Matthew 15
15
Shikuchubeve Chekeu
1Tishi akelo Phariseemi eno ayeza kükütsümiqo khami Jerusalem lono Jisü lau ighino ishi iniju, 2“Kushiye okhopemiqo ye püzüu apù-asǘqow pimheye hexa cheni kea? Panongu ye chu-shoni kelo panoqo u mütsü chemoe!”
3Jisü no khochile, “Eno nongu ye kushiye nonguw pimheye ghenguno Alhou zakütsü hexa cheni kea? 4Kughengu Alhou no pi, ‘Opù eno ozá gihulo’#15:4 Ipe 20:12; Zaki 5:16 eno ‘Khukhumu papù momu pazá ghusho aye pìthíve kepue.’#15:4 Ipe 21:17; Achine 20:9 5Ikemu nongu no ishi pi cheni, tsalá timi khukhumu papù momu azá kuphulu kepu shi akemu, hiye ‘Alhou mülá ani,’ ipi shupheve aye, 6panongu pelo tipau pesü apù momu azá gihu pemove chenie. Ikehu nongu no nonguw pimheye ghenguno Alhou tsà pesü avehu küha keu shivetsü anie. 7Nongu kühaküghaqo! Isaiah no tungkuptsa lono nongu ghili pi kelo pa ye achipishi pie:
8“ ‘Timi hipaqo ye pano kichí lo ye igihu cheni,
ikemu panongu mulo ye ilau no putosü pe anie.
9Panongu ye adou lono imülá cheni;
panongu kükütsü ye timi yezaqo ghola likhi ke.’#15:9 Isa 29:13”
10Jisü no aqokitikhi vilo pa lau ighilo pi ku no ishi pi, “Inilo eno vethalulo. 11Kiu akichi lo ilove cheni keno tino timi shikuchubeve chemoe, ikemu kiu akichi lono ipeghini keno tipau no timi shikuchubeve cheni.”
12Ikelo akhopemiqo no pa lau ighino iniju, “Phariseemiqo ye nono hipau pikeu chilu kelo panongu shikulosüve ake no ye ithi ani kema?”
13Pa no khochile, “Asütsüni khijehi I Pù kungugha lo küau no shosümo keno akuhu lono nhüve nani. 14Panoqo püna kevilo; panongu ye anhethi iche kemi sakiphemiqo ke. Tsalá anhethi kighichemi no anhethi kighichemi saphe aye, kinikujo aqò lo ikiqi ilove nani.”
15Peter no pi, “Kimghi piye keu tsà ningu lau hepho-piyelo.”
16Jisü no panoqo vilo iniju, “Nongu ye itehi kutólo vethamla aphi keshea? 17Akichi lo kiu-kiumu ilo keu ye akive lo ilove no aphimpi lono ipeve cheni ipi nongu ye mütha keshea? 18Ikemu timi kichí lo kiu ipeghi keno tiye amlo lono ipeghi cheni, eno tino panongu shikuchubeve cheni. 19Kughengu amlo lono alhoküsa kükümsüqo—ghikiqhi, shupu keu, kipito mikucho kumo, aküpüka, kichileu shepe eno pipütha keu ipeghi cheni. 20Hipaqo no timi lakhi shikuchubeve cheni; ikemu a-u mütsümo no chu keu ye pa shikuchube chemoe.”
Canaanmi Topumi Küpülü
21Tipau-a qhive no Jisü ye Tyre ngò Sidon ko-aqha lo wuve. 22Tipau sükümxa lo Canaanmi topumi lakhi no pa lau ighino ighamuku pi, “Ampeu, David Nu, ikimiyekütü tsülo! Ingá ye tüghaküsa no tsügha pesü ani eno ighono imé anie.”
23Jisü ye atsa lakhimu khochilemove kehu pa khopemiqo no pa lau ighino qhüiniju, “Li puwuvelo, kughengu li ye ighamuku ghi ningu pape chenie.”
24Jisü no khochile, “Ni ye Israelmi ambe toi pühave kemiqo ghengu likhi no puwu ke.”
25Topumi hu no ighi püzü Jisü zülo qhoqhünhe no ishi pi, “Ampeu ikuphu tsülo.”
26Pa no khochile, “Anuliqo sho pesü atsǜqo veqhitsü nikeu ye achipi kumoe.”
27Li no pi, “Iyei, tishi ke Ampeu. Tishimu atsǜqo ghí panongu mipeu ghulhu lipa lono phekiqhi-kighi chu chenie.”
28Tishi kelo Jisü no li vilo pi, “Totimio, no ye aküpülü kijè akemie! Nono qhüiniju keu toi shive tsüae.” Eno li ngá ye tipa mütsa no viluve.
Jisü no Timi 4,000 Lojí
29Jisü ye tipau-a qhive no Galilee züghi küdau wuve. Tisheno pa ye naghuto küdau iqho no iqave. 30Timi kutomo no apukhu kinitave kemi, anhethi kighichemi, aphukhu kighichemi, atsa pimla kemi eno kütami kutomo Jisü lau süghi püzü pa pukhuphi lo qhie; eno pa no panoqo shipivi tsüe. 31Atsa pimlave kemi no atsa piluve, aphukhu kighichemi no viluve, apukhu kinitave kemi no alachelu eno anhethi kighichemi no ithuluve keu timiqo no ithulu keno panongu ye akümzave. Eno panongu no Israel Lhou sheqhe.
32Jisü no pa khopemiqo ku püzü ishi pi, “Ni ye timi hipaqo ghenguno imulo ighiqhiyi ani; panongu ye igholo atsala küthü ngovea eno chu kepu kiumu kühavae. Ni ye panongu pelo müzüthiqhiyi wove penishi amoe, kughengu panongu ye lhove no alà lo ikiqive nosake.”
33Pa khopemiqo no khochile, “Ningu ye yenguike-a hipau lo khile no aqokitikhi hijehi lojí nikeu asho lukümkha shi ithuluni kea?”
34“Nongu gholo ashopa khijehi ani kea?” ipi Jisü no iniju.
Panongu no khochile, “Tsünì anie eno akha kititi ghí hami anie.”
35Pa no timi aqokitikhi vilo ayeghi lo iqavelo ipi. 36Tisheno pa no ashopa tsünì eno akha ikhilu, eno kughou pa no Alhou shikimthive keno, pa no tipaqo süpho eno akhopemiqo tsü, eno akhopemiqo no timiqo kijétsü. 37Panongu kümtsü no aghakiqishi chulue. Tishive kethiu akhopemiqo no chukhamove keu munomughoqo ashoghi tsünì chhitoi pekütsülue. 38Eno timi chukemiqo kihiju kelo totimi eno itimiqo sümo no timi qhethonhe bidí kihilue. 39Timi aqokitikhi puwove kethiu, Jisü ye ashuka lo iku no Magadan qhalo wuve.
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
