Luc 1
1
Dibandu di gilombi
1Mundumbe Tyofile, mbili batu bemange gurende gilombi gi mambu me monyu ne dufu du Yesu nevu givyogile ve gari awu. 2Batu bane berende nevu bulilu ne mbeyi tsilabe ne misu pakile ve dibandu. Yawu botsu bekukaluge bedyanzitsi be Nyambi. 3Re dibandu menu gwandi nzeronde kebe dikengi nevu divyogile pakile ve dibandu di gilombi gi duburu du Yesu. Nzekurendile gilombi gine dikengi nevu mambu mane mevyogile. 4Nonge wukuyabe re mambu me ndyayu wuse nenzu mambu me ngenze.
Tsangu yi duburu du San batiste
5Gigumbi gi Erode ayibange kanangu gu bulongu bu Sudé, gubange muvegitsi pagu wunengungure Sakari wu dibundu di gidyanzu di Abia. Mugatsi andi gwandi ayibange mwisi tsapele yi Aaron dine dyandi Elisabete. 6Yawu botsu babeyi babange besungeme ve wusu Nyambi begobisange migage myotsu mi Fumu. 7Tumbe besabange ne bane mba Elisabete ayibange gingume yawu botsu babeyi mbe banune. 8Wisi mosi Sakari avagange gidyanzu gyandi gu ndagu Nyambi. Mba gigumbi gi dibundu dyandi. 9Sakari akusalu ne gingane nevu bevagilange ne mbetsi gu mugulu awu gwingene gu ndagu Nyambi gu mbure yi nyenzilungu make me gigagange. 10Gigondu gyotsu gi batu gibange gukane mu dulembu gigumbi gi Sakari anyenzilange make me gigagange. 11Kavane, Sakari negwingene gu ndagu Nyambi yanze yi Fumu yikumu vudugile tsutsudu meteli ve mebagele me gitale gyanyenzilu make me gigagange. 12Sakari negulabe yanze yine, akutsyemugilu pikile akugangu ne mune wome. 13Tumbe yanze negwambile re: «Sakari, wuyadume. Nyambi amagwagule ndembu agu, mugatsi agu Elisabete agukuburile mwane dibagele wugumuvege dine di San. 14Agube gu mbugyagu dibandu di mugangu neni. Mbili batu gwandi begube ne mugangu ve aguburilu. 15Mba agube mutu muneni ve wusu Nyambi. Asemuvege mugage re asagunu melamu magotsu. Nesi aguburu agubegisu ne Dinyuni diboti. 16Agugabuse mbili bane be Iserayele gu Fumu Nyambi awu. 17Aguregile ruge munongu mosi ne mubegitsi tsangu yi Nyambi, ne dinyuni ne ndure gere Elie mubigitsi agugabuse mirime mi betaye gu bane, agusanze mutsageninu wu batu be sane digobe nonge bekuvage mambu me Nyambi garondi. Agutsonzige mirime mi batu nonge vegurugile Fumu, akuse beragesenu ne mirime mi boti.» 18Sakari negwambile re: «Menu, nya nune. Mugatsi ami gwandi, gigumbi gi gubure gyavyoge. Avane niguyabile re diwanyambile dine dyambu dingenze?» 19Yanze negumwagule re: «Dine dyami Gabriel, ni meteli ve wusu Nyambi gu mudyanzile, nzerumu gusekubegile tsangu yiboti. 20Yulu, wu gube dibabe kwange ne wisi wu mambu mane me gulabene. Mba wusasinge dimenu nzekwambilile mba digulabene gigumbi gi Nyambi yandi beni setsonzige.» 21Gigumbi gine, gukane ndagu Nyambi, bumongu bevingilange Sakari, bemamange dibandu di agatsingili gu gari ndagu Nyambi. 22Neguvuduge, asekunde rungule bambile. Batu neguyabe re aselabe gimage gu gari ndagu Nyambi. Akubambilange kane bingane mba mbe ake dibabe.
