EFESUS 2
2
Rad̄i madekai lao aka morikai
1 #
Kol. 2:13
Ntoina nggomid̄oho made sacara maraso b̄ara nggomid̄oho madosa ro sapamu parenta Ruma Hatalla. 2Aipu wakatu ede nggomid̄oho b̄atumu rabiasakai b̄a dunia ake; aona nggomid̄oho to'a d̄imakuasakai langi, eded̄u roh ma ake makuasakai ade dou-dou ma wati to'a d̄i Ruma Hatalla. 3Ntoina sara'a ndaita sama rau b̄une siad̄oho; ndaita mori b̄atu tabe'a manusia ndaita ro takarawi au ma kasana wea sarumbu ro fiki ra kananu ndaita. Aipu wakatu ede ndaita eded̄u dou-dou mab̄oha mbanikai b̄a Ruma Hatalla rau, sama b̄une dou-dou makalai.
4Pala nawancuku na'ena rahama Ruma Hatalla! Sia nawancuku meci ra ca'una ndaita, 5ndad̄ina d̄i wakatu ndaita mbuipu made sacara ade maraso b̄ara rasapa b̄a ndaita, Sia kamori mbalina ndaita sama-sama lab̄o Al Masih. Ndad̄i, b̄ara taho ade Ruma Hatalla, nggomid̄oho d̄ikasalama b̄a Sia. 6B̄ara ndaita sab̄ua lab̄o Ruma Isa Al Masih, Ruma Hatalla kamori mbalina ndaita sama-sama lab̄o Sia, loakud̄u ndai doho sama-sama rau lab̄o Sia d̄i ade saroga. 7Ruma Hatalla karawikaina ede loakud̄u d̄i jamana makento, manusia naloaku eda ipi meci ra ca'u Ruma Hatalla. Meci ra ca'u ede katada b̄a Ruma Hatalla kai ncai taho ade-Na d̄i ndaita kai ade Ruma Isa Al Masih. 8-9B̄ara hadia rambei b̄a Ruma Hatalla nggomid̄oho rakasalama b̄a imbimu, ede laina hasi usahamu, pala rambei b̄a Ruma Hatalla, ede laina hasi rakarawimu loakud̄u b̄ab̄aina wara dou ma kasombo weki. 10Ndaita eded̄u rakandad̄i b̄a Ruma Hatalla, ro ra kandad̄i kai ncai Ruma Isa Al Masih d̄ikarawikai lampa rawi ma taho rasadia b̄a Ruma Hatalla sawatipu b̄a ede. Sia ne'ena loakud̄u ndai mori ta d̄ei adena.
Sab̄ua b̄ara Al Masih
11Cina ra angi ma laina dou Yahudi! Kawarapu ka'ada'amu aipu wakatu ntoina: Nggomid̄oho d̄ipehekai ”dou wati rasuna”, b̄a dou Yahudi mamangaku weki rasuna (aona ma wa'ura rakatanda randawi b̄a manusia d̄i sarumbu siad̄oho.) 12Aipu wakatu ede nggomid̄oho wati sab̄uamu lab̄o Al Masih, nggomid̄oho eded̄u dou lai rasa ma wati lu'u d̄i ela rakad̄ale b̄a Ruma Hatalla. Nggomid̄oho wati lu'u d̄ei sake rad̄iki b̄a Ruma Hatalla lab̄o ela-Na. Nggomid̄oho morimu d̄ei dunia ake kai wati wara ne'e ro kai wati wara Ruma Hatalla. 13Pala ake, b̄ara nggomid̄oho wa'ura sab̄ua lab̄o Ruma Isa Al Masih, nggomid̄oho ma ntoina d̄o'o, wa'ura kad̄eni kai mboho ra'a Al Masih. 14B̄ara ndai Al Masih eded̄u makadamena ndaita. Sia kasab̄uana dou-dou Yahudi ro dou-dou malaina Yahudi ndad̄i sab̄ua bangsa. D̄indi makahampa ade weki siad̄oho, eded̄u musu angi, wa'ura kaleli b̄a Al Masih kai korobana sarumbu ndai-Na. 15#Kol. 2:14 Hukum Taurat lab̄o parenta-parenta ro atora-atorana wa'ura kambora b̄a Al Masih loakud̄u d̄ua mbua bangsa ede ndad̄i sab̄ua bangsa manusia b̄ou, ma sab̄ua lab̄o Sia. Kai cara edeku Al Masih kandad̄ina tahokai angi. 16#Kol. 1:20 B̄a made-Na d̄i salib, Al Masih kasab̄uana d̄ua mbua bangsa ede, ro kadamena siad̄oho lab̄o Ruma Hatalla, ndad̄ina mborara musu angi ede. 17#Yes. 57:19 B̄ara ndedena mai Al Masih d̄imangoa ra kahaba Haba Mataho mab̄oha damekai ede d̄i nggomid̄oho; nataho d̄i nggomid̄oho dou laina Yahudi ma ntoina d̄o'o rad̄i Ruma Hatalla, nataho d̄i dou Yahudi ma d̄eni lab̄o Ruma Hatalla. 18Kai ncai Al Masih, ndai sara'a – nataho dou Yahudi ro dou laina Yahudi – b̄a Roh Allah ma sab̄ua, loa mai d̄eni d̄i Ama.
19B̄ara ndedena, nggomid̄oho watid̄u lu'u d̄ei dou lai rasa atao dou ari lua. Nggomid̄oho ake eded̄u sama-sama dou ela Ruma Hatalla. Nggomid̄oho eded̄u anggota-anggota kaluarga Ruma Hatalla. 20Nggomid̄oho rau ratu'u ese wawo dasa ratoho b̄a rasu-rasu ro nabi-nabi, lab̄o Ruma Isa Al Masih mandad̄i wadu ma penti poda. 21Siaku ma kasadunduna sara'a ratu'u ede ndad̄i Bait Allah rakalai ru'u Ruma. 22B̄ara mori sab̄ua lab̄o Al Masih, nggomid̄oho rau wunga d̄i katu'u sama-sama lab̄o dou-dou makalai ndad̄i sab̄ua Uma ru'u Ruma Hatalla; ta ede Ruma Hatalla ngge'e lab̄o Roh-Na.
@LAI 2001