Matthew 25
25
Ilimi Chighí Pesü Kimghi piye
1“Tipau ghuloki lo kungugha kükaqha ye ilimi chighí no panonguw akulu pesü külapuu sholu niye wu keu toi nani. 2Panoqo gholo pano pungu no nikhanighami eno pungu no alokütsümi. 3Nikhanighamiqo ye akulu pesü wu ikemu panongu gholo amizü pesü wumoe. 4Ikemu alokütsümiqo ye panongu kulu gholo amizü ghí abohuqo lono pesü wue. 5Külapuu ighi nikeu ado kushuwa luve ikehu pano chighí kümtsü ingufufuive eno zühuve.
6“Zübumta lo asütsa igha ipeghi: ‘Külapuu hi cheae! Khalau ipeghino pa sasü kusholo!’
7“Ikehu ilimiqo kümtsü ithughi no panongu kuluqo tsüghǜ pukuve. 8Nikhanighamiqo no alokütsümiqo vilo pi, ‘Ni kulu inheu chea ke nongu mizü ta ni tsülo.’ ”
9Panongu no khochile, “ ‘Moe, nongu ke kumo no hilau ningu ghengu ghí lukümkha shi amoe. Tighenguno nongu ye amizü je chekemi lau wu püzü nolikhi nongu sala hami qhüluvelo.’
10“Ikemu kughou panongu no amizü qhü niye alà lo wuche keno, külapuu ighive. Ilimi kutò pe khe akemiqo ye külapuu gholo no külakupu ghulhu lo ilove. Eno ahukikha khathasüluve.
11“Ado hami thiu, kütamiqo ghí ighi. Panongu no pi, ‘Ampeu, Ampeu, ningu ghenguno ahukikha khaqhi tsülo!’
12“Ikemu pa no khochile, ‘Ino kuchou tsà nongu vilo pìní, ni ye nongu müthae.’
13“Tighenguno jukuto alo, kughengu nongu ye atsala momu ayì kihedo vehu mütha ke.
Shuna Pesü Jolabo lono tsükeu Holetsa
14“Itaghi, kungugha kükaqha ye timi lakhi no kicheghüzü lo wuve niye pa qemiqo ku püzü pa mheghiqo pichebeve keu toi ke. 15Pütüta no shitsashi akeu kiqi lono, pa no lakhi vilo shuna jolabo pungu tsü, lakhiu vilo shuna jolabo kini tsü eno lakhiu vilo shuna jolabo lakhi#25:15 Shuna jolabo lakhi ye timi lakhi no ampe muku atsala lo jume qelu keu me qhemi ke. tsü. Tisheno pa ye kicheghüzü shiwuve. 16Timi khuu shuna jolabo pungu ithulupüa keno pa ye paikhavi wu püzü pesü pisa kimje keu vechewo shuna jolabo pungu alá shiluve. 17Titoi, shuna jolabo kini ithulu keu ghí shuna jolabo kini alá shiluve. 18Ikemu timi khuu no shuna jolabo lakhi ithulu keno, pesü wu püzü ayeghi chhu no tilehi pa mipeuʼw shuna küsüve.
19“Ado kushuwa thiu aqemi hipaqo mipeu ideighive eno panongu sasü kihikülai pekithi keu shi. 20Aqeu khuu shuna jolabo pungu ithulu keno pa no pungu alá süghi. Eno pa no pi, ‘Ampeu, nono shuna jolabo pungu ipichetsü ke ni ye pungu alá shilue.’
21“Pa mipeu no khochile, ‘Aghile shivea, pichebekulu eno iqeu kiviu, no ye thime aghulo lomu pichebekulu shike, ino opelo thime kutomo shou pichempiu shipeni. Ighilo eno O Mipeu lokivi lo küsajelo.’
22“Aqeu khuu shuna jolabo kini akeno pa ghí ighi. Pa no pi, ‘Ampeu, nono shuna jolabo kini ipichetsü ke; julo ni ye kini alá shilue.’
23“Pa mipeu no khochile, ‘Aghile shivea, pichebekulu eno iqeu kiviu! No ye thime aghulo lomu pichebekulu shike; ino opelo thime kutomo shou pichempiu shipeni. Ighilo eno O Mipeu lokivi lo küsajelo!’
