Matayo 17
17
Yesu nakihinduka ka gu̱si̱a
(Maliko 9:2-13; Luka 9:28-36)
1Nalakoli̱be tolo nkaga, Yesu naki̱mu̱i̱sa Petelo na Yakobbo na Yohana ka gu̱si̱a makangama kindia bhali̱ka bhokaka. 2Nibhalia nibhanzi̱bi̱, Yesu nakihinduka. Kei̱soaki nakibebenia bhia mani na ngoye ndiaki ndia yaloli̱o nakibha mau̱ka bhia bemu. 3Du̱mbi̱ bhaegi̱ bhesalo bhehe bhantangia Musa na Eli̱ya kaonga na Yesu.
4Petelo nakingia Yesu bhiyo; “Sali̱a, abhongi̱ bhasu̱ mehe. Kobhala nikialika wema salo, ndiako moti̱, ndia Musa na ndietolo ndia Eli̱ya.”
5Petelo nalia kionga, kicu mabebenia nakibhuati̱a, laso ndia nkpa nakituka ka kicu kenjo nakigia bhiyo; “Minjo andiye Mi̱ki̱ mindiamo mindie ni̱nku̱ndi̱o, mindie nidhedhelu̱ naye, bhumuokiane.”
6Bhaegi̱ bhesalo bhehe ndia bhaoka laso, nibhakitiya si̱ni̱ du̱mbi̱ nibhakianga gwabhi̱mba makpu̱ngbu̱. 7Yesu naki̱bhu̱bi̱kabe nakibhugbabe nakigia bhiyo; “Bhume, bhukulukutiya.” 8Ndia bhazu̱zu̱ka, bhakantangia nkpa poni bhuai̱be Yesu yekaka.
9Ndia bhabha nibhalia ki̱si̱ma katukabho ka gu̱si̱a, Yesu nakibhulagilia bhiyo; “Bhukulukuntolia nkpa poni ndio bhutangi̱o doi̱sa Mi̱ki̱ mindia Nkpa nahu̱mbu̱ki̱.”
10Bhaegi̱ ndibhaki nibhakimuolu̱li̱a bhiyo; “Ndia akidhuaga bhaegesi̱ sa Kilagilo ndia Mambombi̱ bhagia eti Eli̱ya agbokiliani̱ ndiye teketa si̱ki̱aki andiki?”
11Yesu naki̱bhu̱si̱ki̱aku̱ bhiyo; “Ali mazima Eli̱ya akiteketa ndiye si̱ki̱aki, toli̱ aki̱si̱ki̱sabe kima poni. 12Nikibhutolia eti Eli̱ya abi̱ka kala, no bhakpa bhakamu̱i̱bi̱li̱a, nibhakinkolabe kima poni ndia bhakabha. Toli̱ Mi̱ki̱ mindia Nkpa bhada kimueni̱sa bhu̱su̱ bhinjo.” 13Du̱mbi̱ bhaegi̱ ndibhaki nibhakikenga nesi̱ abhi̱ kaongabe Yohana Mbati̱zi̱.
Yesu nakimulami̱sa ntabhana mindia mu̱li̱mo yambi̱ guaki
(Maliko 9:14-29; Luka 9:37-43a)
14Yesu na bhaegi̱ ndibhaki ndia bhaduwa ka bi̱ya bhakpa katukabho ka gu̱si̱a, muluku nakinduwabe naki̱su̱ku̱mana kei̱soaki, 15nakingia bhiyo; “Nkumami, onigbelie kobhu̱, mi̱ki̱ mindiamo mu̱lu̱ku̱aki ali na mpu̱mbu̱ toli̱ ali kaena bhu̱su̱ si̱ni̱. Akiegengiaga ka kala na ka li̱bho. 16Ni̱mbi̱ki̱sa ka bhaegi̱ ndibhako no bhakatoka lami̱saki.”
17Yesu naki̱nsi̱ki̱aku̱ bhiyo; “Muzo ndia sebhali̱si̱yo malu̱zu̱kana toli̱ ndia kamwesi̱gi̱ Mambombi̱, nikidhakia na bhenu̱ tolo nga nibhulia bhinjo? Ni̱ki̱li̱ka na bhenu̱ dhakia tolo nga andu̱lu̱ bhubhe na hi̱ki̱li̱za? Bhu̱mbi̱ki̱se kami mehe.” 18Yesu nakintanuka mu̱li̱mo tukabe ntabhana, mu̱li̱mo nakitunkabe du̱mbi̱ nakilamiliabe.
19Du̱mbi̱ bhaegi̱ nibhaki̱ya kindia Yesu ka nsobho nibhakimuolu̱li̱a bhiyo; “Bhesu̱ bhikitoka bhiyaki̱be mu̱li̱mo minjo nangeki?”
20Naki̱bhu̱si̱ki̱aku̱ bhiyo; “Abhulema bhiyakibe nanga bhuli na hi̱ki̱li̱za nke. Ka mazima nikibhutolia eti, bhukubha nibhuli na hi̱ki̱li̱za nke bhia mbulu sa kalatu̱si̱, bhukulagilia gu̱si̱a yoho bhiyo; ‘Otuke mehe osi̱ki̱e kindietolo,’ toli̱ aki̱ya. Kalibe ndia akibhulema kolai̱.” 21Mu̱li̱mo sie minjo ndia akimbiyagabe nkpa ali saba na si̱ba.#17:21 Bbai̱bbu̱li̱ ndietolo kali na nkala yoho.
Yesu nakitodha tolia bhaegi̱ ndibhaki nesi̱ akiena bhu̱su̱ toli̱ aku̱we
(Maliko 9:30-32; Luka 9:43b-45)
22Bhaegi̱ ndia bhekumesa imamoti̱ ka Galilaya, Yesu abhugia bhiyo; “Mi̱ki̱ mindia Nkpa bhaki̱ya pesi̱aki̱ku̱ ka bhakpa. 23Bhakimuola no ka tolo ndia kesalo aki̱hu̱mbu̱ka.” Toli̱ bhaegi̱ bhatuntula si̱ni̱.
Yesu nakisasula musolo sa Hekalo
24Yesu na bhaegi̱ ndibhaki ndia bhaki̱dha ka tau̱ni̱ ndia ka Kapelenau̱mu̱, bhaku̱mesi̱ musolo sa Hekalo nibhaki̱ya olu̱li̱a Petelo bhiyo; “Mwegesi̱ mindianu̱ kakisasulaga musolo sa Hekalo?”
25Petelo naki̱bhu̱si̱ki̱aku̱ bhiyo; “Akisasulaga.”
Petelo ndia asi̱ki̱a ka ndabho, Yesu ateketa ndiye onga bhiyo; “Si̱moni̱ okweli̱li̱kana eki? Bhasali̱a bhakikumesaga musolo tukai̱ ka bhani̱ki̱ ndibhabho kedha ka bhakpa ndibhetolo?”
26Petelo naki̱nsi̱ki̱aku̱ bhiyo; “Tukai̱ ka bhakpa ndibhetolo.” Yesu nakimuolu̱li̱a bhiyo; “Makulu si̱ bhani̱ki̱ ndibhabho bhakagbokiliani̱ sasula musolo sa Hekalo? 27No bhikikabhi̱ bhaku̱mesi̱ musolo bhenjo i̱ya nibhabheli̱, oye ke tu̱li̱ olohe na ndobhani ndiako. Asu̱ mindio okuteketa lohaki, omuhami̱se okuntakanaku̱ mukwenge, oi̱se kabho osasule musolo ndiamo na ndiako.”
Արդեն Ընտրված.
Matayo 17: KWAMBA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc., 2025