosi bileshe okhwahulilwa Nyasaye, mbu imwo yene eya waraaka halala namameeto komukundakwo kwemitsabibu.
10Oralimila ing'ombe neisishili mwikokolo elala ta.
11Oreefwala ingubo inzokatsokane, eyilushilwa obwoya bwelikondi halala neikitani ta.
12Okhole amayebeyo khumikhanda chine chieinguboyo ifuubila eya wifwimbanga.
Amalako khukobushisila bwomweha
13Omundu yesi naba naleera omukhasi, namuteeshia, mana namukiya, 14namuchiikha amakhuwa ketsisoni, namuleerela eliira libii, nasunga mbu Ndaleerile omukhasi uno, ne olwa emusitiile ahambi shinyoolile nali nebilolelo biolukhaana ta; 15kho samwana omukhaana nende nyina babukule ebilolelo biolukhaana Iwomukhaana tsana, nibabirusilia abakofu belitaala haluyia. 16Mana samwana omukhaana aboolele abakofu ari Ndabashila omusaatsa uno omukhaana wanje, naye amukiyanga; 17khandi lole, amuchiishile amakhuwa ketsisoni, ari Shinyoolile omukhaanawo nali nebilolelo biolukhaana ta. Ne khane ebilolelo biolukhaana Iwomukhaana wanje mbiebino. Mana baale ingubo tsana imbeli wabakofu belitaala. 18Nabo abakofu belitaala elo babukule omusaatsa tsana nibamunywekha; 19nibamukhalaka ifwaini tsishekeli eshikhumi tsieifeetsa, nibatsimuheelesia samwana omukhaana, shichila aleereele omukhaana waIsiraeli eliira libii; naye alabeetsanga omukhasiwe; shianyala ekhumwilusia tsindaalo tsiosi tsiobulamubwe ta. 20Nebutswa likhuwa elo niliba liatoto, mbu ebilolelo biolukhaana shiyanyoolwa nali ninabio ta; 21kho barusie omukhaana bamuleere hamuliango weinzu yasamwana, nabo abasaatsa belitaala bamulase namachina afwe; shichila akholile akeshifwabwi muIsiraeli, okhukwa shia omutamba nashili munzu yasamwana; nilwo olwa olarusia obubii obuli hakari weenywe.
22Omundu yesi naba nanyoolelesibwa nakonile nomukhasi wabeene, kho bafwe bombi, omu-saatsa oukonile nomukhasi, nomukhasi yesinilwo olwa olarusia obubii muIsiraeli.
23Naba naliho omukhaana oushili omukhaana toto, nakhweebungwa nomusaatsa, omusaatsa undi namunyoola nali mwitaala, nakona ninaye; 24kho mubarusie mubaleere haluyia Iwelitaala elo, mubalase namachina bafwe; omukhaana, shichila shiakhupile tsimbungu ta, ne nali mwitaala; naye omusaatsa, shichila yoonoonia omukhasi wowashie; nilwo olwa olarusia obubii obuli hakari weenywe.
25Ne omusaatsa oyo naba namunyoola emukhaana oukhweebungwa nali mubulimo, omusaatsa tsana namubukula namaani nakona ninaye; kho omusaatsa oukonile ninaye, yenyene abe oufwa; 26habula omukhaana, oramukholela likhuwa ta; shibulamwo mumukhaana oyo eshionoono eshiakhachila afwe ta; shichila shinga olwa kali olwa omundu abuushila owashio namwira, nilwo olwa kali mwikhuwa lino; 27okhuba amunyoolile nali mubulimo; omukhaana oyo oukhweebungwa, kata nakhupile tsimbungu, abulileho oumuhabina.
28Omusaatsa yesi naba nanyoola omukhaana oushili omukhaana toto, ne narakhweebungwa ta, namutiila, nakona ninaye, nibanyoolelesibwa; 29kho omusaatsa oukonile ninaye aheelesie samwana omukhaana tsifeetsa tsishekeli amakhumi karaano, naye amuteeshele; shichila amwonooniye; shianyala okhumwilusia tsindaalo tsiosi tsiobulamubwe ta.
30Omusaatsa yesi aleshe okhubukula omukhasi wasamwana, kata okhufuunula ingubo yasamwana ta.
Oluluyia Union Version © Bible Society of Kenya 1975