EFESUS 3
3
Karawi la Paulus d̄i ru'u b̄a dou malaina Yahudi
1B̄ara ndedena nahu, Paulus, rabui b̄ara Ruma Isa Al Masih d̄i ru'u makapentikai nggomid̄oho ma laina Yahudi. 2Tantu nggomid̄oho mawa'ura ringa b̄a one Ruma Hatalla, b̄ara taho ade-Na, wa'ura mbeina d̄i nahu, taki ra puta ake ru'u pentikai nggomid̄oho. 3Ruma Hatalla ngoana rahasia nia-Na ro ngoana d̄i nahu. (Mab̄oha lampa rawi ake wa'ura tunti kaporo b̄a nahu ta ese, 4#Kol. 1:26-27 ro nggara bacasi b̄a nggomid̄oho, nggomid̄oho d̄imaloa ka'ao rahasia mab̄oha Al Masih b̄une loa ka'ao b̄a nahu.) 5Ntoina rahasia ede watipu parana ngoana d̄i manusia, pala ake Roh Allah wa'ura katadana d̄i rasu-rasu ro nabi-nabi-Na. 6Rahasia ede, eded̄u ake: Kai ncai Haba Mataho ede, dou laina Yahudi b̄atu iu bareka-bareka Ruma Hatalla ma ntoina d̄i sadia wea ru'u dou Yahudi mpoampa. Dou-dou malaina Yahudi wa'ura ndad̄i anggota sarumbu ma sama, ro b̄atu tarima ao au rasake b̄a Ruma Hatalla kai ncai Ruma Isa Al Masih.
7Ruma Hatalla mbeina d̄i nahu bareka – eded̄u taki ra puta – d̄imangoa ra kahaba Haba Mataho ede. Nahu tarimaku bareka ede, kai ncai kuasa Ruma Hatalla ma karawi d̄ei sarumbu nahu. 8D̄i ade weki samenana ela Ruma Hatalla, nahura ma cumpukai darere mori. Pala Ruma Hatalla mbeina d̄i nahu bareka ake: taki ra puta d̄imangoa ra kahaba d̄i dou-dou malaina Yahudi Haba Mataho mab̄oha ntau ra wara Al Masih ma wati wara cumpuna; 9ro rau loakud̄u kai nahu sara'a dou b̄ade b̄uneku Ruma Hatalla, Makandad̄i dunia lab̄o isina ake, karawina nia-Na ma aipu ntoi poda wa'una d̄irahasia kai d̄i dunia. 10Makasu Ruma Hatalla eded̄u, loakud̄u ake, kai ncai ela-Na, samenana ma nenti kuasa ese woha ai nab̄ade timba ra lemba Ruma Hatalla ade samenana pahuna. 11Ruma Hatalla karawina ede ncihi ncao lab̄o nia-Na ma ederahid̄i, rakarawi-Na kai ncai Isa Al Masih Ruma ndaita. 12Kai imbi d̄i Al Masih ro b̄ara sab̄ua lab̄o Sia, ndai d̄i mbei wakatu d̄id̄enikai d̄i Ruma Hatalla kai b̄ini b̄a imbi ade. 13B̄ara ndedena, d̄i raho b̄a nahu eded̄u; aina darura mab̄oha au rancoki iu b̄a nahu b̄ara nggomid̄oho, b̄ara samenana ede, eded̄u d̄i tahokai nggomid̄oho.
Meci ra ca'u Al Masih
14B̄ara ndedena, nahu doho sujuku d̄i tando Ama. 15Rad̄i Siara sanikina iwa ra weki d̄i saroga ro d̄i dunia tarimana tabe'a-Na ma lai ndaina. 16Nahu do'aku raho to'impa Ruma Hatalla ma wancu d̄ese ra ntasa kaloana ru'u katenggokai ade mpidamu kai Roh-Na. 17Raho to'impa b̄ara nggomid̄oho imbi d̄i Al Masih, Al Masih ngge'e d̄ei ademu, ro morimu kai dasa ro d̄i kuasakai b̄a meci angi. 18Nahu do'aku raho-raho to'impa sama-sama lab̄o sara'a ela Ruma Hatalla, nggomid̄oho iu podamu, b̄a wancu pajana ro naruna, ro d̄esena ro d̄eina meci ra ca'u b̄a Al Masih, 19ma kai aka manusia wati d̄i loa ka'ao sad̄ei-d̄eina. Raho-raho to'impa nggomid̄oho patamu meci ra ca'u b̄a Al Masih ede, ndad̄ina nggomid̄oho b̄inikai b̄a tabe'a-tabe'a Ruma Hatalla ma mpuruna.
20Kai kuasa Ruma Hatalla ma caha karawi d̄ei sarumbu ndaita, Ruma Hatalla naloa karawi d̄o'oku ncewi mbotona ntewi kaisi au raloa raho b̄a ndaita atao kananu b̄a ndaita. 21Pab̄uaku Ruma Hatalla d̄ikad̄ese ra kantasa b̄a londo ra mai d̄i ade ela-Na, kai ncai Ruma Isa Al Masih. D̄ese ra ntasara Ruma Hatalla santoi-ntoina! Amin.
@LAI 2001