Luc 2
2
Duburu du Yesu
1Gigumbi gine, Sesare Auguste akuvege dinyange di gurange batu botsu be bulongu bu yandi yibange kanangu. 2Murangunu wurege wuvyoge gu Rome, gigumbi gi Kirinise yibange gidyeti gi Syri. 3Batu botsu bendange gwerendisu mwane mwane gu yadi yibe kage tsyawu. 4Sosefe gwandi arambuge gu Nasarete yadi yi Galilé, akwende gu Beteleme gu burilu Davide yadi yi Sudé, mba ayibange mwisi tsapele yi Davide. 5Nonge akwende gwerendisu ne Mari mugetu wu yandi mbe mabande gu dyonge. Ayibange ne dimi. 6Ve babilange gu Beteleme gigumbi gi Mari gigubure mbe gyakike. 7Negubure mwane dibagele, mwane andi wurege. Ne gumupyete ne gifu, ne gumulatse gu givange mbare gusabe mbure gu ndagu tsibeni.
Yanze yalabene ne beraritsi be tabe
8Gu ginange gine gya mosi, gubange batu be bandekenange tabe gu kumu. Be mogange mebeti motsu gu gubandekene migambe myawu mitabe. 9Yanze yi Nyambi ne gubevudugile giyalele gi Nyambi ne gubetsyenge yawu botsu, begangu nemune wome. 10Yanze negubambile re: «Nuyadume, nzeruge guse nubegile tsangu boti yi guvege mutu yandi wotsu mugangu: 11Dibeti dinemuni, gu yadi yi Davide nwaburilu mugobutsi Kriste Fumu enu yi Nyambi sesale. 12Labanu ndimbu yi yenu nugumuyabile, nugweragesenu mwane remburu wu pyetu ne gifu wulatsu gu mbure yi gayili bibulu.» 13Vane ne vane gigondu gigori gi byanze bi Nyambi gikuse sobegene ne yanze yirege, ne gudumisange dine di Nyambi re: 14«Diboti gu Nyambi yi gu yulu. Polu gu batu be yandi garondi mu butambe!»
Beraritsi be tabe bagwende gu Beteleme
15Byanze bi Nyambi negugabuge gu yulu. Beraritsi be tabe bambesenange yawu ne yawu re: «Gwendyanu kwangene gu Beteleme, gwelabe dyambu di Fumu madurigitse.» 16Bende mbangu mbangu, beragesenu Mari, Sosefe ne mwane wu latsu gu mbure yi gayili bibulu. 17Negumane mwene, bambile mutangu wotsu wu yabisu yawu gukyelu mwane wune. 18Botsu bulu gimage gine ne beraritsi be tabe bekumame. 19Mari abandekenange mambu motsu mane gu murime andi akume pikilange. 20Beraritsi be tabe bekugabuge ne gwene dumisange dine di Nyambi negumwimbilange gukyelu mutangu wotsu wu vyoge kaneve bulilu.
Yesu mavegu dine
21Wisi ginane ne guduke, mwane tabulu pure nziye. Avegu dine di Yesu, dine di yanze amuvege nesi Mari agube ne dimi.
Yesu rigitsu gu ndagu Fumu
22Gigumbi gi tsufu tsi busomfi bu Mari neguvyoge, nevu direndilu mu mugage Moyise. Sosefe ne Mari bemubege gu Serusaleme gwemusambule mu mekake me Fumu. 23Nevu direndilu mu mugage Fumu: «Mwane wotsu wurege wu dibagele agavegu Fumu nonge akumudyanzile.»#2.23 Tangune Exode 13.2,12,15 24Neguse vege pagu tsi mekunde mebeyi nesi mebembi mebeyi me gegi nevu direndilu mu mugage Fumu#2.24 Pagu yi busomfi bu Mari Levitique 12.1-8. 25Gu Serusaleme, gubange mutu wu nengungu re Simewu. Mutu wune ayibange asungeme, agobisange Nyambi. Avingilange ne gitu tugu yi Kriste mugobutsi wu guse gobule Iserayele. Dinyuni Diboti dibange nandi. 26Abigisu ne dinyuni diboti re: «Nesi agufu agurelabe Kriste mugobutsi wu tindu ne Nyambi.» 27Simewu ayende gu ndagu Nyambi gu yandi begisilu ne dinyuni, ve biburu bi Yesu gwandi bebegile mwane awu gwe vage me mugage Fumu agagwivuli gukyelu andi. 28Simewu ne gunangule mwane mu mekake mandi akugabusile Nyambi diboti akwambile re:
29«Sige Fumu, sise mudyanzitsi agu yendi pembi ne polu nevu musamwagu wagwambilili.
