EFESUS 1
1
1 #
Kis. 18:19-21, 19:1 Ela Ruma Hatalla d̄i Efesus, ma to'a d̄i Ruma Isa Al Masih!
2Nahu, Paulus, rasu Ruma Isa Al Masih kai kane'e b̄a Ruma Hatalla, maraho loa to'impa Ruma Hatalla Ama ndaita ro Ruma Isa Al Masih mbeina bareka ro taho ra ntai d̄i nggomid̄oho.
Bareka ade maraso kai ncai Al Masih
3D̄ese ra ntasara Ruma Hatalla, Ama Ruma ndaita Isa Al Masih!
Sia mbeina bareka ndaita kai samenana bareka maraso d̄i ade saroga, b̄ara ndaita sab̄ua lab̄o Al Masih. 4Sawatipu b̄a kandad̄i dunia ake, Ruma Hatalla wa'ura kad̄alena ndaita kai ncai Al Masih kai ne'ena loakud̄u ndaita ndad̄i ntau-Na rakalaina ro wati wara ma'iha d̄itando-Na. B̄ara meci ra ca'u b̄a Ruma Hatalla, 5ndad̄i Sia wa'ura katantu ulu wa'una b̄a one kai ncai Ruma Al Masih, Sia d̄imahantana ndaita ndad̄i ana-ana ndai-Na. Ro poda edeku d̄i ne'e-Na karawi. 6D̄ese ra ntasara Ruma Hatalla ma na'e ra ntoru, b̄ara kai ncai ana-Na ra'ipi meci, Sia nawancuku meci ra ca'una ndaita.
7 #
Kol. 1:14
Ndedeku rembana taho ade-Na d̄i ndaita, ndad̄ina ndai d̄i cola kai ncai mboho ra'a Al Masih, ndai hori b̄a Ruma Hatalla, ede aona Sia wa'ura kangampu weana ndai rad̄i dosa-dosa ndaita. 8Sia karawikaina ede b̄ara Sia nawancuku meci ra ca'una ndaita, ro meci ra ca'una ede mbei-Na d̄iru'u ndai kai b̄ini b̄a loa timba ra lemba ro loa ka'ao. 9B̄atu kane'e ndai-Na, Ruma Hatalla ngoana d̄i ndaita rahasia rania-Na; Sia wa'ura nggahina b̄a one nia-Na ede d̄ikanggori kai ncai Al Masih. 10Nia ede eded̄u loakud̄u samenana au-au, nataho d̄i saroga ro d̄i dunia, ndad̄i sab̄ua lab̄o Al Masih mana'ekaina. Ro lampa rawi ede d̄ikanggori b̄a Ruma Hatalla nggara wa'usi raka wakatuna.
11Ruma Hatalla karawina samenana au-au kai ne'e-Na ro au ranggahi ndai-Na. Ratampu'u aipu sarambana Sia wa'ura kad̄alena ndaita b̄ara ne'e b̄a Sia loakud̄u ndaita ndad̄i ela-Na b̄ara sab̄ua lab̄o Al Masih. 12Co'opu ndaita, ma saramba-rambakaina mane'e d̄i Al Masih, maroi ra wadi Ruma Hatalla b̄ara na'e ra ntoru-Na!
13Nggomid̄oho rau wa'ura ndad̄i ela Ruma Hatalla wakatu ringa b̄a nggomid̄oho ranggahi b̄a Ruma Hatalla, eded̄u Haba Mataho ma mbei salama d̄i ru'umu. Nggomid̄oho ma'imbiku d̄i Ruma Isa Al Masih, b̄ara ndedena Ruma Hatalla mbeina tanda ntau-Na d̄i nggomid̄oho, eded̄u Roh-Na rasake-Na. 14Roh edeku d̄i nenti b̄a one ndaita d̄imatarima au rawa'u sake b̄a Ruma Hatalla d̄i ela-Na. Ake maka'imbi kapodana ndai b̄a one Ruma Hatalla d̄imahori kalosa ela-Na. D̄ese ra ntasara Ruma Hatalla b̄ara na'e ra ntoru-Na!
Do'a la Paulus
15B̄ara ndedena, ra'aipu tampu'u ringa b̄a nahu b̄a one nggomid̄oho imbi d̄i Ruma Isa, ro nggomid̄oho meci ra ca'umu sara'a ela Ruma Hatalla, 16nahu wati kompo-kompona rentaku tarima kasi d̄i Ruma Hatalla mab̄oha nggomid̄oho. Pehe ncau b̄a nahu ngaramu d̄i wakatu nahu do'aku. 17Nahu rahoku loakud̄u Ruma Hatalla Ruma b̄a Isa Al Masih Ruma ndaita, Ama ma d̄ese ra ntasa, mbeina Roh-Na d̄i nggomid̄oho. Roh ede d̄imakandad̄ina nggomid̄oho loa timba ra lemba, ro d̄imakatadana Ruma Hatalla d̄i nggomid̄oho ndad̄ina nggomid̄oho patamu Sia. 18Raho b̄a nahu loakud̄u Ruma Hatalla henggana fiki ra kananumu loakud̄u ndad̄i taroa; loakud̄u nggomid̄oho loamu ka'ao au raloa pamao b̄a nggomid̄oho rad̄i Ruma Hatalla ma ou nggomid̄oho. Ro loakud̄u nggomid̄oho b̄ademu b̄uneku rembana bareka-bareka ma ntika rasadia b̄a Ruma Hatalla d̄i ru'u ela-Na; 19ro wancuku hebana Ruma Hatalla karawina kai b̄ini b̄a kuasa d̄ei ndaita ma imbi. Kuasa Ruma Hatalla ede sama b̄une kuasa maheba poda 20#Mzm. 110:1 rakani-Na wakatu kamori mbalina Al Masih rad̄i madena lab̄o mbeina d̄i Sia hid̄i mawancu ese sama-sama lab̄o Ruma Hatalla d̄i saroga.
21B̄ora Al Masih d̄o'o ncewi esena ntewi kaisi lab̄o b̄ora samenana pamarenta sara'a mantau kuasa, sara'a dou mana'ekai, sara'a ruma-ruma ro cou-cou rau nawa'u mbei hid̄i dohokai ma'ese; nataho ma mori d̄i jamana ake ro ma mori d̄i jamana ma kento. 22#Mzm. 8:6 #Kol. 1:18 Ruma Hatalla kakoa sara'ana d̄ei ade kuasa Al Masih, ro mbeina Al Masih ru'u ela-Na d̄imana'ekai rad̄i samenana. 23Ela-Na eded̄u sarumbu Al Masih, kampuruna b̄a Sia ma kampuruna samenana tab̄e-b̄e rau.
@LAI 2001