24“Ikelo shuna jolabo lakhi ithulupüa qeu hu ighi. Pa no pi, ‘Ampeu, ino ithi akeu no, no ye mükamihi kemi lakhi ke, nono shosümo keu-a lo ghile huluve cheni, eno apitì vesümo keu-a lo ghí pekütsüluve acheni. 25Ikehu ni ye müsàve ke eno nono tsükeu shuna pesü wu no ayeghi lo chhuqhove ke. Julo, ow kiu keno hi anie.’
26“Pa mipeu no khochile, ‘No küsakügha, akipichi qeu! Ike no ye ino shosümo keu lo ghile hu eno ino apitì vesümo keu lo pekütsüluve chekeu ithi ani kena lai? 27Tishiaye, no ye iw pisa pesü kighishe kepu-a lo sǘve kepu shi ake, tishianguno niye ideighi kelo akighishe sǘ no ithulu chileveni cheke.
28“ ‘Ike pa lau no shuna jolabo ikhiluve lo eno tipau pesü khuu no jolabo chighí ani keno pa tsüvelo. 29Kughengu khuno no ani keno alau tsü nani, eno panongu ye kupukuno shi anani. Khuno no küha keno, pano no kiu aghíni keno, ti ghí pano lau no ikhipe wuve tsü nani. 30Eno ti ameküha keu qeu khalau vephe pesü àküzǘ lo vesüvelo, tilehi ye ahu tsüghü-bubushi qa anani.’
Ashekha Küghakütha
31“Kughou Timi Nu no pa juküvü lono kungumi kümtsü sasü pa gholo ighini keno, pa ye pa juküvü kükalakhü lo iqa nani. 32Shiye kümtsü pa zülo kumqo nani, eno ambekheu no aneqo lau no ambe küta shive ketoi, pa no timiqo lakhi no lakhi lau no kütüta shive tsü nani. 33Pa no ambeqo pesü pa u ajeu qhi nani eno aneqo pesü pa u piyiu qhi nani.
34“Tile no Akükau no pa u ajeu iqa akeqo vilo pi nani, ‘Ighilo, nongu I Pù no kümghave tsü keqo; omheghi lulo, ayeghiqha pulhosü ake ghuloki lono kükaqha oghenguno kutò pe püakeu ke. 35Kughengu ino müzüthi akelo nono chu kepu hami itsüke, ino tüghüthi akelo nono shokepu hami itsüke, ino inami shi akelo nono isasǘ tsüke. 36Ino tiphimini avehupu shi akelo nono tiphimini itsüke, ino sǜ akelo nono ijukuto tsüe, ino akughu shi akelo nono ighino ixuju ke.’
37“Tile no achipiumikuchomiqo no pa khochile nani, ‘Ampeu, kughou no ningu ye nono müzüthi cheghí keu ithulu no olojí, momu tüghüthi cheghí no kiuala ye kepu otsülu kea? 38Kughou no ningu ye nono inami shi chekeu ithulu no osasǘ, momu tiphimini avehupu shi aghí no opuu kea? 39Kughou no ningu ye nono sǜ akeu ithulu momu akughuki lo ngo akelo oxuju niye wu kea?’
40“Akükau no khochile nani, ‘Ino kuchou tsà nongu vilo pìní, nongu no ithiküzümi eno ichelimi hipaqo gholo akitilau lau kiu shitsü keno tiye ilau mülà ke.’
41“Tishi no pa no pa u piyiu akeqo vilo pi nani, ‘Ilau no wuvelo, nongu ghushove no alhomi lo tüghami eno paw kungumiqo ghenguno kutò pe qhive kemiqo. 42Kughengu ino müzüthi akelo nongu ye kiumu chu kepu itsümoe, ino tüghüthi akelo nongu ye kiumu ipiyémoe. 43Ino inami shi akelo nongu ye isasǘmoe, ino tiphimini avehupu shi akelo nongu ye ipuu moe, ino sǜ akelo eno ino akughuki lo akelo nongu ye ijukutomoe.’
44“Panongu ghí ishi khochile nani, ‘Ampeu, kughou no ningu ye nono müzüthi momu tüghüthi cheghí, inami shi cheghí momu tiphimini avehupu shi aghí, sǜ aghí momu akughuki lo ngo aghí keu ithulu no okuphumove kea?’
45“Pa no khochile nani, ‘Ino kuchou tsà nongu vilo pìní, nongu no akitilau hipaqo lau kiu mülàmove keno, tiye ilau mülàmo keu ke.’
46“Tishi püzü panongu ye lhokta ghime-a lo wuve nani, ikemu achipiumikuchomiqo ye lhokta küxü-a lo wuve nani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