30Mba misu mami me malabe mukani,
31Mukani wu ndyabeni wuse kinze ve misu me melongu motsu,
32yandi giyalele gi batu botsu, didume di bane be Iserayele.»
Dumbu du Simeon
33Tayi ne nguye yi Yesu be mamange mambu me Simeon yambilange gukyelu mwane awu. 34Simeon bevege mule ne gwambile Mari nguye andi re: «Mbili batu gu Iserayele beguberuge, bemosi begurambuge gukyelu mwane agu. Agube gwandi ndimbu yi Nyambi yi gutumise batu page, 35nonge pikile tsi mbili mirime tsi kuyabegenu. Ndyabeni Mari mukengu agu wugube munongumosi ne mutu wa tsoku dibambu gu murime.»
Anne mubigitsi
36Gubange gwandi mubigitsi mugetu wu nengungure Anne mwane Fanuel, wu gifumbe gi Aser mbe amanune. Amane mipume mine gumireru gu dyonge ne mulumi andi. 37Asale mukwili mbe ake ne megumi ginane gi mipume ne mipume mine. Akutsagenange kagu ndagu Nyambi. Akudyanzilange Nyambi nyangu ne dibeti negusindilange nzale, ne guvyosange gigumbi mu dulembu. 38Anne gwandi neguruge gigumbi gye gyamosi gi Simeon avegilange mwane mule. Akudumisange Nyambi ve piti batu, akuyabisange Yesu gu batu botsu be vingilange mukani wu Serusaleme.
Begabuge gu Nasarete
39Negumane vage motsu me rendu mu mugage Fumu, Sosefe, Mari ne mwane begabuge gu Galilé gu yadi awu yi Nasarete. 40Mwane akukubugange, akudyolange, akubange abase ne pikile tsi bundumbe. Gyese gi Nyambi gibange nandi.
Yesu negube ne digumi di mipume ne mipume mibeyi akwingene gu ndagu Nyambi
41Biburu bi Yesu bendange mipume myotsu gu Serusaleme gigumbi gi mumengu Pake. 42Yesu ne gube ne digumi di mipume ne mipume mibeyi. Bekupande gu Serusaleme nevu bavagili ne mbetsi gu mugulu awu. 43Mumengu ne guvu, Sosefe ne Mari begabuge tumbe Yesu asale gu Serusaleme biburu beseyabe re amasale. 44Sosefe ne Mari bepikilange re mwane ayi mugilonge gibe mbatsi be muvevilu ne biburu. Bemane muse ne pundu mu nzile negusikeme, bemukebe. 45Tumbe negulabe re besamweni, bekunde gabuge gu Serusaleme gwene mukebe. 46Negumukebe mu tsufu yireru bemusupugile gu ndagu Nyambi metsagene vegari benenzitsi be migage negubulilungu, negubivulange ngoku. 47Botsu bemulungu nevu yambililange bekumame duyabu dwandi ne gyagutsi gyandi gi ngoku. 48Biburu negumusupugile bekumame. Nguye andi ake mwambile re: «kilabe mwane ami, dibandu gye wuseduvagile nane? Tayagu ne menu dusekukebange ne mirime mileluge.» 49Yesu abagule re: «Agye nwakebili? Nusayabi re bidyanzu bi taye ami nyavagi?» 50Tumbe beseyulu di yandi bambilange. 51Sige asunde nawu gu Nasarete akubededugilange. Nguye andi kubadekenange mambu motsu mane gu murime andi. 52Yesu akubugange ne pikile tsigobe, mu meyuru, ne gyese vewusu Nyambi ne vewusu batu.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES