Matayo 16
16
Bhafali̱sayo na Bhasadu̱kayo nibhaki̱ya lengesa Yesu
(Maliko 8:11-13; Luka 12:54-56)
1Du̱mbi̱ Bhafali̱sayo na bemoti̱ ka Bhasadukayo nibhaki̱ya kindia Yesu lengesaki nibhakingia eti, akole kabho ndia akitina nki̱li̱ ani̱sa nesi̱ Mambombi̱ anti̱ki̱ ndiye.
2Naki̱bhu̱si̱ki̱aku̱ bhiyo; “Tamabhugo-bhugo bhukutangia gulu katanikana, bhukugiaga eti u̱ma kyalo akisia nabhongi̱, 3u̱ma-u̱ma gulu katanikana na makubhabhi̱ nagbei̱ bhukugiaga eti lelu mbu̱la akidhoka, bhu̱i̱bi̱ makulu sa kyalo nesi̱ aki̱yaga nakigali̱ngana no bhukukutoka i̱ba makulu sa bwile li̱ka nakigali̱ngana. 4Muzo ndia sebhali̱si̱yo ndia kamwesi̱gi̱ Mambombi̱ akikungaga ndu̱lu̱ sazi̱bi̱li̱ai̱be ndia akitina nki̱li̱, no kalibe ndia akitina nki̱li̱ ndia bhakibhupesi̱a bhuai̱be sazi̱bi̱li̱ai̱be ndia nabbi̱ Yona.” Du̱mbi̱ Yesu nakibhutukabe naki̱ya.
Yesu nakibhuhabhula bhaegi̱ ndibhaki ka egesa ndia Bhafali̱sayo na Bhasadukayo
(Maliko 8:14-21)
5Bhaegi̱ ndibha Yesu ndia bhazaba naseke ndietolo se tu̱li̱, nibhakikanilia nesi̱ bhabhusukani̱ i̱ya na mugati̱. 6Yesu nakibhugia bhiyo; “Bhwegendi̱e ki̱tu̱mbi̱so ndia Bhafali̱sayo na Bhasadukayo.”
7Nibhakiolu̱li̱ana bhiyo; “Aongi̱ bhinjo nanga bhi̱ki̱bi̱ki̱ na mugati̱?”
8Yesu naki̱ba ndia bhabhi̱ kakweli̱li̱kana, du̱mbi̱ nakibhuolu̱li̱a bhiyo; “Bhenu̱ ndibho bhuli na hi̱ki̱li̱za nke, bhuli kakweli̱li̱kana eti bhu̱ku̱bi̱ki̱ na mugati̱ nangeki? 9Bhu̱ku̱kengi̱mbe dhe? Bhukukukanilia nesi̱ ni̱bhu̱li̱si̱a bhakpa nku̱mi̱ tano na mugati̱ tano? Bhu̱tu̱mi̱sa kigega nga? 10Toli̱ ndie ni̱bhu̱li̱si̱a bhakpa nku̱mi̱ i̱ni̱ na mugati̱ ncambu̱? Bhu̱tu̱mi̱sa kigega nga? 11Bhu̱ku̱i̱bi̱ nesi̱ ki̱bhi̱ kaonga na bhenu̱ ka ndia agbei̱be mugati̱? Bhwegendi̱e ki̱tu̱mbi̱so ndia Bhafali̱sayo na Bhasadukayo.” 12Du̱mbi̱ bhaegi̱ nibhakikenga nesi̱ Yesu kabha kaongabe ki̱tu̱mbi̱so ndia bhaki̱bi̱saga ka mugati̱, no kwegendi̱a egesa ndia Bhafali̱sayo na Bhasadukayo.
Petelo nakimuatula Yesu bhia Ki̱li̱si̱to
(Maliko 8:27-30; Luka 9:18-21)
13Yesu ai̱ya ka tau̱ni̱ ndia ka Kai̱sali̱ya Fi̱li̱pi̱, nakibhuolu̱li̱a bhaegi̱ ndibhaki bhiyo; “Bhakpa bhakigiaga eti Mi̱ki̱ mindia Nkpa andi ani̱?”
14Nibhaki̱nsi̱ki̱aku̱ bhiyo; “Bemoti̱ bhakigiaga eti Yohana Mbati̱zi̱, ndibhetolo bhagia eti Eli̱ya, na ndibhetolo eti Yelemiya kedha moti̱ ka bhanabbi̱ ndibhekala.”
