YUUKA 21
21
Mavavaso a Mashinga
(Nku 15:12-18)
1Na mavavasyo kushevikaa mbee ya vandu yeva n'gu yaa. 2Kwakooya kwaura ishinga Mwebrania, mmbo ashekurunndya ando a myaaka irindaru, mwaaka wa mfungare mmbo asheukaa kwafo neende ekee nleke. 3Kwakooya mmbo alesha kwafo akee muni, mmbo asheukaa-fo ekee muni, kwakooya erie nka, nka yeto wakwe mmbo ashendaa, eriani nawe, 4Kwakooya ni yeto muni kyeny enninga nka yeto, nawe kamwiirya vana va kyuumi na va kyika naasa nka yeto na vana vakwe mmbo vashevaa va Nndumi Iruva yeto muni kyeny na nndu yeto mmbo ashendaa muni. 5Kyeendi ishinga elyo lyikammaamba paa yeny shikunndye nndumi wakwa na nka wakwa na vana nshikunndye ilekwa sheende-fo, 6llyony nndumi yeto wakwe ashemwendee mbee ya Iruva yoo mwangony, ao yoo kyeekony kya mwango, na nndumi yeto wakwe nandoshe kuri na mfuma, llyony neengere indunndya.
7Kwakooya nndu akunda mwana wakwe wa kyika nave kishinga, nnyashendaa sha mwana wa kyuumi-fo. 8Kwakooya nndumi wakwe alasennywa mmbwe, ave nka wakwe namoore, lyony asheirikkyaa nalekeywa, nnyatiri wiidimi lwa inkumba neende kwa vandu vengyi-fo, mmbo kivaa sheelyi mmbo antannya kya ulembi. 9Kwakooya mmbo afingye mwana wakwe, mmbo ashentannya shaasa atannyaa vana vakwe muni. 10Na kwakooya mmbo akunndye yoora nka ungyi, shoonga yakwe yeto na soori takwe na findo fyoose fikwaani na nka nammi sheeto ungyi. 11Naasa kanra nalantannya indo findo efyo firaru llyo ashenraa neende, lyo nnyasheviirywaa masaa-fo.
Mavavaso Kyeendwa ni Nkuushu
12Kwakooya nndu akapa nndu ungyi kafwa, nkuti nawe nawaa-wa. 13Kyeendi kwankooya mmbo ileva nrenga kulore mmbo alellaaya, indi Iruva kammbika maakony afo nshekooraa kundo asherishyaa. 14Kyeendi nndu asora ungyi kya unyafi naambo nandemmbwaa kya nkuushu karishya mmba ya Iruva mmbo ashesomutwaa-fo nandewaa-wa. 15Nndu yeto ashekapaa ndeye ao maye kuti nawaa-wa. 16Nndu kaiva ungyi naambo nankumbe, ao ashekooywa kwakwe kuti nawaa-wa. 17Yeto ashelyisyaa ndeye mboo ao maye kuti nawaa-wa. 18Vandu vakasakkya, na umwi kakapa ungyi na iwe ao ng'unde, lyo nalafwe, lyo kalala kitareny, 19kyeeri ashekwiipoo ny yeenda na nsengye, yeto mwinkapa narewa lyo nataa mikonu yeyo yakwe alereta, nooke-fo nammbavare kutani ashia.
20Na nndu kakapa ishinga lyakwe, ao kishinga kyakwe na mbiiri nawe kafwa nkuti nataiywa, 21kyeendi kwakooya ashia ando a nkonu umwi ao ivii nalataiywa-fo, mashika mmbwakwe.
22Kwakooya womi vakapana vakavavisa nka akufinngye kutani akapa urende lyo nalammbavise mmwasi, nkuti yeto ammbavisa natae kilya mmi wa nka yeto ashambaa lyo nkuti kiinani shaasa valerummbwa mwaandu. 23Kyeendi kwakooya avaviswa mmwasi, llyo ashetaa muu kwa muu, 24iriso kwa iriso, iyoo kwa iyoo, woko kwa woko, urende kwa urende. 25Irumata kwa irumata, kishavere na kishavere, ibushuka na ibushuka.
26Kwakooya nndu akapa ishinga lyakwe iriso, ao iriso lya kishinga kyakwe na ilyikasheesa, mmbo ashellekaa kyeendwa ni iriso elyo lyakwe. 27Ao kakapa ishinga lyakwe kamwiillwa iyoo, ao iyoo lya kishinga kyakwe, mmbo ashenraa kyeendwa ni iyoo lyakwe.
Ishingo lya Yeto Muni
28Kwakooya ng'umbe yakapa nndu Nndumi ao nndu nka na wombe, nawe kafwa, ng'umbe yeyo mmbo ishewaa-waa na mawe, nyama ya vayo ilalyiwa-fo; kyeendi we muni ng'umbe nakureeywa. 29Kyeendi kwakooya ng'umbe yeyo niindi iishivye ikaba vandu, na muni wa vayo ammivywa lyo nalasare, nayo ikawaa nndu nndumi ao nka, ng'umbe yeyo mmbo ishewa-waa na mawe, na muni wa vayo nawe navewaa-wa. 30Kwakooya ndela yakundika kwa nndu, llyony naniingye kya ivauwa muu wakwe. 31Ao kwakooya ng'umbe mmbo yakapa mwana wa womi ao wa kyika na wombe ikandosha ru-ru, ng'umbe yeyo mmbo ishetannywaa indo. 32Ng'umbe ikadosha ishinga ao kishinga na wombe, muni ng'umbe mmbo ashetaa muni ishinga makumi araru ta fesa, na ng'umbe yeyo ishewaa-wa na mawe.
33Kwakooya nndu ashesumaa irina, nare nalalyisikkya, na ng'umbe ao nshungu usheoloka-fo, 34muni irina mmbo ashetaa, asheninngya yeto muni ng'umbe fesa, na kindo ekyo kilefwa kive kyakwe.
35Ng'umbe ya nndu ikakapa ng'umbe ta nndu ungyi nayo ikafwa. Mmbo vashekumbaa ng'umbe yeyo ikee na muu na yaava uuru lwa vayo, na ng'umbe yeyo yafwa nayo mmbo vasheyaavaa, 36Kyeendi kwakooya kyiishiwa sheelyi ng'umbe yeyo mmbo yiishivye ikapa na mbembe, kyeendi muni wa vayo nalasare, llyo muni ashetaa ng'umbe na ng'umbe, na ng'umbe yeyo ifiiye ive yakwe.
Pilihan Saat Ini:
YUUKA 21: MAS2
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
The Holy Bible in Kimashami © Bible Society of Tanzania, 2016.