YUUKA 22
22
Mavavaso Eetaa Sye
1Kwakooya nndu eeva shau ao yoonri na ilyishisha, ao ilikumba, mmbo ashetaa shau isaanu ando a shau imwi, na moonri aana ando a yoonri lyimwi. 2Kwakooya inyinyi lyaaramwa lyikunndye ifisha ando, nawe kakapwa kutani afwa, nndu yeto samu yakwe nnyishetawaa-fo. 3Indi kwakooya kwankya, samu yakwe ishetawaa. 4Na kwakooya kindo ekyo kyileewa kyankooywa maakony akwe kyikee na muu, kiwe ni ng'umbe ao nshungu, ao yoonri mmbo ataa uuru lwa vayo kavii. 5Kwakooya nndu akeeyiisa findo efo ireminy lya misabibu, kara kindo kyakwe kyikalya ireminy lya nndu ungyi, mmbo ashetaa na findo fyooka ireminy lyakwe muni ao fya misabibu yakwe.
6Kwakooya nndu aata muro ukakora ngorosho ukalambukya na nganu shifinge ao tikee ireminy tilakee shivyaa na irema lyikasarumya, yeto apokaa muro eto nkuti nataa.
7Kwakooya nndu aakuya ungyi fesa ao kindo kive nansurumyi, na findo efyo fikaivyo efo mmba kwa nndu yeto, eto mwiiva kantiro nkuti nataa kavii wuuru lwa findo efyo. 8Kwakooya yeto mwiiva nalamanyika, yeto muni mmba nkuti nashe mbee ya Iruva naoore sheelyi nshiwe aleipoo findo fya urooye-fo. 9Wo kindo kitirwa nyinyira, kwakooya ni wa shau, ao nshungu, ao moonri ao soori ao kindo kyoose kirekye, ao nndu akeekapannya kaamba, “Yeki,” mwaandu yeto wa vandu vavii ni kuti weendwa mbee ya Iruva, neeto Iruva ashemoolonngyaa mmbwe mwiirenga, we mmbwe ashetaa yeto ungyi kindo ekyo kavii.
10Kwakooya, nndu aniingya uroye nshungu ao ng'umbe, ao yoonri ao kindo kingyi kyoose sheelyi amwaarya, kindo ekyo kikafwa, ao kikalwaa, ao kikaiwa 11llyo vandu yewo vashekulyisaa mboo mbee ya Iruva kyeyoora sheelyi nnyaleipoo kindo kya uroye-fo, na muni wa vayo nairikkye nare nalatawa. 12Kyeendi kindo ekyo kwakooya mmbo kileiwa nkuti natae uroye. 13Kyeendi kwakooya mmbo kileratuwa ni ifisi, mmbo akyeende noore kive ukureeki nnyashetaa kimaruma kya ekyo kileratuwa ni ifisi-fo.
14Kwakooya nndu aarywa kindo, nakyo kikawonisa nrenga, ao kikafwa, muni nalaiyo kuti natawa. 15Lyo kwakooya yeto muni eeiyo nnyashetawaa-fo, kwakooya ni kindo kyekeerunda mashora, mmbo kileenda indo kyikee mashoreny eetawa.
Mavavaso Nnang'ani a Vandu
16Kwakooya nndu atuusa mwana wa kyika atiri tindi yakwe nawe kalala nawe, ni kuti naute findo fya ukwe nave nka wakwe. 17Kyeendi kwakooya ndeye alema deny iniinngya mwana wakwe, mmbo ashetaa fesa tiinani na masaa yoo akwe.
18Nka nsavi nalarewa na muu-fo. 19Nndu moose ashetuusa na ifisi nkuti naawaa-wa. 20Nndu moose yeto asherasyaa maruva engyi kuuta we Nndumi Iruva nkuti narumatwa deny.
21Kulalammyi muny-fo, nta kulantannyi fya kiila-fo, mashika naakwa ni yeni mwekee veny kulya Misri. 22Kulalyise ukiva nka wa ding'u nta mwana wa ngwera-fo, 23Kwalyisa ukiva vandu va ngata yeyo nawo vakashiwuiya, ni dede nkuti shiite kiiyo kyawo, 24na unyafi lwakwa ni kuti lusaami neeny mmbo mshemuwaa na usu, na vaka vany nawo vasheva vaka va ding'u, na vana vany varewa ngwera.
25Kwakooya kwaakuya nndu nkiva kindo, efo vanduny vakwa, kulashemwava siye yeyo na mbusha ya vayo-fo. 26Kwakooya nndu akurekya soori yakwe nkuti kuimbiirye kulore kwammila, 27mashika soori yeyo ni isara lyakwe lyeesika mwiili, kilammba indo mmbo ashelaaya-kyi? Mashika kyeeri asheshifuyaa nkuti shimwiirikye mashika yeny shikee mwilyillya.
28Kulaara-re Iruva-fo, nta kuladenge nsongoru wa vandu vafo-fo, 29Nta kulakyeeyo yeende fimu fyafo fya mbee. Vana vafo va mmbee mmbo kusheshiningyaa yeny. 30Neewe mmbo kushetanaa indo efo shauny tafo, na moonriny afo, mmbo kushefiraa na maye ando a mikonu mfungare nkonu wa nyanya llyo kushiutye. 31Neeni mmbo mushevaa veele kwakwa yeny, kweekyo mulalye nyama ileratuwa ni ifisi efo ureny-fo, nyama ya vayo mmbo musheyeryaa fite.
Pilihan Saat Ini:
YUUKA 22: MAS2
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
The Holy Bible in Kimashami © Bible Society of Tanzania, 2016.