15Yesu nakibhuolu̱li̱a bhiyo; “Toli̱ bhenu̱ bhukugiaga eti andimi ani̱?”
16Si̱moni̱ Petelo naki̱nsi̱ki̱aku̱ bhiyo; “Oli Masiya Mi̱ki̱ mindia Mambombi̱ mwomezi̱.”
17Yesu nakingia bhiyo; “Oli na nki̱sa uwe Si̱moni̱ mi̱ki̱ mindia Yona, nanga mazima yoho katu̱ki̱ kindia ntua-kanji̱, no atu̱ki̱ kindia Aba mindia ali gulu. 18Toli̱ Petelo nikukutolia bhiyo; ‘oli kuka mamota,’ toli̱ ka kuka mamota yoho nikialika kau̱ musingi sa kpata ndia bhai̱ki̱li̱za ndibhamo bhoponi toli̱ mani̱ ndia sitani kada kibhutoka.” 19Ni̱ku̱ku̱pesi̱a ki̱su̱mu̱lu̱zo sa kusali̱a ndia gulu. Ndio oku̱li̱ka bhu̱wai̱ ka nsi, Mambombi̱ mindia ali gulu ada ki̱bhu̱wa, toli̱ ndio oku̱li̱ka kudhai̱ ka nsi, na Mambombi̱ mindia ali gulu ada kikudha. 20Du̱mbi̱ nakibhulagilia bhaegi̱ ndibhaki makanga tolia nkpa poni eti abhi̱ Masiya.
Yesu nakibhutolia bhaegi̱ ndibhaki nesi̱ akiena bhu̱su̱ toli̱ aku̱we
(Maliko 8:31—9:1; Luka 9:22-27)
21Tukilia ka tolo injo, Yesu nakitandika tolia bhaegi̱ ndibhaki ndia akimuenikanabe. Nakibhugia bhiyo; “Nigbokiliani̱ yami ka Yelusalemu niene bhu̱su̱ si̱ni̱ ka kibhokoa bhangbeku ndibha Bhayu̱daya, bhabhembi̱ bhangbeku ndibha Mambombi̱ na bhaegesi̱ sa kilagilo ndia Mambombi̱ ampesi̱a Musa. Bhakiniola, no ka tolo ndia kesalo ni̱ki̱hu̱mbu̱ka.”
22Petelo naki̱mu̱i̱sa Yesu nekpengbu̱ nakitandika sogosaki. Nakigia bhiyo; “Sali̱a, Mambombi̱ kakibhala injo nakukuenikanabe.”
23Yesu nakigali̱ngana naki̱nzi̱ba Petelo nakingia bhiyo; “Uwe sitani onitukebe. Oli kakomi̱sami kola kima ndia Mambombi̱ akikabhaga nikole. Koli kakweli̱li̱kanabe kima ndia Mambombi̱ no ndia ntua-kanji̱.”
24Du̱mbi̱ Yesu nakibhugia bhaegi̱ ndibhaki bhiyo; “Mindia akikabha bha mwegi̱ mindiamo, agbokiliani̱ adhuwe ndiaki poni toli̱ akumbe musalaba ndiaki du̱mbi̱ ayage nemi. 25Mindia akikingililia bwomezi̱ ndiaki, akifelua, no kapesi̱aku̱ bwomezi̱ ndiaki nanga emi, bhakinzuna. 26Akingasilia eki nkpa liya nsi poni, no afelua bwomezi̱ ndiaki? Andiki ndia nkpa ali na pesi̱ai̱ku̱ andu̱lu̱ atodhe abhe na bwomezi̱ ndiaki? 27Nikibhutolia yoho poni nanga Mi̱ki̱ mindia Nkpa ali kaya bi̱kaki ka ngu̱ko ndia Abaki na bhamalai̱ka ndibhaki toli̱ akinsasula nkpa poni sigikilia ka ndia akola.
28“Ka mazima nikibhutolia eti bemoti̱ ndibho bhuli mehe nemi bhu̱ku̱ku̱ku̱wa ndio bhukuntangi̱mbe Mi̱ki̱ mindia Nkpa kabi̱kaki ka kusali̱a ndiaki.”
Արդեն Ընտրված.
Matayo 16: KWAMBA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc., 2025