Sira 51
51
Oruhoya rw'esiimi
1Waitu Rugaba Omukama ndakusima,
nkusingize iwe Ruhanga omurokozi wange.
Ninsiima eibara lyawe,
2ahakuba oba mulinzi wange, mujuni wange.
Okankiza ahali rufu,
wanyihya aha mutego gw'orulimi orulega banu,
wanyihura aha munwa gugamba ebishuba.
Okanchungura aha babaire banzinzire,
3aha rw'obungi bw'obuganyizi bwawe
n'obuhango bw'eibara lyawe
wandokora aha balikunena amaino baraliire kundya.
Okankiza aha mikono y'abaraliire kunyita,
wanyihya aha naku ezabaire zintangire.
4Okanchungura aha muliro ogwabaire niguntuhikanyia
gunyemire buli rubaju,
wanyihya omu muliro ogwo nabaire ntahembire.
5Okanyihya okuzimu omu rubunda rwa Hadesi,
wankiza aha rulimi rw'omushegu orugamba ebishuba.
6Okanchungura aha rulimi rubi orulega banu aha Mukama.
Nkaba ndaliire kufa,
nailiire Hadesi okuzimu.
7Bakantangatanga embaju zona,
n'ow'okunjuna tiyazokire.
Naramiiliza abantu kabanjuna,
tiyazokire n'omoi.
8Ahanyuma waitu Mukama, naijuka obuganyizi bwawe,
n'ebyo wakozire orwa karai
naijuka okw'ojuna abakushuubiira
okabaihya omu mikono y'abisha babo.
9Nikwo kukutakira nyemire omu nsi,
nakushaba k'onyihura ahali rufu.
10Nkatakira Omukama Ishe Rugaba rwange,
atannagirana omu biro ebyo ntangirwe,
omu kanya ako ntaina wa kunjuna
ow'eikuru anyemire kubi.
11Ndiikara nsingiize Eibara lyawe,
nkuhaisilize ninkusiima.
Enshara yange ekahulirwa,
12kuba okanchungura ahali rufu,
wanyihura omu matangwa gabi.
Aha rw'ekyo ndakusiimaga, nkusiingizega,
n'Eibara ly'Omukama ndalihaisilizaga.
Okuhiga Bumanyi
13Orwo nabaire nkyali muto,
ntakatandikire ngendo zange,
kanabaire ninshoma enshara
nshaba muno kubona Bumanyi.
14Ndi Rwensinga nirwo nashabaga kumuhabwa,
mara ndiguma muhigire kuturuka aha nzindo.
15Kwema aha zabibu kwakya kugoba aha kuhisa,
omutima gwange gwamushemelerwaga.
Ekigere kyange kyalibataga omu kahanda akagorogokire,
kwema ndi musigazi namulibataga omu bigere.
16Nkatega okutwi kake namubona,
nashanga nayegire bingi.
17Okwega okwo kwantwara omu maisho,
mara nikwo ogwo aha abantu Bumanyi ndimuha ekitinwa.
18Nkamaliliza kuhondera entwaza za Bumanyi,
naitanira ebirungi,
mara nikwo ntalishonara.
19Bumanyi nkamuzimatira,
n'omu mirolere yange nayelindaga muno.
Emikono nkagimukya eiguru,
nachura kubona ntalikumanya Bumanyi ogwo.
20Omwoyo gwange nagwolekezaga ahali Bumanyi,
nayelinda obufu namubona.
Kwema obubere orwo namuboine akampa okushobokerwa,
orw'ekyo tindinagiranwa.
21Nalibaliibwaga aha mutima kumuhiga,
nikwo naboine ekirungo.
22Omukama akampa egabo y'okugamba,
mara nikwo ndigikoza kumusingiza.
23Mungobe inywe abatamanya,
mukambike omu shule yange.
24Kubaki nimugamba okwo ebintu ebi mutalikubimanya,
mara mwina eiliho lingi muno?
25Nkabagambira nagira nti,
Ebintu ebi mwakubibona mutagizire mpiya.
26Mwinike ebikya mwege;
Bumanyi nimwija kumushanga haihi.
27Mweboneire n'amaisho ganyu okwo nyegire bike muno,
kyonkai ebyo mboine nibimmara.
28Mugire efeza nyingi mbegese,
kyonkai ebyo ndikubegesa bilibabonesa ezahabu nyingi.
29Mushanduke aha rw'obuganyizi bw'Omukama,
kandi okumusingiza kutalibakwasa nshoni.
30Muhikye oburagirwa bwanyu
akanya katakagobire,
na Ruhanga orwo akanyake kaligoba
abahe erongoro yanyu.
Ruhaya DC Bible © Bible Society of Tanzania, 2001.