Okhukalushila 23
23
Abeekalilwa obureenjila mwibukaana ta
1Owatubulwa eshimala, kata okhukhalakwa imbeli, aleshe okhwinjila mwibukaana liOMWAMI.
2Oweebulilwa munjila yeisimba aleshe okhwinjila mwibukaana liOMWAMI; kata okhuula khulwibulo Iweikhumi, omwanawe yesi shialeenjila mwibukaana liOMWAMI ta.
3OmuAmoni kata omuMoabu aleshe okhwinjila mwibukaana liOMWAMI; kata okhuula khulwibulo Iweikhumi, omundu wabwe yesi shialeenjila mwibukaana liOMWAMI inziayo ta; 4shichila shibamwakaanila nomukaate nende amatsi khunjila olwa mwarula eMisiri ta; khandi shichila bamurunga Balaamu waBeori, owePetsori eMesopotamia, okhukhulaka ebilaka munwa. 5Nebutswa OMWAMI Nyasayewo yaloba okhuhulila Balaamu; habula OMWAMI Nyasayewo yakalula eshilaka munwa shibe ikhabi khwiwe, shichila OMWAMI Nyasayewo yakhuheela. 6Orakhaabanga akomulembe kwabwe kata obukaasu bwabwe ta, tsindaalotsio tsiosi inziayo.
7OmuEdomu aleshe okhukhusinya, okhuba nomwana weenywe; kata omuMisiri aleshe okhukhusinya, okhuba walinji omucheni mushialoshie. 8Abaana aba bo beebula abolwibulo lwakhataru beenjile mwibukaana liOMWAMI.
Obusiiyikhu bweikambi yelihe
9Olwa oba norulile okhuseera abasukubo, noba mukambi, kho wilinde khubuli shindu eshibii.
10Naba nali mwinywe omusaatsa yesi ouba nali mwibilu khulwako akamwikholilekhwo mushilo, kho arule elwanyi weikambi, nareenjila mukambi ta; 11nebutswa khubwile yeesinje amatsi; mana eliuba nilimamile okhuyeela, yeenjile mukambi.
12Obe nahabundu elwanyi weikambi ewa olatsiitsanga elwanyi; 13khandi obe nomwikho mubimanulwabio; mana kabe mbu olwa osokonyala elwanyi, oyabekhwo ninakwo, mana oshiukhane obuche ebibiibio. 14Okhuba OMWAMI Nyasayewo achendanga hakari weikambiyo, okhukhureesia nokhuhaana abasukubo imbeliwo; khulwako ikambiyo yibeetsenje indakatifu; aleshe okhulola likhuwa liosi lietsisoni mwiwe, nashiukhana nakhurulakhwo.
Amalako kandi nakandi
15Oramukalusia ewomwamiwe omusumba yesi owiluushe omwamiwe nakhwitsila mbu yeehonokoshe ta. 16Amenyenje ewuwo, hakari weenywe, habundu aha alobola mwitaala elala eliakhumataalako, aha omwene achama; kata oramumiina ta.
17Aleshe okhubaho omutamba yesi owokhubakhaana baIsiraeli, kata aleshe okhubaho omutanyani yesi owokhubasiani baIsiraeli ta. 18Oraleera omurungo kwomutamba kata omushaara kweimbwa munzu yOMWAMI Nyasayewo khulwa eshiitsubo shiosi ta; shichila echio chiosi chili eshisinyo khuMWAMI Nyasayewo.
19Orahosia omwana weenywe eshindu nomurunjia injelesio ta; injelesio yamapeesa, injelesio yebiliibwa, injelesio yeshindu shiosi shiosi eshihosibungwa nishirunjilwa injelesio tawe. 20Omundu omusuku, omurunjie injelesio; ne omwana weenywe, oramurunjia injelesio ta; mbu OMWAMI Nyasayewo akhuheelesie ikhabi mukosi aka oreetsangakhwo omukhono okhukhola mushialo eshia otsia okhushibukula.
21Olwa oba nomwitsubila OMWAMI Nyasayewo eshiitsubo, oratofuhala okhushiusia ta; okhuba OMWAMI Nyasayewo alakhubanza; ne shiakhaba mwiwe eshionoono. 22Nebutswa noba nochweya okhwitsuba, elo shililabakhwo mwiwe eshionoono ta. 23Elirulile mumunwakwo, olilinde nolikhola; shinga olwa weetsubila OMWAMI Nyasayewo, eshihaanwa eshia ochama okhuhaana, eshia wasuubisia nomunwakwo.
24Olwa oba niwinjila mumukunda kwemitsabibu kwowashio, oliitsenje tsinzabibu niwikura, shinga olwa ochama; ne oratsirakhwo mushichinjiloshio ta. 25Olwa oba niwinjila mumukunda kwowashio okulimwo obule obushisinjiile, okhuunuulenje obule nomukhono; ne orasitiakhwo injeso ahobule bwowashio obushisinjiile ta.
Oluluyia Union Version © Bible Society of Kenya 1975