Matthew 22
22
Külakupu Ghulhu Pesü Kimghi piye
1Jisü no itaghi kimghi piye keu tsà vechewo panongu pütsa ghi pi: 2“Kungugha kükaqha ye akükau lakhi no panu ghenguno külakupu ghulhu kutò pe qhi keu toike. 3Pa no pa qemiqo hapesü külakupu ghulhu lo kusü pepüa keqo kuwu pe, ikemu panongu no ighi nikeu milive.
4“Ikelo itaghi pa no pa qemiqo alau puwu no ishi pi, ‘Kusüpüakeqo vilo ishi pilo, ni ye avelau ghulhu kutò pe qhivae, amishitsü ngò amishiti athakupu heqhi no thowkha kutoluvae. Külakupu ghulhu lo ighilo!’
5“Ikemu panongu ye amlo tsümoe eno pütüta shélo wuve; lakhi no pa lu lo huve, lakhi no pa lhikishi-a lo wuve. 6Eno kütamiqo no pa qemiqo tsüqüluve eno panongu kijipüsa eno heqhipithíve tsü. 7Akükau ye axuideve. Ikehu pa no paw ghüshimi puwu püzü hekiqhimiqo pìthíve eno panongu phughi pitileve tsü.
8“Tishi no pa no pa qemiqo vilo pi, ‘Külakupu ghulhu ye kutovae, ikemu ino khunoqo kusüpüa keno panongu ye ighi küzüpu kumovae. 9Tighenguno alaghila chekuqo lo wulo eno nongu no khuu ithuluni keno tipaqo aghulhu lo kusülo.’ 10Ikehu aqemiqo no alaghilaqo lo wu püzü timi akivimi ngò alhoküsami ghí khijehi sholu keno panongu no ku kumqo kelo külakupu chebo kijè akeu hu ye inamiqo no chhive.
11“Ikemu kughou akükau no inamiqo ju niye iloghi keno, tilehi timi lakhi ye külakupu lo pepu cheku tiphimini pepu aghimo keu pa no ithulu. 12Ike pa no iniju, ‘Aküsàu, no ye kíshi püzü külakupu lo pepu chekeu tiphimini pepumo no hilehi iloghi kea?’ Timi hu ye kiu tsamu pimlave.
13“Tile akükau no aghinikishimiqo vilo ishi pi, ‘Pa pukhu eno a-u phedavelo, eno khalau vephe pe àküzǘ lo vesüvelo, tilehi ahu tsüghü-bubushi qa ananie.’
14“Kughengu kutomo kukusü shike, ikemu khami likhi kìshelue.”
Rommi Kükau lau Zame tsükeu Vehu
15Ikelo Phariseemiqo ye khalau ipeve püzü Jisü no pikeu tsaqo lono pa likhi pa kitimeve niye kuchughue. 16Phariseemiqo no panongu khopemiqo eno Herod papemiqo puwu no ishi pipe, “Akükütsüu, ningu no ithi akeu ye no ye kikhikighimi lakhi eno Alhou laghi kuchou kiqi lono kütsü achenie. No ye kütami no züluve chekemi kumo, kughengu pano ye khuu keno no ye tipau akhotoshi chemo ke. 17Tishiaye hipau lo okükümsü kiu ani keno ningu vilo pitsülo. Rommi kumokemiw zame pesü Caesar#22:17 Momu Rommi qhasükükau. tsükeu ye achipi keo mokea?”
18Ikemu Jisü ye panongu müqü lhoküsa ithi akehu ishi pi, “Nongu kühaküghaqo, nongu ye kushiye ikitime niye pükapütsa ani kea? 19Zame tsü kelo peitha chekeu ghükayi ipiyeju lo.” Panongu no Rommiw ghükayi#22:19 Momu denarius. lakhi pa lau peighi, 20ikelo pa no panongu vilo iniju, “Ghükayi lo akeu hiye khuu julho eno khuu shisü püani kea?”
21“Rommi kükau ke,” ipi panongu no khochile.