23Ve tsufu tsyandi tsi gundyanze gu gari ndagu Nyambi tsivilu, akugabuge gu mbu gyandi. 24Mwe gigumbi neguvyoga, mugatsi andi Elisabete negube ne dimi, akwe kuswegange ne dimi di migweli miranu ake kwekwambilange re: 25«Labe, di Nyambi amapage, nzibange ne gisoni ve gari batu bami mba nzaburange, gere Fumu ma kengisa amagusule gisoni gyami.»
Tsangu duburu du Yesu
26Dimi di Elisabete negube ne migweli misyamenu, Nyambi akurume yanze Gabriel, gu dimbu di Nasarete di yadi Galilé. 27Gumbu numbe yise betsi yabe bebagele yabandu gu dionge ne mutu wa nengu re Sosefe. Wu tsapele yi Kanangu Davide. Dine dinumbe eni Mari. 28Yanze yine negwingene gumbu gyandi, negumwambile re: «Nyakuvegi mbulu Mari, yibe ne mugangu, ndiayu wuse vegu gyese. Fumu ayi nagu.» 29Mari akutsyemugilu pikile gukyelu dyambu di mwambile yanze. Negu kwekwivule re: «A dibandu gye agapegili mbulu munongu wune?» 30Yanze ne gumwambile re: «Wuyadume, Mari, mba wadile gyese ve wusu Nyambi. 31Yulu wugube ne dimi, wugubure mwane dibagele wugumuvege dine di Yesu. 32Agube mundumbe. Agunengu re: Mwane Nyambi Yulu. Nyambi gumuvege gipu gi budumbe bu Davide mukoku andi. 33Agube kanangu gitsapele gi Iserayele mwendu ne mwendu. Bundumbe bwandi bugube peke ne peke.» 34Mari negwambile yanze re: «Niguyabile re nine dimi tsye? Nzebetsi yabe bebagele.» 35Yanze negumwagule re: «Dinyuni diboti diguruge gu ndyayu, ne ndure yi Nyambi Yulu yi gukufugemine ne gidunze gyandi. Re dibandu mwane wu rereri wu ndyayu gubure agunengu re mwane Nyambi.» 36Yulu, Elisabete giburu gyagu, yandi gwandi ake ne dimi. Agubure mwane dibagele gu bununu bwandi awuse nengungu re gingume. Ayibili ne dimi ake ne migweli misyamenu. 37Mba Nyambi asa ne dyambu di yandi galembu. 38Mari negwambile re: «Ni mudyanzitsi Fumu. Nyambi a pagi nevu wusegwambilile.» Yanze ne gumusise.
Mari magwende gwelabe Elisabete
39Gigumbi gine gyamosi, Mari negurambuge negwende mbangu mbangu gu gyari gi mikongu, mi dimbu digu gari yadi Sudé. 40Neguvuduge, Mari akwingene gu ndagu Sakari neguvege Elisabete mbulu. 41Elisabete negulu mbulu yi Mari, mwane wugu difumu negukognuge. Elisabete negubegisu ne Dinyuni diboti. 42Akwamuge veveni re: «Mari, wavegu mule ve gari begetu botsu. Mwane wu gu difumu dyagu gwandi a ne mule. 43Adise pakile re tsye di nguye Fumu ami arugi kwange gu menu? 44Ne gungenze nyayabe re wu nguye Fumu ami, mba gigumbi gi nzegulilu mbulu agu, mwane gu difumu asekognuge ne mugangu. 45Yibe ne mugangu mba wutsibe ne gitu, re Fumu agudyanze motsu me yandi asekwambile.»
Dumbu du Mari
46Mari negwambile re:
Nyagobisi Fumu. 47Ni ne mugangu gukyelu Nyambi mugobutsi ami. 48Mba amagengise mudyanzitsi andi wusa ne musumbu mu bulongu. Melale me guruge gu nzime ami me gukobise. 49Mba Givange vange amavage mambu meneni gu menu, dine dyandi di rereri. 50Gigebe gyandi gi gunege mu melale motsu me batu ba mudumi. 51Nyambi ne ngudu andi arinise mu mbure tsyotsu batu babange ne pikile tsibi tsi gukwe rigitse, gu mirime myawu. 52Amabonduse batu babe ne menyange meneni. Apandise batu bakwesunzi. 53Nyambi abungule batu babe ne nzale. Bisine asebevege ke pagere givave. 54-55Nyambi maruge guse gwamuse batu bandi be Iserayele. Atunge pangeni ne mikoku myetu, ne Abrame ne melale mandi motsu, re aguruge guse gwamuse bedyanzi bandi bane be Iserayele. Aselibegene pangeni andi, yi gigebe gi mwendu ne mwendu.
