Matthew 23
23
Kühakügha Vehu lo Pikichi Keu
1Tile Jisü no aqokitikhi eno pa khopemiqo vilo pi: 2“Ayeza kükütsümi eno Phariseemiqo no Moses lakhü lo iqa anie. 3Ikehu panongu no nongu vilo kiu shilopi keno kümtsü kutokupui kepue. Ikemu panongu no kiu shi cheni keno shi kevilo, kughengu panongu ye panongu no kütsü keu toi xüchemoe. 4Panongu no akho kimshi puqhe kümlapú pesü kütami bighiqo lo tshüpipe cheni, ikemu panongu ye panongu u lotimu chhopuwo tipaqo peqhe nishi chemoe.
5“Panongu no shikeu kümtsü kütami pelo ithulu penikeu ghenguno shi cheni: Panongu no aumlo lo Kuchoyesü tsà bohu khapu#23:5 Momu abohu hipau pesü akishe lo khapu cheni. chekeu kijè shikithe cheni eno panongu phishe lo tshüpu chekeu kushuwa shikithe cheni; 6aghulhu-a lo panongu ye agigihu-a mine cheni, eno synagog lo akhoto lakhüqo lo iqanishi cheni; 7Kütamiqo pelo alhikishi-a lo gihu ghi petha panongu tsüpe nishi eno ‘Rabbi,’#23:7 Momu akükütsüu. ipi panongu ku penishi cheni.
8“Ikemu nongu ye ‘Rabbi,’ ipi ku kepu kumoe, kughengu nongu ye akükütsüu lakhi likhi ani, eno nongu kümtsü athiküzümi ke. 9Eno ayeghi lo khuu vilomu ‘Apù,’ ipi ku kevilo, kughengu nongu ye ‘Apù’ lakhi ani eno pa ye kungugha lo anike. 10Momu kichekütsüu ipi nongu ku pe kepu kumoe, kughengu nongu ye kichekütsüu lakhi likhi ani, tiye Messiah ke. 11Nongu gholo khuu no akijeu keno pa no nongu qeu shi nani. 12Kughengu khuno no alikhi ampi pesü süqhe cheni keno kuchunuve nani eno khuno no alikhi ampi pesü kuchunu cheni keno süqheve nani.
Ayeza Kükütsümi eno Phariseemiqo Ghenguno Ahaküsapu Tsünì
13“Nongu ayeza kükütsümi ngò Phariseemiqo ghenguno ahaküsapue, nongu kühaküghaqo! Nongu no timiqo ghenguno kungugha kükaqha hukikha khave tsüke. Nongu no ilo ke kumo no kütami no ilo niye pükapütsa akeu ghí ilopemo ke.
14 “Nongu ayeza kükütsümi ngò Phariseemiqo ghenguno ahaküsapue! Nongu kühaküghaqou! Nongu no chimemiqo ki süxaluve cheni eno timi shipe piye nike ghenguno akighini kushuwa shi acheni. Tighenguno nongu ye shishe aghime kitikhi sholu nani. # 23:14 Kaku khami lo ye hipau jo küha eno hipaqo lo akeu pesü peitha cheni Mk 12:40 eno Lk 20:47
15“Nongu ayeza kükütsümi ngò Phariseemiqo ghenguno ahaküsapue! Nongu kühaküghaqo! Nongu no timi lakhi mulo pebide pe no Jewmi chineye lo sǘ niye azüghi kathasü ayeghiqha kuchopu kicheghüzü shi wucheni, eno kughou tishiluveni keno, nongu no pa pesü nongu toi ghuthu kini qhemi amiyizü lomi lakhi shive pe cheni.
16“Nongu anhethi iche no saphe chekemi ghenguno ahaküsapue! Nongu no ishi pi cheni, ‘Tsalá khiuala no achineki jeku tushoqhi namu kumukumoe, ikemu timi khuu no achineki lo shuna jeku tushoqhini keno, tipau shoqhi no pa meluvae.’ 17Nongu anhethi kighichemi nikhanighaqou! Khikhiu no akijeu kea: shuna no keo, shuna pesü akimthe shitsü keu achineki no kea? 18Itaghi ishi ghí pi cheni, ‘Tsalá khiuala no akümlá-khache jeku tushoqhi aghí namu, tiye kumukumoe, ikemu khuu no akümlá-khache lo akümlagho akeu jeku tushoqhini keno tipau shoqhi no pa meluvae.’ 19Nongu anhethi kighichemiqou! Khikhiu no akijeu kea, akümlagho no keo, akümlagho pesü akimthe shitsü keu akümlá-khache no kea? 20Tighenguno, khuu no akümlá-khache jeku tushoqhini keno tipau shou kiu bepüani keno kümtsü jeku ghi tushoqhi anike. 21Eno khuu no achineki jeku tushoqhini keno tipau jeku eno Alhou tile akeu jeku ghi tushoqhi anike. 22Eno khuu no kungugha jeku tushoqhini keno Alhou kükalakhü eno tipau lo iqa akeu jeku ghi tushoqhi anike.
