Okhukalushila 21
21
Akokhukasia akobwiri bwomundu ouramanyiishe ta.
1Omundu naba nanyoolekha niyeerilwe mushialo eshia OMWAMI Nyasayewo akhuheelesia shibe eshishio, nakonile mubulimo, nikaramanyiishe mbu oumuupile niwina, ta; 2kho abakofubo nabayaasiibo barule, bachele okhuula khumataala akabotokhana owirilwe oyo. 3Mana litaala elili ahambi nomundu oyo owirilwe, abakofu belitaala elo babukule imoosi eyomwituli, eyishili okhureebwa khumilimo, kata eyishili okhukhwesa likokolo ta; 4mana abakofu belitaala elo bakholomosie imoosi eyo mwibanda elilimwo omuchela kwamatsi, eliralimwa kata okhuraakwa ta, ne bachifunachile imoosi eyo likosi yaho mwibanda. 5Nabo abakuhani abaana baLawi basite ahambi; okhuba nibo aba OMWAMI Nyasayewo yalobola mbu bamukhalabanile, nokhuhaananga ikhabi muliira liOMWAMI; ne buli shifunaane nabuli buupani bulakasibwa khulwa aka bo basunga shinga olwa kali. 6Mana abakofu belitaala elo, elili ahambi nomundu owirilwe, basaabile amakhono ikulu weimoosi eya likosi liayo lifunachiilwe mwibanda; 7nibarumbula nibaboola mbu Amakhono keefwe shikeebeenia amabanga kano, kata tsimoni tsieefwe shitsiluutsi nikeebeena ta. 8E OMWAMI, oleshele abandubo Isiraeli khushitiso shino, aba wanunula; ne orafuchiilila amabanga komundu oubula eshikha okhutong'aho hakari wabandubo Isiraeli ta. Kho balaleshelwa akamabanga ako. 9Nilwo olwa olarusia amabanga komundu oubula eshikha hakari weenywe, olwa olakhola akali habwene imbeli wOMWAMI.
Akakhoyeele okhukholelwa abakhasi abahambwa mwihe
10Olwa oba norula okhuseera abasukubo lihe, OMWAMI Nyasayewo nabahaana mumakhonoko, nawe nobayila mumbambe, 11ne nolola mubahambe abo omukhasi weshiiso, nomwikomba, niwenya okhumuteeshia, 12kho omuleere hango munzuyo; naye abekwe omurwe, nateetwa amatere; 13yeefwalule tsingubotsie tsiobubohe, amenye munzuyo niyeekhuula samwana nende nyina omwesi omulamba; mana olunyuma lwa ako omuteeshie, noba omusaatsawe, naye naba omukhasiwo. 14Ne olunyumakhwo, noba noramuchama ta, omuleshe atsie aha yeenya; ne oramukusiakhwo amapeesa, kata okhumukholela slinga omukula ta; shichila omwonooneele.
Amalako khukomwana owibulwa owambeli
15Omundu naba nali nabakhasi babili, mulala naheelwa ne oundi nakiywa, ne nibeebula abaana ouheelwa noukiywa bombi; ne omwana owibulwa wambeli nali wa oyo oukiywa; 16kho khunyanga yilia olwa alakabulila abaanabe obulaame bwebindu ebia ali ninabio, aleshe okhumukhola omwana womuheelwa abe oweebulwa wambeli mushilenje shiomwana womukiywa, ouli oweebulwa wambeli, ta; 17nebutswa afuchiilile oyo oweebulwa wambeli, omwana wa oyo oukiywa, namuheelesia shikhabili omukabo kwabiosi ebia ali ninabio, okhuba niye olubu Iwetsingufutsie; obukhulundu bwobwibule nobubwe.
Omwana emukhayikhanu oweinduli
18Omundu naba nali nomwana omukhayikhanu oweinduli, ourahulila amakhuwa kasamwana kata amakhuwa kanyina ta, ne kata olwa bamukuuma shiabahulila ta; 19kho samwana nanyinamwana bamuhambe, bamurusie bamuyile ewabakofu belitaala liabwe, haluyia; 20nibasunjila abakofu belitaala bari Omwana weefwe uno nomukhayikhanu oweinduli; shiakhuhulilangakhwo ta; nomulangu khandi omumeesi. 21Mana abasaatsa bosi belitaala liabwe bamulase namachina afwe; nilwo olwa mularusia libii elili hakari weenywe; ne Isiraeli yosi yilahulila, niyiria.
Amalako kandi nakandi
22Ne omundu naba nakholile eshionoono eshikwanile afwe, niyeerwa, nomufunga khumusaala, 23omulambokwe kuleshe okhukonayo eshilo khumusaala ta, ne omuyabile inyanga yeneyo okhuba oufungwa ali mushilaamo shiobubii imbeli waNyasaye; mbu oleshe okhwonoonia eshialoshio eshia OMWAMI Nyasayewo akhuha shibe obulaame.
Oluluyia Union Version © Bible Society of Kenya 1975