Tileno pa no panongu vilo pi, “Imaye kiu no Caesarʼw#22:21 Caesar ye Rommi kükaqha kükau ke. keno Caesar tsüchilelo eno kiu no Alhouʼw keno Alhou tsüchilelo.”
22Kughou panongu no ti chilu keno, panongu ye akichiqhive. Ikehu panongu ye pa qhive no wuve.
Xülekuthu lo Külakupu
23Tipa tsalà lo xülekuthu kühae ipi chekemi Sadduceemiqo no Jisü lau ighino iniju. 24“Akükütsüu, Moses no pikeu ye tsalá timi lakhi no anuli shimo no thive aye, pa thiküzüu no pa nipu valuve no anuli-kughuko tsü püzü pa ghenguno saputhu tsü moayesae ipie. 25Ningu gholo athiazü tsünì ache, ike akichiú no anipu lu eno thive, ikemu anuli shimo kehu, pa thiküzüu no pa nipu valuve. 26Titoi athiküzüu akiniù eno aküthüu ghí eno iqi akütsüniu kutólo ghí tishive. 27Ashekha lo atotiu ghí thive. 28Imaye itehi, xülekuthu tsalà lo li ye khuu nipu shive nani kea? Kughengu panongu kümtsü no li lupe püani ke?”
29Jisü no khochile, “Nongu no Kuchoyesü mu mütha Alhou küká ghilimu ithimo keu ghenguno nongu ye shipimi anie. 30Xülekuthu tsalá lo timiqo ye akibo shikeu momu külakupu tsükeu shimo nani; panongu ye kungugha lo kungumiqo toive nani. 31Ikemu kithimi xülekuthu tsà lo, nongu ye Alhou no nongu vilo kiu pipüani keno phimla aphi keshea? 32‘Ni ye Abraham Lhou, Isaac Lhou, eno Jacob Lhou,’#22:32 Ipe 3:6 ipi ke eno pa ye kithimi Lhou kumoe ikemu küxümi Lhou ke.”
33Kughou panongu no ti chilu keno, aqokitikhi timiqo ye Jisü kükütsü iní pesü apuchopungove.
Azakütsü Akijeu
34Jisü no Sadduceemiqo ghehasüvae ipikeu Phariseemiqo no chilu kelo panongu ghí hekütsüluve. 35Panongu gholo ayeza lo shitsau hu no Jisü peju ghi ishi iniju: 36“Akükütsüu, ayeza lo khipau no azakütsü akijeu kea?”
37Jisü no khochile: “ ‘Omlo, ongulho eno okükümsü kümtsü pesü O Mipeu O Lhou kimiyelo.’#22:37 Zaki 6:5 38Hino atüghiu eno azakütsü akijeu ke. 39Eno akiniù ye titoi: ‘Olikhi otoi okisüghümi kimiyelo.’#22:39 Achine 19:18 40Ayeza eno tungkupumiqo kükütsü kümtsü azakütsü hiküma shou bepe ani.”
Messiah ye Khuno Nu Kea?
41Phariseemiqo hekütsü pesü aqoshi ngo akelo, Jisü no panongu vilo iniju, 42“Messiah ye khuno nu ipi nongu ye kümsü ani kea?”
“David Nu ke,” ipi panongu no khochile.
43Pa no panongu vilo pi, “Imaye kushiye David ye Aghungú lono ‘Ampeu,’ ipi pa ku kea? Kughengu pa no ishi pi,
44“ ‘Ampeu no I Mipeu vilo pi:
“Ino oghümiqo pesü
opukhu qholo qhitsümo ke kutólo
i-u ajeu iqalo.” ’#22:44 Leshe 110:1
45Imaye David no pa vilo ‘Ampeu,’ ipi aye kíshi no pa ye David nu shini kea?” 46Timi khuu nomu atsa lakhimu khochile mülave, eno tipau tsalà thiu pa vilo iniju nikeu lo timi kümtsü no ighüve.
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
