Matthew 17
17
Aju Pekilive keu
1Atsala tsügho thiu Jisü no pa gholo Peter, James eno James thiküzüu John ishi sasü naghuto qhemghai keu lakhi lo iku. 2Tilehi panongu gizü lono pa ju pekilive. Pa gi no khetsünhe küvü toi ithulu eno paw tiphimini no aküvü hutoi miyetsüghoive. 3Paikhavi lono tilehi panongu zülo Moses ngò Elijah no ipeghi püzü Jisü sasü küptsa akeu ithulu.
4Peter no Jisü vilo pi, “Ampeu, ningu ye hile ngo akeu pavi anie. Nono pulo aye, ino apushonha küthü mülà pukuveni; lakhi no oghenguno, lakhi no Moses ghenguno eno lakhi no Elijah ghenguno shitsünie.”
5Peter no piaphi lono, khüngküsü vüqai keu no panongu küzüpholuve, eno khüngküsü lono asütsa lakhi no ishi pi, “Hiye ino kimiye chekeu Nu ke; pa lau ilokiqi acheni. Pa gholulo!”
6Kughou akhopemiqo no ti chilu keno, panongu ye shishe müsàve, eno agi pishiqho pe ayeghi lo ikiqive. 7Ikemu Jisü no ighino panongu bu püzü ishi pi, “Ithuvelo eno müsà kevilo.” 8Kughou panongu no jupuku keno, Jisü likhi thono kütami ye aghimove.
9Panongu no naghuto lono iqiche kelo Jisü no panongu vilo ishi azah tsü, “Timi Nu no akìthí lono xülethuve miphi kutólo, nongu no kiu ithulu keno khuu vilomu pikevilo.”
10Akhopemiqo no pa vilo iniju, “Tishiaye kushiye ayeza kükütsümiqo ye Elijah paghi ighi moayesa kepi picheni kea?”
11Jisü no khochile, “Mütsümisheive nikeu ghenguno, Elijah paghi ighino thowkha kümtsü kutò pe qhi nani. 12Ikemu ino nongu vilo pìní, Elijah ye ighivea kemu panongu ye pa jukimchi mülave, ikemu panongu no pa shou shinishi chekeu kümtsü shiluvae. Tihutoi Timi Nu ghí panongu u lono imeni chenie.” 13Tithiu no pa khopemiqo ye, Jisü ye John Baptiz kishiu ghili pesü panongu vilo piani kepi vethalue.
Tüghaküsa no Tsüghape Akeu Itimi Jisü no Shipivi
14Kughou panongu no aqokitikhi lau ighi keno, timi lakhi Jisü lau ighino pa zülo qhoqhünheluve. 15Pa no ishi pi, “Ampeu, inu kimiye tsülo, pa ye kilighakipemi eno ighono imé acheni. Pa ye ado kutomo lono ami lo eno azü lo ilulove achenie. 16Ino pa sasü okhopemiqo lau wu kemu panongu ye pa shipivilumoe.”
17Jisü no khochile, “Nongu pülükümla eno hekibide tiqhelimiqo, ni ye khitohi nongu sasü anani kea? Eno ni ye khitohi nongu gholo ache nani kea? Onu ilau sasü ighilo.” 18Jisü no tüghaküsa lomipi, ikelo tüghaküsa no anu phi lono ipeghive, eno anu hu ye tipau tüqhüdo lono viluve.
19Tithiu pa khopemiqo no Jisü lau lomo shi ighino iniju, “Ningu ye kushiye tüghaküsa haphe mülave kea?”
20Pa no ishi khochile, “Kughengu nongu ye aküpülü ighono mikhe anike. Ino kuchou tsà nongu vilo pìní, nongu no aghanethi pahi likhimu aküpülü aghí aye, nongu no naghuto hipau vilo, ‘Hile no hulau ithawuvelo,’ ipi kelo tipau no ithawuve nani. Oghenguno kiumu shikümlapu küha nani. 21Ikemu hitoi keu ye akighini eno kümvü keu likhi no haphelu nanie.”#17:21 Kaku khami lo ye ajò hipau ye küha eno khami lo ye Mk 9:29 lo yèpüa keu toi ani.
Jisü no Akiniù Pa Kìthí Vehu Pichho
22Kughou panongu no aqoshi Galilee lo ighi keno, Jisü no panongu vilo pi, “Timi Nu ye ikhiphe pesü timiqo u lo sǘve tsüní cheni. 23Panongu no pa pìthíve nani, eno atsala aküthüni lo pa ye xülethuve nani.” Ikelo akhopemiqo ye amloghime no chhitoive.
Achineki Zame
24Kughou Jisü ngò pa khopemiqo no Capernaum lo ighi keno, achineki zame ghükayi kini qhà chekemiqo no Peter lau ighi eno pa vilo iniju, “Nongu kükütsüu ye achineki süqha tsü cheni kema?”
25“Iyei, pa ye tsü chenie,” ipi Peter no khochile.
Kughou Peter no aki lo iloghi keno, Jisü paghi no pa vilo ishi iniju. “Simon, no ye kíshi kümsü ani kea? Ayeghiqha lo kükamiqo ye khunoqo lau no zame lu cheni kea; pano likhi pano tianuliqo lau no keo kütami tianuliqo lau no kea?”
26“Kütamiqo lau noe,” ipi Peter no khochile.
Ikelo Jisü no pa vilo pi. “Tishiaye anuliqo ye tsü pemo kepue.” 27“Ikemu panongu shikulosümo nike ghenguno, ayizükucho lo wulo eno akha kümsüpú yì lakhi vesülo. Akha atüghiu küghalu keu tipau kichí sükhoju aye tile ghükayi bidí aghí nani ke. Tipau ikhilulo eno ighenguno ngò nongu ghenguno zame panoqo tsüvelo.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