56Migweli mireru mi Mari mane gumbu Elisabete negusuke, Mari akugabuge gumbu gyandi gu Nasarete.
Duburu du San baptiste
57Gigumbi gi Elisabete gi gubure ne guduke, akubure mwane dibagele. 58Batu be dukeseni nandi ne biburu byandi bekulu re: «Fumu amamurigitse gigebe gyandi.» Yawu botsu bekube ne mugangu neni. 59Mwane negudugise tsufu yine ne guyireru, mutsufu ginane, batu bekeruge guselabe neve batabulili mwane pure nziye. Biburu bimosi beronde muvege nduge yi Sakari dine di taye andi. 60Tumbe nguye mwane negwambile re: «Nesi agunengu re San.» 61Bemwambile re: «Gu gitsapele gyagu gusa mutu ne nduge yine.» 62Bevagange bingane gu gyari gi Sakari, bekuyabe nduge yandi garondi vege mwane. 63Sakari negwivule ne gingane girini gi timbi ne musunde pembi negurende re: «Dine dyandi San.» Batu botsu negumame. 64Vane ne vane, munu andi negutsibuge dulimi dwandi negunamuge siga ayambile dikengi. Akokisange dine di Nyambi. 65Vane, batu botsu betsagenange beli nandi bekugangu ne wome Nyambi, ne betsagenange gwandi gu mikongu myotsu mi Sudé, bekwambesenange mambu motsu neve mese vyogile. 66Tumbe botsu bulu mutangu wune, beku pikilange gu mirime myawu re: «Mwane wune agube tsye?» Negungenze ngudu Fumu yi nandi.
Dumbu du Sakari
67Sakari taye andi negubegisu ne Dinyuni Diboti nonge akuyabange mambu ma rugili gu Nyambi negwambile re. 68Didume gu Fumu Nyambi yi Iserayele mba ama bambene ne bane bandi gusebobule. 69Nyambi ama dutindile mugobutsi guse gobule bane be Iserayele, be gitsapele gi kanangu Davide mudyanzitsi andi. 70Nyambi ayambile bebigitsi bandi mbetsi, bebigitsi gwandi bekwene nenze musamu wune gu batu botsu re: 71«Mugobutsi wuguse dwobule gu batu babi, ne botsu baduvini.» 72Nyambi asevage motsu mane gugurigitse gigebe gyandi gu tayi tsyetu, aselibegene pangeni yi atunge nawu. 73Neve atunge pangeni ne Abrame mukoku etu. 74Aleve re pasi ama dwobule mu mekake me bevinitsi betu, dusakunde gube ne wome gudyanzile Nyambi.
75Tsufu tsyotsu tsi monyu etu gutsi durigitsi anu wuboti wu Nyambi garondi, dugugobise migage myandi. 76Mwane ami, batu be gukunenge re mubigitsi wu Nyambi Yulu. Mba wugwendange ve wusu Fumu gwetsonzige mirime mi batu nonge beku singe Fumu. 77Wugutsonzige mirime mi batu nonge bekuyabange re: Nyambi agubobule, agubunzule bitsimbu byawu. 78Nyambi etu abase ne gigebe, ne girondu. Agudubangisile giyalele gi Nyambi munongu mosi ne giyalele gi dyumbi gu yulu. 79Neve dyumbi ve dyavudugili dyaguse sanze diviseme. Mugobutsi gwandi ve agurugile agusegwamuse batu batsageni gu diviseme, bagulu wome gufu akuberigitse neve begubegilange monyu yi pembi ne polu. 80Gigumbi neguvyoga, mwane negukubuge akudyolange mu dinyuni. Atsagenange kagu kumu kwange ne wisi wu yandibeni akwerigitse ve wusu bane be Iserayele.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES