Matthew 19
19
Akibo Küghüxa Vehu
1Kughou Jisü no hipaqo kümtsü pitave keno, pa ye Galilee qhive no Jordan nguno hukukuu Judea ko-aqha lo wuve. 2Timi kutomo no pa pape che, eno pa no tilau no panongu shipivi tsüae.
3Ikelo Phariseemiqo khami Jisü peju niye pa lau ighi. Panongu no Jisü vilo iniju, “Ayeza kiqi lo timi lakhi ye akiqi kui-kiumu aghí aye pa nipu sasü küghüxave keu ye achipi keshea?”
4Pa no khochile, “Nongu ye phimla aphi keshea? ‘Abothu lono Lhokipheu no pama pesü kipitimi eno totimi shi lhotsüe,’#19:4 Bothu 1:27 5eno ishi pi, ‘Hi ghenguno kipitimi lakhi ye papù eno pazá qhive no pa nipu sasü kümtsa küghünauve cheni, eno pama ye aphi-ashi lakhi shive cheni.’#19:5 Bothu 2:24 6Ikehu pama ye mikini kumovae ikemu ashi lakhi shivae. Tighenguno Alhou no kiu kime küqhavetsüa keno khiu pelomu hexavetsü pe kevilo.”
7Panongu no iniju, “Tishiaye kushiye Moses ye timi lakhi ye akibo küghüxave keu shepe kaku pesü pa nipu tsüve no li puwuvelo ipi azah tsü kea?”
8Jisü no khochile, “Moses no nongu nipùnoqo sasü küghüxaluve kepu puloza tsükeu ye nongu mulo no mükamüghai keu ghenguno ke. Ike thono abothu lono hitoi shi chekeu kumoe. 9Ino nongu vilo pìní. Khuu no kipito mikucho kumo vehu ghengu nguno alau pa nipu sasü küghüxave no totimi kütami sasü külakupu shini keno pa ye shupuvae.”
10Akhopemiqo no pa vilo pi, “Tsalá akimi eno pa nipu pama dolo hitoi keu shikepu shi aye, külakupu shimo keu pavie.”
11Jisü no khochile, “Timi kümtsü no atsa hipau ikhilu keu shimo nani, ikemu vethakulu tsüpüa kemiqo likhi no ikhilu nani. 12Kughengu shoko shi ghi punú kemi acheni, eno khami ye timi no shoko kughulhove tsü kemi acheni, eno khami ye kungugha kükaqha ghenguno shoko küxü ghola kìsheluve no xükeu acheni. Khunoqo no hipau ikhikulupu keno ikhilu moayesae.”
Jisü eno Itimiqo
13Tile timi khami no Jisü pelo itimiqo shou a-u be no kümgha tsüpe niye pa lau saighi. Ikemu akhopemiqo no panoqo lomipi.
14Ikelo Jisü no pi, “Itimiqo pelo ilau ighi pelo, eno panongu lakha kevilo, kughengu kungugha kükaqha ye hitoi kemiqow ke.” 15Kughou pa no panongu shou pa u bevetsü keno, tithiu pa ye tile no wuve.
Kiními eno Alhou Kükaqha
16Timi lakhi Jisü lau ighino pa vilo iniju, “Akükütsüu, lhokta küxü ithulu nike ghenguno ni ye akivipu thime kiu shimoayesa kea?”
17Jisü no khochile. “No ye kushiye ivilo akivipu vehu iniju ani kea? Akivi ipikeu ye milakhi likhi ke. Tsalá nono aküxüpu lo ilonishi aye, no ye azakütsüqo pelu moayesae.”
18“Khipaqo kea?” ipi pa no iniju.
Ikelo Jisü no khochile, “ ‘No ye timi ghiqhi kevilo, no ye shupu kevilo, no ye püka kevilo, no ye akimiki thopi shi kevilo, 19Opù eno ozá gihulo,’#19:19 Ipe 20:12‑16; Zaki 5:16‑20 eno ‘Olikhi otoi okisüghümi kimiyelo.’#19:19 Achine 19:18”
20Apumi hu no ishi pi, “Ni ye hipaqo kümtsü peluvae, ni ye kiu shikupu miphi kea?”
21Jisü no khochile, “Nono kupukülai shinishi aye, wolo eno omheghi kümtsü jeve no kumlhomiqo tsüvelo, eno no ye kungugha lo akiní ania ke. Tisheno ighi püzü ipapelo.”
22Kughou apumi hu no hi chilu keno, pa ye amloküsa shi wove, kughengu pa ye ighono kiními ke.
23Tisheno Jisü no pa khopemiqo vilo pi, “Ino kuchou tsà nongu vilo pìní, kiními lakhi no kungugha kükaqha lo ilolu nikeu hu ye kushokütsüe. 24Itaghi ino nongu vilo pìní, kiními lakhi no Alhou kükaqha lo ilolu nikeu ye ut lakhi no ayipuki lono ipu-ipeve keu no akümláue.”
25Hipau chilu kelo akhopemiqo ye shishe akichiqhive no ishi iniju, “Tishiaye khunoqo no xalu nani kea?”
26Jisü no panongu ju no ishi pi, “Timi ghenguno hiye kushokütsüpu ke, ikemu Alhou ghengu ye thowkha shikulupu anie.”
27Peter no Jisü khochile, “Ningu ye opape nike ghenguno kümtsü qhikhavae! Imaye ningu ghenguno tilehi kiu aghí nani kea?”
28Jisü no panongu vilo pi, “Ino kuchou tsà nongu vilo pìní, thowkha kümtsü akithé shikitheve kelo, eno kughou Timi Nu no pa juküvü kükalakhü lo iqani keno, nongu ipape chekemiqo ghí akükalakhü chighikini lo iqa no Israelmi lagha chighikini shou xaküthau shi nani. 29Eno ije ghenguno aki-alu, athiküzümi momu achelimi, apù momu azá, anipu momu anuliqo qhive kemi kümtsü ghuthu aqhe no küghüsü ithulu nani eno lhokta küxü ighílu nani. 30Ikemu atüghimi kutomo no ashekhami shive nani eno ashekhami kutomo no atüghimi shive nani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
