1Այդ ժամանակ մի շաբաթ օր Հիսուսն անցնում էր արտերի միջով։ Նրա աշակերտները քաղց զգացին ու սկսեցին հասկ պոկել և ուտել։ 2Երբ փարիսեցիները տեսան, նրան ասացին. «Ահա քո աշակերտներն անում են այն, ինչ չի թույլատրվում անել շաբաթ օրը»։ 3Իսկ նա ասաց նրանց. «Դուք չե՞ք կարդացել, թե Դավիթն ի՛նչ արեց, երբ ինքն ու իր հետ եղողները քաղցեցին. 4ինչպե՛ս Աստծու տուն մտավ ու առաջավորության հացը կերավ, որ բացի քահանաներից, չէր թույլատրվում ուտել ո՛չ իրեն, ո՛չ էլ իր հետ եղողներին։ 5Կամ չե՞ք կարդացել Օրենքում, որ քահանաները շաբաթ օրերին տաճարում պղծում են շաբաթը, սակայն անմեղ են։ 6Բայց ես ասում եմ ձեզ, որ այստեղ տաճարից ավելի մեծը կա։ 7Եվ եթե գիտենայիք, թե ի՛նչ է նշանակում "Ողորմություն եմ ուզում և ոչ թե զոհ" (Ովս. 6.6), անմեղներին չէիք դատապարտի։ 8Սակայն Մարդու Որդին շաբաթ օրվա տերն է»։

Չորացած ձեռքի բժշկումը

(Մրկ. 3.1-6, Ղուկ. 6.6-11)

9Եվ Հիսուսը, այնտեղից հեռանալով, եկավ նրանց ժողովարանը։ 10Եվ ահա այնտեղ ձեռքը չորացած մի մարդ կար։ Հիսուսին ամբաստանելու համար նրան հարցրին՝ ասելով. «Թույլատրվո՞ւմ է շաբաթ օրը բժշկություն անել»։ 11Նա պատասխանեց նրանց. «Ձեզանից ո՞վ է այն մարդը, որ եթե մի ոչխար ունենա, և այն շաբաթ օրը փոսն ընկնի, նրան չի բռնի ու վեր հանի։ 12Արդ, մարդը որքա՜ն առավել է ոչխարից։ Ուստի շաբաթ օրը բարիք գործելը թույլատրելի է»։ 13Այդ ժամանակ Հիսուսն այդ մարդուն ասաց. «Ձեռքդ մեկնի՛ր»։ Նա չորացած ձեռքը մեկնեց, և այն մյուսի նման առողջ դարձավ։ 14Իսկ փարիսեցիները դուրս ելան ու նրա դեմ խորհրդակցեցին, թե ինչպե՛ս նրան կորստյան մատնեն։

15Երբ Հիսուսն իմացավ, այնտեղից հեռացավ։ Եվ ժողովրդի մեծ բազմություն գնաց նրա հետևից, ու նա բոլորին բժշկեց։ 16Եվ պատվիրեց նրանց, որ իր մասին չհայտնեն, 17որպեսզի կատարվեր Եսայի մարգարեի միջոցով ասվածը.

18 «Ահա իմ ծառան, որին ընտրեցի,

իմ սիրելին, որի նկատմամբ իմ հոգին բարեհաճ եղավ.

իմ Հոգին նրա վրա կդնեմ,

և նա հեթանոսներին կհայտնի դատաստանի մասին։

19 Նա չի հակառակվի, չի աղաղակի,

և ոչ ոք հրապարակներում նրա ձայնը չի լսի։

20 Ջախջախված եղեգը չի փշրի

և առկայծող պատրույգը չի հանգցնի,

մինչև որ դատաստանը հաղթանակի հասցնի։

21 Եվ հեթանոսները հույսը կդնեն նրա անվան վրա» (Ես. 42.1-4)։

Read Through the New TestamentՕրինակ

Սուրբ Գրություն

Այս Ծրագրի Մասին

Հարակից ծրագրեր

Առակներ