Matthew 24
24
Achineki Kütsave nikeu eno Ashekha Tsalà Michipu
1Jisü ye achineki qhive no chesü wuche, ikelo pa khopemiqo no pa lau ighino achineki shipüa keqo kiche pesü pa piye. 2Jisü no iniju, “Nongu ye hipaqo kümtsü ithulu anima? Ino kuchou tsà nongu vilo pìní, hilehi atu lakhimu lakhi shou bepe ngomove nani, eno atu kümtsü tuleqhive nani.”
3Jisü no Olive naghuto lo iqa akelo, pa khopemiqo no lomo shi pa lau ighi no pi, “Tipaqo ye kughou no shikupu nani eno nono ighi nikeu eno ashekha ghuloki michipu ye kiu keno ningu vilo pitsülo.”
4Jisü no khochile: “Khuu pelomu nongu pishiqhive pemo nike jukuto alo. 5Kughengu kutomo no ije lono, ‘Ni ye Messiah ke,’ ipi ighi nani eno kutomo pishiqhi nani. 6Nongu no nongu kupunú lo aghüshi akeu eno putou aghüshi akeu uyewu sütsa chilu nani, ikemu tipaqo no nongu shithüghüive mokepu shi jukuto alo. Hipaqo ye shikupu moayesa nani, ikemu ashekha ghuloki ye ighini aphike. 7Shiye lakhi no shiye lakhi mujochile ipeghi nani, eno kükaqha lakhi no kükaqha lakhi mujochile ipeghi nani. Püqümiye keu eno ayeghi küghüthaqo a-a kütüta lo anani. 8Hipaqo kümtsü apunu küsǜ huthu akeu paphi ke.
9“Tishi no nongu ye kijipüsa eno pìthíve penike pesü tsüve nani, eno shiyeqo kümtsü no ighenguno nongu mithi nani. 10Tipau ghuloki lo kutomo no aküpülü pheve no wuve nani eno lakhi no lakhi thechu shi nani eno kimthi kilé nani, 11eno kichileu tungkupumiqo kutomo ipeghi nani eno timi kutomo pishiqhi nani. 12Küsakügha no thuwuve keu ghenguno timi kutomo mulo lo kikimiye mukove nani, 13ikemu khuno no ashekha kutólo mutotoi puthugho aghíni keno xaluve nani. 14Eno Alhou kükaqha tsakiviu hipau no thopi lakhi shi ayeghiqha kümtsü lau kütsüwu nani, eno tithiu no ashekha tsalà ighi nani.
15“Ikehu kughou nongu no ‘aphikümqhüpu tipau küghüküghaleive pe chekeu,’#24:15 Dan 9:27; 11:31; 12:11 khikhi Daniel tungkupuu no pipüani keno, tipau no akimthe-a lo puthugho aghí keu ithulu aye (phi akemi no hi ithilo) 16Judea lo akemiqo pelo naghutoqo lo pove pelo. 17Aki kütsüqa lo akemi khumu aki lo anhemgha ikhi phelu niye aqhou iqighi pe kepu kumoe. 18Alu lo akemi khumu idewo panonguw ubephi luwu kepu kumoe. 19Atsala tipaqo lo totimi angá mishí akemi ngò azá angá pini akemiqo ghenguno kiutoi akümsapu kea! 20Süsü tsalà momu Sabbath tsalà lono pokajo keu shipemo nike inikhu alo. 21Hipau tüqhüdo lo aghime kitikhi anani, eno tiye ayeghiqha lhophe ke lono ishi kutólo titoi ighi miphi keu momu ighi nikeu lomu titoi akiniù ighimo nikeu ke.
22“Tsalá atsala tipaqo no kughukhove moaye, timi khumu xüluni chemoe, ikemu kìsheluve kemiqo je lono atsala hipaqo ye kughukhove nani. 23Tipau süchedo lo tsalá khiuala no ovilo, ‘Julo, Messiah hi chenie!’ momu, ‘Pa ye hu cheni!’ ipi aghí namu ti pülü kevilo. 24Kughengu kichileu messiahqo ngò kichileu tungkupumiqo no pishiqhi niye ipeghi püzü akümzapu eno amichipu kümlà kijè shi nani, eno tsalá shikulupu shi aye kìsheluve kemiqo ghí pishiqhi niye shi nani. 25Julo, ino ashe-azü shi nongu vilo pivae.
26“Ikehu, tsalá khukhumu ovilo, ‘Messiah ye hulehi yenguike-a lo anie,’ ipi namu khalau ipe kevilo; momu ‘pa ye hilehi achebo alou anie,’ ipi namu pülü kevilo. 27Tsütsüpha kipelau ipeghi kelo kulolau ghí ithulu chekeu toi, Timi Nu ghí titoi ighi nanie. 28Khilehi ashikumo ani keno, tilehi aluquqo no kumqo nani.
