Matthew 18
18
Kungugha kükaqha lo Kümtsü Nguno Akijeu
1Tipau tüqhüdolo akhopemiqo no Jisü lau ighino iniju, “Kungugha kükaqha lo khuu no akijeu kea?”
2Jisü no itimi lakhi pa lau ku saighi pe no panongu mütá dolo qhie. 3Eno pa no pi: “Ino kuchou tsà nongu vilo pìní, nongu no kilive püzü itimi lakhi toivemo ke thaqhülo, nongu ye khilemu kungugha kükaqha lo ilo müla nani. 4Tighenguno, khukhumu itimi lakhi hipau toi aqhokigheu shiluve keu no kungugha kükaqha lo kümtsü nguno akijeu ke. 5Eno khukhumu ije lono itimi hitoi keu sasüni keno ni sasü anike.
Axiné Shive Peniye Peju keu
6“Timi khukhumu itimi kitilaqo toi ipülü chekemiqo pelo veqhive pe aye, timi tipaqo ghengu ye athì kütsüghǜ tuqu kijè pesü pano kuwo homüxa tshüve no azüghi kuthò lo vesüve keu pavie. 7Ayeghiqha ghengu ahaküsapue! Kughengu ayeghiqhaʼw thimeqo no timiqo pelo axiné lo ilove pe cheni ke. Hitoi keu ye ighi anani, ikemu timi khuu vechewo tipaqo ighini timi tiye ahaküsapue. 8Tsalá o-u momu opukhu no omüsü sasü axiné shive pe aye, ti ghitha pe pevelo. Oghengu ye a-u kini momu apukhu kini xapusü alhomi lo vesüve kepu ye, aphi-au khoshe shive momu apukhu kighichemi shive no lhokta küxüpu lo ilolu keu pavie. 9Eno tsalá onhethi no omüsü sasü axiné shive pe aye, ti lejope pevelo. Oghengu ye anhethi kini xapusü amiyizü lo vesüve kepu ye anhethi lakhi likhi pusü lhokta küxüpu lo ilo keu pavi ke.
Ambe Pühave keu Pesü Kimghi piye
10“Nongu ye müthamini hipaqo kititi gholo lakhimu jukünatha kepu kumoe, kughengu ino nongu vilo pi anike, kungugha lo panonguw kungumiqo ye pülhapuju I Pù gi ithulu achenie. 11Kughengu Timi Nu ye pühave kemi phu niye eno xalu nike ighie.”#18:11 Kaku hami lo ye ajò hipau küha eno Lk 19:10 lo akeu athoshi peitha cheni.
12Nongu ye kíshi kümsü ani kea? Tsalá timi lakhi no ambe aqhe akelo, tipaqo dolo lakhi no itsü wuve aye, pa ye lhotoku-tokú atoghiqo lo tishi qhive no lakhi itsü wuve keu hu phumoni keshea? 13Ino kuchou tsà nongu vilo pìní, tsalá pa no ti phuluve aye, pa ye ambe lhotoku-tokú itsü wumo no akeqo nguno alau hi lakhi shou alokivi shishe ananie. 14Tihutoi nongu pa Pù kungugha lo akeu ye hipaqo kititi gholo lakhimu pühave penishimoe.
Akukuhou lo Axiné Shive Keu Vehu
15“Tsalá othiküzüu momu ochepu no oshou axiné shive aye, wu no panongu kipimí kichephe tsülo, eno tiye nokujo dolo likhi no ithikilelo. Tsalá panongu no otsa iní tsü aye, no ye panongu züluvae. 16Ikemu panongu no otsa initsümove aye, ogholo timi lakhi momu kini sawulo, ‘tishianguno thopimi kini momu küthü shepe aghí keu vechewo xakütha shilu nani.’#18:16 Zaki 19:15 17Tsalá tishive kethiu ghí panongu no otsa initsümo aye, tipau pesü akukuhou vilo pilo; eno panongu no akukuhou tsà ghí initsümove aye, zame küqhami momu Jewkumomi lakhi toi panongu peithalo.
