Sira 50
50
Simoni eya Oniasi
1Simoni Omukuhani Nyamukuru eya Oniasi,
akaba ali mwebembezi w'abarumuna,
mara kyebugo ky'eihangalye.
Omu burorabwe akashubamu Rwensinga yagishemeza,
yamara yagizingoza eboma kugilinda.
2N'iwe yayombekire emisingi
ey'oburai kushaaga kabili oburai obwa buli kiro ey'eboma
zirai ez'okusiika Rwensinga egyo.
3Omu makiroge nirwo eiziba ly'amaizi lyalimirwe,
obuzingora bwalyo likaba nilishusha enyanja.
4Akahiga okwo arakiza eihangalye ababisha batabaita,
ekigo yakizingoza enkuta z'okukilinda
kutanga ab'okukibunda.
5Akaba aina ekitinwa atai orwo embaga yamuzingoraga
arugire omu kiikaro kya Rwensinga!
6Yashushaga enyanyinyi ya kyabashumba omu bichwi,
akaba ali nk'okwezi kw'ekimatiro.
7Yashushaga eizoba lyakire
ahali Rwensinga ya Rukirabyona,
akaba ali nk'omuhangazima
gulikwengelera omu bichwi birungi muno.
8Yashushaga eroza omu biro by'ebiraba
bya mbere byeleramu,
yashushaga lilia ezimezire aha nchuro y'amaizi,
akaba ali nk'omwelezi gwa Lebanoni
gututwire omu kyanda.
9Yashushaga omuliro n'obunuma omu kyotezo,
akaba ali nk'ekikwato ekihesirwe omu zahabu,
bakilengize n'amabare g'eiguzi ag'engeli zona.
10Yashushaga omuti gw'omuzeituni ogwijwire ebiraba,
akaba ali nk'omuzeituni kibira ogulikukanga omu bichwi.
11Orwo yajwaraga ekanzuye y'ekitinwa,
yabaga murungi muno; aho atemba alutare
n'orubuga rwa Rwensinga aruha ekitinwa.
12Orwo yatoraga emigabo y'ekitambo
omu mikono y'abakuhani,
ayemeleire aha rubaju rw'ekyoto kya alutare,
abarumuna bamuzingoire nk'orukinga,
yashushaga omwelezi guto gwa Lebanoni.
Bamuzingoraga nk'emiti y'emikindo,
13bonene abo baijukuru ba Aroni bona,
bemeleire bakwete omu ngaro eby'okuhongera Omukama,
bali omu maisho g'enteko ya Isiraeli.
14Orwo yamaraga eikora lya alutare,
akatuuza kutekateka eby'okuhongera Rukirabyona,
Rushoborabyona,
15aimukya omukono akwata ekikompe,
akifukamu edivai,
agishesha aha maguru ga alutare,
omugaju ogushemelera Rukirabyona,
Omukama w'abantu bona.
16Baijukuru ba Aroni abo batamu orusharo,
batera amakondere agaheshano,
baamuza muno ngu Rukirabyona abahulire.
17Aho abantu bona banguha
bagwa ahansi bajumaire,
kufukamira Omukama wabo,
Rushoborabyona, Ruhanga, Rukirabyona.
18Abahoyi basingiza Rukirabyona ogwo n'amaraka gabo,
bahoyera kimoi n'amaraka agalengize.
19Abantu batagiliza Omukama Rukirabyona,
bashoma enshara omu mabona g'ogwo omuganyizi,
kulemwa kugoba aha nzindo y'omuchonchozo
gw'okufukamira Omukama,
omuchonchozo ogwo bagugobesheleza batyo.
20Ahanyuma Simoni aruga alutare asongoka,
aimukiza enteko yona y'Abaisiraeli emikono,
abashabira omugisha gw'Omukama amwebuga.
21Nabo bainama kufukamira Omukama
omurundi gwa kabili,
babone omugisha gwa Rukirabyona.
Okusingiza Omukama
22Mbwenu musingize Ruhanga w'abantu bona,
akora eby'amani rwona rwona,
atuha ekitinwa kwema twazarwa,
ashuba atutwaza nk'okwo obuganyizibwe buli.
23Asinge atuhe emitima y'ebyera,
omu biro byaitu atutunge emilembe omuli Isiraeli,
nk'eyo Isiraeli yabaire ainayo makiro ag'eirai.
24Asinge agume atugilire obuganyizi,
ashube atujune omu matangwa.
Amahanga gashatu aganobwa
25Haliho amahanga gabili agantama,
kandi elya kashatu tilisaine kwetwa ihanga.
26Amahanga ago nig'aga,
abatura omw'ihanga lya Seiri, Abafilisiti,
kutaho n'abantu abafera abatura Shekemu.
Obumanyi bwa Yoshua eya Sira
27Inye Yoshua eya Sira,
Sira eya Eleazari owa Yerusalemu,
obumanyi bwange bwona nkabuhandika omu kitabo eki
kwegesa abandi kabamanya.
28Muberwa alyetaho ebigambo ebi,
kandi alibiteka aha mutima aliba mumanyi.
29K'alibihikya alishobora ebintu byona,
aha rw'enshonga omuhandagwe ni Mukama,
niwemushana amwakiza.
Ruhaya DC Bible © Bible Society of Tanzania, 2001.