Ayat-ayat Alkitab Ternama dari ईशायाह 41

Bagikan

तम्हैं निं डरी आथी, तम्हां संघै आसा हुंह! हुंह आसा थारअ परमेशर, तम्हां निं कोही का डरने ज़रुरत आथी! तम्हां लै बल दैणअ मुंह अर थारी मज़त बी करनी मुंह। तम्हैं नढैऊणैं मुंह हाथै ढाकी संघा डाहणैं बच़ाऊई।

हुंह आसा थारअ परमेशर बिधाता, मंऐं किऐ तम्हैं दैहणै हाथै ढाकी खल़ै, तम्हैं निं डरी आथी, थारी मज़त करनी मुंह आप्पै।”

ज़ुंण तम्हां संघै ज़ीद करा, तिन्‍नां पल़णअ शर्मिंदै हणअ, ज़ुंण तम्हां हंतदै अर हारदै-मारदै एछा, तिंयां मरनै पठी संघा हणैं सदा लै खतम।

तम्हैं आणै मंऐं दूर-दूर देश पृथूईए पुंझ़ा का झाल़ी। मंऐं बोलअ तम्हां लै, ‘तम्हैं आसा मेरै दास’ मंऐं आसा तम्हैं छ़ांटै दै, अर मंऐं निं तम्हैं शोटी डाहै।

थारै तिंयां दुशमण निं तम्हां लोल़ी करै बी भेटणैं, ज़ुंण तम्हां संघै जुधा लै एछा, तिंयां हणैं ज़ात पठी खतम।

बिधाता बोलअ इहअ, “याकबे आद-लुआद, तम्हैं आसा होछ़ै ज़िहै किल़ै ज़िहै दुबल़ै! पर तम्हैं निं डरी आथी। इज़राईलीओ, तम्हैं आसा धख ज़िहै! पर तम्हैं निं डरी आथी। थारी मज़त करनीं मुंह आप्पै, अह बैण डाहअ मंऐं इज़राईले पबित्र बिधाता बोली ज़ुंणीं तम्हैं बच़ाऊऐ दै आसा।

पर बिधाता बोला इहअ, “याकबे आद-लुआद इज़राईलीओ, तम्हैं आसा मेरै दास, तम्हैं मेरै साथी आबरामे शोहरू-शोहरी आसा मंऐं आप्पू लै छ़ांटै दै।

मुंह बहाऊंणी तिन्‍नां लै नांगी धारा का पाणींए गाडा, शुक्‍कै खागै बी लाणैं मुंह तिन्‍नां लै पाणींए छ़ो। रेगीस्तानै बी काढणैं मुंह तिन्‍नां लै पाणींए सअर, ज़ात पठी रुखी ज़ैगा बी काढणीं मुंह तिन्‍नां लै पाणींए सोबल़ा ई सोबल़ा।

ज़ेभै मेरी गरीब परज़ा पाणीं लोल़ै होए लागी दी, चिशै तिन्‍नों गअल़ होए शुक्‍कअ द अर तिन्‍नां पाणीं किधी निं भेटे, तेभै शुणनी मुंह बिधाता तिन्‍नें अरज़, इज़राईलो परमेशर आसा हुंह, मुंह निं तिंयां शोटी डाहणैं।

ईंयां गल्‍ला कुंणी दैनी हणैं? ज़ुंण मणछ आझ़ा का पैहलै थिऐ, तिन्‍नों इतिहास कसरै बशै आसा त? तेथ त हुंह बिधाता शुरू ओर्ही, अर आजू बी रहणअ हुंह बिधाता खिरी तैणीं।

रेगीस्तानै बी पज़ेरनी मुंह केल़ुई, बबूल अर मैहंदीए अर जैतूने डाल़-बूट, अराबा ज़ेही रेगीस्तानी ज़ैगा बी हणअ घणअ बण, तेथ पज़ेरनै मुंह, च़ील, किक्‍कर अर कैलीए बूट। लोगा का शुझणअ तिन्‍नें आछी, तेखअ लागणअ तिन्‍नां का थोघ कि अह किअ मंऐं बिधाता। तेखअ एछणी तिन्‍नां समझ़ कि अह इहअ दैनअ इज़राईले पबित्र परमेशरै हणैं।”