Matthew 16
16
Amichipu Khu keu
1Phariseemi ngò Sadduceemiqo no Jisü lau ighino pa peju ghi pa vilo kungugha lono ighi keu amichipu piyelo ipi khu.
2Pa no khochile, “Kughou avelau shiveni keno, nongu no ishi pi cheni, azümlhü ye aloni cheni, kughengu atsütsǘ ye huchuhuyi ani 3eno inaqhe shive aye, ‘Ishí ye pasapagha tsalà shini cheni, kughengu atsütsǘ ye huchuhuyi eno züchiyi ani,’ ishi pi cheni. Nongu ye atsütsǘ lo ipeghi akeu ghili kíshi pìní keno ithi anie, ikemu nongu ye ado ghuloki michipu ghiliqo ye pilu chemoe. 4Küsakügha eno amikucho kumo tiqhelimi no amichipu phu cheni, ikemu Alhou no tungkupu Jonah lau amichipu tsükeu nguno alau kütau ye tsümo nani.” Tisheno Jisü ye panoqo qhive no wuve.
Phariseemi ngò Sadduceemiqoʼw Kholaqhi
5Panongu no ayizükucho vechesü ikughi kelo akhopemiqo ye asho pe nikeu kümsümave. 6Ikelo Jisü no panoqo vilo pi, “Kutokupuilo, Phariseemi ngò Sadduceemiqoʼw kühakügha lichhe lono nongu likhi nongu jukuto alo.”
7Panongu dolo hipau vehu küptsa kilé apüzü ishi pi, “Hiye ningu no asho lakhimu peighimove keu ghenguno ke.”
8Panongu no küptsa akeu ithive no Jisü no iniju, “Nongu aküpülü kitila likhi akeqo, nongu ye kushiye nongu dolo asho küha keu ghenguno küptsa ani kea? 9Nongu ye itehi kutólo vethalu miphi keshea? Nongu ye timi 5,000 ghenguno ashopa pungu, eno ashoghi kichhi khijehi kichekütsülu keno kümsümavea keshea? 10Momu timi 4,000 ghenguno ashopa tsünì, eno ashoghi kichhi khijehi kichekütsülu keno kümsümavea keshea? 11Kíshi püzü ni ye nongu vilo asho ghili piamoke ipi nongu ye vethamla aphi kea? Ikemu Phariseemi eno Sadduceemiqoʼw kholaqhi lau no olikhi ojukuto alo.” 12Tithiu no, Jisü ye panongu vilo asho lo kholaqhi peitha chekeu ghili kumo no, Phariseemi ngò Sadduceemiqo kükütsü lachile akeu ghili piani kena ipi vethalu.
Peter no Jisü ye Messiah Kepi Shuphetsü
13Kughou Jisü no Caesarea Philippi ko-aqha lo ighi keno, pa no pa khopemiqo vilo iniju, “Timiqo ye ni Timi Nu pesü khuu ipi cheni kea?”
14Panongu no khochile, “Khami no pikeu ye no ye John Baptiz kishiu, kütami no pikeu no Elijah ipi cheni; eno itaghi khami no pikeu no Jeremiah momu tungkupumiqo dolo lakhi ipi chenie.”
15“Imaye nongu ye kíshi kea? Nongu ye, ni pesü khuu ipi cheni kea?” ipi pa no iniju.
16Simon Peter no khochile, “No ye xü akeu Lhou Nu Messiah ke.”
17Jisü no khochile, “Jonah nu Simon, no ye akümghaue, kughengu hiye timi shi-ajì no olau pephe piye ke kumoe, ikemu I Pù kungugha lo akeu no ke. 18Eno ino ovilo pìní, no ye Peter#16:18 Greek tsà lo Peter kiqi ye atuqu ipi ani. ke, eno atuqu hipau shou ino ikukuhoki mülà puku nani, eno Hades khagho ye hipau theqhi lumo nani. 19Ino kungugha kükaqha khaqhiyiqo pesü otsü nani; nono ayeghi lo kiu-kiumu khave aye kungugha lo ghí khave nani, eno nono ayeghi lo kiu-kiumu kuqhove aye kungugha lo ghí kuqhove nani.” 20Tisheno pa no akhopemiqo vilo pa ye Messiah kepi khuu vilomu pikevilo pi azah tsüve.
Jisü no Pa Kìthí Ghili Pichho
21Tile no huthu no Jisü no akhopemiqo vilo pa ye Jerusalem lo wu moayesa nikeu eno kichimiqo, achinetomi eno ayeza kükütsümiqo u lono aghime shini keu, eno pa pìthíve moayesa nikeu ikemu atsala aküthüu lo ye xüputhuve nikeu ghili pesü chixechilei pitsü.
22Peter no Jisü sasü ayixeu wu püzü pa lomipi ghi ishi pi, “Ampeu, tishimoe, khilemu olau tishi pemo nani.”
23Jisü no kugho ighino Peter vilo pi, “Ilau no chevelo, Satan! No ye ighenguno aküpüxapu shi anie; okükümsü lo Alhou lau no ighi keu kükümsüqo kumo püzü timi lau no ighi keu kükümsüqo likhi anie.”
24Tisheno Jisü no pa khopemiqo vilo pi, “Ikhopemi shinishi kemi ye pa likhi pa milive moayesa eno paw kros xapu no ipape moayesae. 25Kughengu khuno no pano likhi pano küxü süsho nishi cheni keno pühave nani, ikemu khuno no aküxü ikhiphe pe ighenguno tsüveni keno xaluve nani. 26Timi lakhi no ayeghiqha kuchopu paw shive aghí namu, pa ngulho xamlave aye kiu alá ani kea? Momu timi lakhi ye pa ngulho theli lo kiu tsüchile kulupu kea? 27Kughengu Timi Nu ye papù juküvü lono paw kungumiqo sasü ighi nani, eno tisheno pa no timi lakhi-khi no kiu mülà püaghini keno tipau kiqi lono qesaxu tsü nani.
28“Ino kuchou tsà nongu vilo pìní, hilehi igholo puthugho akemi dolo khami ye Timi Nu kükaqha ithulu miphi züu ye akìthí michemo nani.”
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