23“Nongu ayeza kükütsümi eno Phariseemiqo ghenguno ahaküsapue! Nongu kühaküghamiqo! Nongu no vepuju chekeu—axokümüna bò, dill bò eno pülakhü bò kutólo chighí lo saje lakhi Alhou tsü cheni ikemu nongu no ayeza lo akhotouqo—achipiu xakütha, kimiyeqhiyi keu eno pükhübekulu shini keu kughuchove cheni. Nongu ye azüu pive keqo ghí kughuchove kepu kumo ikemu itehi kiu piani keno tipaqo pepimhe akepu ke. 24Nongu anhethi iche no saphe chekeqou! Nongu no amiyí ye küpühave no ut ye munove achenie.
25“Nongu ayeza kükütsümi eno Phariseemiqo, nongu ghenguno ahaküsapue, nongu kühaküghaqou! Nongu ye akhu eno ajikhu ashou ye shikimtheve cheni ikemu alou ye alakimine eno alikhi aghasü kümla no chhitoi acheni. 26Phariseemiqou! Atüghishi akhu-ajikhu alou paghi küsüvelo, tishianguno ashou ghí mithe ananie.
27“Ayeza kükütsümi eno Phariseemiqou, nongu ghenguno ahaküsapue, nongu kühaküghaqo! Nongu ye alabe kimiye no akumokiqo lo nupuku püakeu toi ke, tiye ashou ighono juvi ikemu alou ye kithimi saghi eno mithemo keu no chhitoi acheni ke. 28Tihutoi, nongu ghí ashou timi gizülo ye achipiumikuchomi toi piye cheni ikemu alou ye kühakügha eno küsakügha no chhitoi acheni ke.
29“Ayeza kükütsümi eno Phariseemiqou, nongu ghenguno ahaküsapue, nongu kühaküghaqou! Nongu no tungkupumiqo ghenguno akumoqo mülà cheni eno achipiumikuchomiqo kumo lo jukivi shipuku tsü acheni. 30Eno nongu no ishi pi cheni, ‘Tsalá ningu no nipù-asü ghuloki lo xüacheghi ke aye, ningu ye panongu no tungkupumiqo jì kichiji keu lo süküqhamoni cheke.’ 31Tishikehu, nongu ye tungkupumiqo hekiqhimi tikughukomi kepi nongu likhi nongu shepe shi anike. 32Imaye, tishi achelo, eno nongu pù-asü no kiu huthu keno tipau shi kishekhavelo!
33“Nongu apighiqo! Nongu pighizü tiqo! Amiyizü lo kiléqhi sǘve keu lono nongu ye kíshi pokajolu nani kea? 34Tighenguno ino nongu lau tungkupumi, alokütsümi eno shikükamiqo puwu nani. Panongu khami nongu no pìthíve nani eno kros lo yedave nani; kütami khami nongu no synagogqo lono heqhi nani eno mishiphu lakhi lono lakhiu kutólo hakuqoqhi nani. 35Eno tisheno ayeghi lo achipiumikuchomiqo jì peleve keu, Abel achipiumikuchou ghiqhi keu jì lono wo Berekiah nu Zechariah khuu nongu no Achineki ngò akümlá-khache dolo no ghiqhi pìthíve keno ti kutólo ghenguno nongu shou aghime ikughi nani. 36Ino kuchou tsà nongu vilo pìní, hipaqo kümtsü tiqheli hipau shou ikughi nanie.
37“O Jerusalem, Jerusalem, no khuu tungkupumiqo pìthíve eno olau puwu kemiqo atu pesü veqhive keno, awuqu no li chishibo qholo atiqo vakütsü ake toi, ni ye ghuthu khijehi onuliqo hekütsü nishiqhiyi acheni kea, ikemu nono pulomoe. 38Julo, oki ye kümsá shivae. 39Kughengu ino nongu vilo pìní, nongu no, ‘Ampeu je lono khuu cheni keno pa kümgha tsülo,’ ipi moke kutólo nongu ye ni ithulu kithemae.”#23:39 Leshe 118:26
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