29“Aghime kitikhi tsalà hipaqo thiu, paikhavi lono,
“ ‘khetsünhe no züchiyive nani,
eno aqhi no pa küvü tsümove nani;
ayepuqo no atsütsǘ lono ikiqive nani,
eno atsütsǘ lo akeu jeli kümtsü süküghütha nani.’#24:29 Isa 13:10; 34:4
30“Tilehi kungugha lono Timi Nu akeu michipu ipeghi nani. Eno kughou Timi Nu no atsütsǘ lo khüngküsü lono aküka eno ajuküvü kijè gholo no chekeu ithuluni keno, ayeghi lo timiqo kümtsü#24:30 Dan 7:13‑14 no qau khave nani. 31Eno pa no afuko ghügha kijè gholo no paw kungumiqo puwu nani, eno panongu no ayeghi cheku bidí lono pa no kìsheluve kemiqo hekütsü süghi nani, eno tiye ayeghi ashekha lono ashekha kutólo kìsheluve kemiqo süghi nani.
32“Mububo lono akükütsü hipau shikalulo: Kughou aloka lo apishe ipeghive püzü tipau nipa no miní ipeghiveni keno, nongu no tiye mütsü tusho chea ipi ithive cheni. 33Tihutoi, kughou nongu no hipaqo kümtsü ithuluni keno, ashekha tsalà kupunúvea eno tiye#24:33 Momu pa ye ahukikha lo ighivea kepi ithilo. 34Ino kuchou tsà nongu vilo pìní, hipaqo kümtsü mütsümishei shikupuve moke thaqhülo hipau tiqheli ye kühave keu shimo nani. 35Atsütsǘ eno ayeghi ye hauve nani, ikemu itsà ye khilemu hauvemo nani.
Khunomu Atsala eno Ayì kihedo Müthae
36“Ikemu atsala momu ayì kihedo ghili ye khunomu müthae, kungugha lo kungumiqo ke kumo no Anu ghí#24:36 Kaku khami lo ye Anu ghí ipikeu ye kühae. müthae, ikemu Apù likhi no ithi anie. 37Noah tsalà ghuloki lo toi, Timi Nu ighi kelo ghí titoi shi nani. 38Azü no yimi keu tsalà ighi miphi zülo, timiqo ye chu-shoa, külakupu shia eno külakupu tsüae, eno tiye Noah no ashuka lo ilove keu tsalà kutólo tishi ake; 39atshünazü no panongu kümtsü yimive no pesü wuvemo ke kutólo, panongu ye kiu shive nani keno kiumu mütha no ae. Timi nu ighi kelo ghí hitoi shi nani. 40Mikini alu lo hu anani; ikelo lakhi sawuve nani eno lakhi ye qhive nani. 41Totimi kini athi shesü akelo; lakhi sawuve no lakhi ye qhive nani.
42“Kiu tsalà lono nongu Mipeu ighi nani keno nongu ye mütha ke ghenguno jukuto alo. 43Ikemu hi vethalulo: Tsalá aki mipeu no putho lo kiu tüqhüdo lono küpkami ighi nani keno ithi aghí ke aye, pa ye jukuto anani eno pa ki hephosü iloghi pemo nani. 44Tighenguno nongu ghí kutope amasae, kughengu Timi Nu ye nongu no huqhemo keu tüqhüdo lono ighi nani ke.
45“Imaye, khuu no pichebekulu eno alokütsü qeu kea? Tiye khuu ampeu no pa kibo lo aqemiqo shou pichempiu shipe no ado achipi lono panongu achuqu tsüpe keu ke. 46Ampeu no idechile ighi kelo, aqeu tipau no pa mipeu no pichetsü keu kümlà shi aghí keu phulu aye, pa ghenguno akivipu ke. 47Ino kuchou tsà nongu vilo pìní, pa no aqeu pelo paw küakini kümtsü shou ampeu shipe nike picheve nani. 48Ikemu tsalá aqeu no küsakügha shi no pa likhi pa pütsa ghi, ‘Impeu ye ighi nikeu ado kushuwa lunani,’ ipi 49no pa küsàmi aqemiqo heqhi thuve püzü shokümzümiqo gholo chu eno sho auve aye, 50aqeu tipau mipeu ye aqeu no huqhemo keu tsalà eno ayì kihedo mütha keu dolo no ighi nani. 51Ampeu no pa qeu aleqhi shi ghithave nani eno pa pesü kühaküghamiqo gholo qhive nani, eno tilehi ahu tsüghü-bubushi qa anani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