18“Ino kuchou tsà nongu vilo pìní, nongu no ayeghi lo kiu-kiumu khave aye kungugha lo ghí khave nani eno nongu no ayeghi lo kiu-kiumu kuqhove aye kungugha lo ghí kuqhove nani.
19“Itaghi ino kuchou tsà nongu vilo pìní, tsalá ayeghi lo panongu no avehupu shi akeu ghenguno kiu-kiumu khu kelo, nongu gholo mikini nomu puloküqhalu aye, I Pù kungugha lo akeu no panongu ghenguno shive tsü nani. 20Kughengu khilehi mikini momu küthü ije lono kumqoni keno, ni ye tilehi panongu gholo anie.”
Akipimí Qhitsü müla keu Qeu Pesü Kimghi piye
21Tile Peter no Jisü lau ighino iniju, “Ampeu, ithiküzüu momu ichepu no ishou axiné shive kelo niye ghuthu khijehi akipimí qhivetsü kepu kea? Ghuthu tsünì kutólo keshea?”
22Jisü no khochile, “Ino ovilo pìní, ghuthu tsünì kumoe, ikemu lhotsüni no ghuthu tsünì kutólo ke.
23“Tighenguno, kungugha kükaqha ye kükami lakhi no pa qemiqo sasü kihikülayive no xathave niye shikeu hutoi ke. 24Pa no kihikülaithu kelo timi lakhi no shuna jolabo 10,000#18:24 Shuna jolabo 10,000 ye atsala lakhi jume ampe 20 qelu keu me qhemi ke. pa piashe pù akeu pa lau saighi. 25Timi tipau no pa piagha lò müla no akehu, ampeu no pa vilo api love kepu shi, pa ngò pa nipu anuli eno pa no pighi akeu kümtsü jevelo ipi azah tsüve.
26“Ikelo aqeu hu no ampeu zülo ikiqi qhoqhünhe püzü pa qhüiniju, ‘Kimiye no ado hami itsü aghílo, ino kümtsü lochileve nani ke.’ 27Aqeu mipeu hu no pa kimiyeqhiyive püzü api-ashe xachileve tsü no pa puwuve.
28“Ikemu kughou aqemi hu no khalau ipeve keno, pa küsàmi aqemi lakhi pa piashe ghükayi 100#18:28 Hiye atsala 100 qe keu jume qhemi ke. pa tsü kepu shi akeu sasü kusholu. Ikelo pa no tipau kuo lono tsüqüluve no küpüha thuve kemtsa hitoi khu, ‘Nono itsü kepu shi akeu itsüvelo!’
29“Pa küsàu aqeu hu no pa zülo ikiqi qhoqhünhe no pa qhüiniju ghi ishi pi, ‘Kimiye no ado hami itsü aghílo, ino ti kümtsü lochileve nani ke.’
30“Ikemu pa no milive. Tishini ke züqhulo wu püzü pa küsàu aqeu hu no api-ashe lovemo ke kutólo akughuki lo khathave. 31Kughou aqemi kütamiqo no ti ithulu kelo, panongu ye axuideve eno wu püzü ampeu vilo kiu shive keno kümtsü pesü pive.
32“Tile ampeu no aqeu hu kusü no ishi pi, ‘No ye küsakügha qeu ke, nono ivilo qhüiniju ke ghenguno ino opiashe kümtsü qhivetsü ke. 33Ino okimiyeqhiyive keu toi, no ghí oküsàmi aqeu lau kimiyeqhiyi moayesa ke kumo keshea?’ 34Pa mipeu no amlokighide lau no pa tsü kepu shi akeu kümtsü lochileve moke kutólo ghimeqhi ape niye pa pesü akughuki jukükütsümiqo u lo sǘvetsü.
35“Nongu no nongu mulo lono nongu thiküzümi momu achelimi kipimí qhive tsümo aye, I Pù kungugha lo akeu ghí hitoi nongu lakhi-khi peitha nani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
