Luc 3
3
Ginenzitsi gi San batiste gi musamu Nyambi
1Gigumbi gi Tibere yibange kanangu yi Rome gu digumi di mipume ne mipume miranu mi gubyale gwandi, Ponse Pilate yibange ngowu yi Sudé, Erode ngowu yi Galilé, mwane taye andi Filipe ngowu Iture ne Trakonite, Lysanyas ngowu yi Abilene. 2Ane ne Kayife babange bivunde bi bevegitsi be pagu. Musamu Nyambi wu kwambilu San mwane Sakari gu kumu. 3San akwene nangange musyengi wotsu wu mugogu wu Surdin, gwene gwambilange re: «sanzanu mutsageninu putigwane gu mambe nonge Nyambi akubunzule bitsimbu byenu.» 4Nevu direndilu mu gisangumu gi mubigitsi Esayi:
Dyufi di mutu wa gwamugi gu kumu:
«Kinzanu mirime myenu sanzanu mutsageninu.
5Mudongemine wotsu wugu basisu,
mikongu myotsu migu bwayimisu.
Nzile tsi rekeme, tsi ne meroku tsi gusungeme,
nzile tsi yunge tsi gunonzu.
Munongumosi pasi dwavingili kanangu dwakinzi dikengi nzile yi aguvyogile nesi aguruge.
6Mutu yandi wotsu agulabe mukani warugili gu Nyambi.»
7San akwambilange batu botsu berugange guse batisu nandi re: «Dibure mbisi, nyese nulonge gurine kabu Nyambi ya rugi ne wusu ne bateme? 8Dyanzanu mambu ma labisi re mutsageninu wenu wakaluge, nevu muri wa buri milunde miboti. Nuyakwekukokisange yenu beni re “mukoku wetu Abrame.” Mbare nyanwambile re nesi memani mame Nyambi abenze mekaluse bane be Abrame. 9Yabanu ngenze re pivi ya tabuli panzigu yike ve dibandu di muri. Muri wotsu wusaburi milunde miboti wugutabulu wukoku gu ruvi.»
10Batu bivule San re: «A yetu duvagi tsye?» 11Abagule re: «Mutu wune bidwaru bibeyi avegi gimosi mutu sandi. Awu ne biguye avagi monongumosi gwandi.»
12Bebolitsi be lepu gwandi beruge gusebatisu bekwivule San re: «Mulonzi, a yetu duvagi tsye?» 13Negubagule re: «Nuya vyosisile durangu dunwavegu dinyange di gwivule.»
14Gori gwandi beku mwivule re: «A yetu duvagi tsye?» Abambile re: «Nuyapatule batu doli ne ngudu, ne gufure tumbe labanu mugangu doli tsi banuvegi.»
15Bumongu bubange gugivivu ne gitu bepikilange re mandi San re Kriste mukani wube vingilange. 16San negubambile re: «Menu nyanubatisi gu mambe. Tumbe guruge garugi wakibi menu ngudu. Nzabenze gube nesi muvige andi wu gunyangule mukudu pondu tsyandi. Yandi re guse nubatise me Dinyuni Diboti negu ruvi. 17A ne gyevi gyandi ve dikake gu gupasule biriri ne milunde miboti. Tumbe agunyenze biriri gu ruvi dusatsimi.»
18Are nane San alongilange musamu boti mu bulongu ne mbili ndongi tsimosi. 19Gube gigumbi gi Erode ngowu yi Galilé ne gusyembu ne San gukyelu Herodias mugatsi mwane taye andi wu yandi bonge gu dyonge negukyelu mbili mambu mabi me yandi kinzange. 20Erode akukunde vage dyambu dibi di gwingise San gu nzugu.
Bateme yi Yesu
21Bumongu bwotsu ne gubatisu, Yesu gwandi ne gubatisu. Gigumbi gi yandi lembilange Nyambi, nzambi ne gutsibuge. 22Dinyuni diboti dikumusundile ne gidimu gi bongene ne dibembi. Dyufi di Nyambi dikulunu gu nzambi re: «Ndyayu wu mwane murime, gundyayu nyaveri girondu gyami gyotsu.»
Bukulu bu Yesu
23Yesu mbekene gindande gi megumi mereru me mipume ve yandi pakilile gidyanzu gi gwene nenze musamu boti. Ayibange neve dupikililange re mwane wu Sosefe. Sosefe mwane wu Heli. 24Heli mwane wu Matthat. Matthat mwane wu Levi. Levi mwane wu Melchi. Melchi mwane wu Jannai. Jannai mwane wu Sosefe. 25Sosefe mwane wu Mattatias. Mattatias mwane wu Amos. Amos mwane wu Nahoum. Nahoum mwane wu Esli. Esli mwane wu Naggai. 26Naggai mwane wu Maath. Maath mwane wu Mattatias. Mattatias mwane wu Semein. Semein mwane wu Soseke. Soseke mwane wu Soda. 27Soda mwane wu Yohanan. Yohanan mwane wu Resa. Resa mwane wu Zorobabel. Zorobabel mwane wu Kealtiel. Kealtiel mwane wu Neri. 28Neri mwane wu Melki. Melki mwane wu Addi. Addi mwane wu Kosam. Kosam mwane wu Elmadam. Elmadam mwane wu Er. 29Er mwane wu Yesu. Yesu mwane wu Eliezer. Eliezer mwane wu Jorim. Jorim mwane wu Matthat. Matthat mwane wu Levi. 30Levi mwane wu Simewu. Simewu mwane wu Suda. Suda mwane wu Sosefe. Sosefe mwane wu Sonam. Sonam mwane wu Eliakim. 31Eliakim mwane wu Melea. Melea mwane wu Menna. Menna mwane wu Mattata. Mattata mwane wu Natan. Natan mwane wu Davide. 32Davide mwane wu Sese. Sese mwane wu Obed. Obed mwane wu Booz. Booz mwane wu Sala. Sala mwane wu Nachon. 33Nachon mwane wu Amminadab. Amminadad mwane wu Admin. Admin mwane wu Arni. Arni mwane wu Herson. Herson mwane wu Peres. Peres mwane wu Suda. 34Suda mwane wu Sakob. Sakob mwane wu Isaac. Isaac mwane wu Abrame. Abrame mwane wu Tera. Tera mwane wu Nahor. 35Nhor mwane wu Seroug. Seroug mwane Reou. Reou mwane wu Peleg. Peleg mwane wu Eber. Eber mwane wu Kela. 36Kela mwane wu Kenan. Kenan mwane wu Arpaxad. Arpaxad mwane wu Sem. Sem mwane wu Noe. Noe mwane wu Lemek. 37Lemek mwane wu Matusalem. Matusalem mwane wu Henok. Henok mwane wu Yered. Yered mwane wu Malalel. Malalel mwane wu Kenan. 38Kenan mwane wu Enos. Enos mwane wu Sete. Sete mwane wu Adame. Adame mwane wu Nyambi.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES