Baruku 1
1
Enyanjura
1Eki kitabo kya Baruku eya Neraya, Neraya eya Mahaseya, Mahaseya eya Zedekia, Zedekia eya Hasadia, Hasadia eya Hilikia. Akakihandikira omu nsi ya Babiloni 2aha kiro kya mushanju, omu mwezi gwa katanu gw'omwaka gwa katanu Abakalidayo barugire kukwata Yerusalemu n'okugichumika omuliro. 3Ekitabo eki Baruku akakishoma n'eiraka lihango nakishomera omukama wa Yuda, Yekonia eya Yehoyakimu n'abantu bona, 4n'abashaija ebikonge, n'ab'oruganda rw'omukama, n'abagurusi, abake n'abahango, bona okwo bakaturaga Babiloni bwatana aha Mwiga gwa Sudi.
5Aho kabahuliire ebigambo ebyo, balira, basiiba, batakira Omukama; 6bagira n'empiya buli omoi yagira okwo yabaire nashobora. 7Empiya ezo bazitweka Yerusalemu owa Yehoyakimu, Omukuhani Nyamukuru mutabani wa Hilikia, Hilikia eya Shalumu, bazimutwekera wenene n'abakuhani abandi n'abantu bona abo yabaire ainabo omuli Yerusalemu omwo. 8Kikaba kili kiro kya 10 ky'omwezi gwa Sivani. Baruku akwata ebijwaro bya Rwensinga y'Omukama ebyabaire binyagirwe omwo abigarura Yuda. Ebikwato ebyo bikaba bili by'efeza, bihesirwe Zedekia eya Yosia omukama wa Yuda, 9orwo Nebukadineza omukama wa Babiloni yabaire yakwete Yekonia n'abatwazi n'embohe, n'abaisherukare n'Abayahudi bona yabatwete endore Babiloni.
Ebarua ya Yerusalemu
10Embaga ekahandika ebarua negamba eti, “Twabatwekera empiya muziguze ebihongo by'okwokibwa n'ebihongo by'enyatano y'amafu n'obunuma. Muhige n'ekihongo ky'ensano, byona ebyo mubitambire Omukama Ruhanga waitu aha altare. 11Mushabire Nebukadineza omukama wa Babiloni, na Berishazari omutabani barore omu nsi omu baramuke. 12Naichwe Omukama atutunge amani, mara atukyanure, kandi tugire emilembe omu butwazi bwa Nebukadineza n'obw'omutabani Berishazari, tubakolere ebiro bingi mara tubaganje. 13Kandi mutushabire aha Mukama Ruhanga waitu, ahakuba tukamufakalira. Kugoba mwaha akyatunigaliire, takatugaruliire. 14N'ekitabo eki ekyo twabatwekera mukishome, kibasindike kwechuza amafu ganyu omuli Rwensinga y'Omukama, aha biro bikuru omu birumo ebiragiirwe.
Okwechuza amafu
15“Mugambe muti, ‘Omurungi aba Mukama Ruhanga waitu. Kyonkai ichwe kuhika kir'eki enshoni zikyatubunzire aha maisho, kutyo n'abantu ba Yuda n'aba Yerusalemu, 16n'abakama baitu n'abatwazi baitu, n'abakuhani baitu, n'abarangi baitu, nangu na balat'enkurw'ichwe tukabashonaza 17enshonga tukafakalira Omukama. 18Omukama Ruhanga waitu titwamuhuliire. Ebyo yagambire titwabihuliire, n'ebiragiro ebyo yatuhaire titwabikwete. 19Kwema kiro ekyo Omukama yaihire balat'enkurw'ichwe omu nsi ya Misiri kuhika kir'eki, tutura tutalikuhulira Mukama Ruhanga waitu. Nitujaramuka, orwo tutalikuhulira ebyo yaturagiire. 20Kityo kugoba mwaha tukyateirwe enaku n'omuraamo ebyo Omukama yagambire omu kanwa k'omwiruwe Musa orwo yaihire balat'enkurw'ichwe omu nsi ya Misiri, kutuha ensi elikusheshekana amata n'obwoki. 21Byona ebyo Omukama Ruhanga waitu yaturagiire omu kanwa k'abarangi abo yatutwekeire titwabihuliire. Ichwena, buli omoi akagira omutima gubi yakora okwo alikwenda, yakolera baruhanga abandi n'okufakalira Omukama Ruhanga waitu.
Ruhaya DC Bible © Bible Society of Tanzania, 2001.