मत्ती 18
18
स्वर्गा रे राज्य में बढ़अ कुंण
(मरकुस 9.33-37; लूका 9.46-48)
1तेसा घड़ी चेले यीशु सेटा इच्छी करे पूछते लागे, स्वर्गा रे राज्य में बडअ कुंण साहा? 2तेबा यीशु एक बालक आपु सेटा शादी करे त्याहा रै सामने खड़अ करू, 3होर बोलू, हाऊं तमाबे सच बोला, कि जेबरे तणी तमे मना ना फिराए होर बालका साही ना बणे, तमे स्वर्गा रे राज्य में प्रबेश नांई करी सकते। 4जोह कोई आपणे आपु बे तेऊ बालका साही होछअ समझे, सह स्वर्गा रे राज्य में बडअ हूँणअं। 5होर जोह कोई मेरे ना का एक एडे बालका ग्रहण करा सह महा ग्रहण करा।
पापा करने री परीक्षा
(मरकुस 9.42-48; लूका 17.1,2)
6पर जोह कोई याह होछे मेंजा का जोह महा में बुशाह करा एकु बै ठोकर दे, तेऊबै भला हुँदा कि बडी चक्की रअ पाट तेऊरे गले लटकाउंदा होर डूघे समुद्र डबोऊदा। 7पापा री ठोकरा रे कारण संसारा पैंदे होए! ठोकरा रा लागणा जरूरी साहा; पर हाय, तेऊ मन्शा वै जासू की बजहा संघे सह लागदा। 8अगर तेरअ हाथ होर ज़ाघ महा बै ठोकर खलाए, तेबा तेसा काटी करे फैकी दे, टूण्डे होर लेगड़े होई करे जीबना में प्रबेश करना ताहबे एताका भला साहा कि दुहे हाथ या दुहे ज़ाघा रहंदे तूह अनन्त आगि में पाऊ लोडी। 9अगर तेरी आछ ताहबे ठोकर खलाए, तेबा तेसा काढी करे फैकी दे कांणअ होई कर जीबना मे प्रबेश करना ताहबे एताका भला साहा कि दुई आछी रहंदे भी तुह नरका री आगि में पाऊ लोडी।
गोझी दी भेडा रा दृष्टान्त
(लूका 15.3-7)
10हेरा, तमे याह होछे मेज़ा का कासी भी तुच्छ नांई ज़ाणे; किबेकी हाऊं तमाबे बोला कि त्यारे दूत मेरे स्वर्गीय बापू रे मुँहा सदा हेरा। 11किबेकि हाऊ मणशा रअ शोहरू गोझीदे बचाऊदअ आउदअ। 12तमे कैह सोचा? अगर कासु मणशा री शअ भेडा हो, त्याह मेंज़ा का एक गोझे, तेबा कैह तेऊ निन्यानबे भेडा सुरक्षा आली जागहा छाडी करे, होर पहाडा मेंजे तेसा गोजण दीणा, की सह गोझी दी भेड़ नांई लोडनी? 13होर अगर एडा हो कि सह भेड भेंटे , तेबा हाऊं तमाबे सच बोला कि सह त्याह निन्यानबे भेडा री जोह गोझी नांई, एतरी खुशी नांई करनी जेतरी कि एसा भेडा री तणी करनी। 14एडा ही थारे बापू की जोह स्वर्गे साहा यह इच्छा नांई कि याह होछे मेंज़ा का एक भी नष्ट होए।
अपराधी रे प्रति ब्यबहार
15अगर तेरअ बुशाह करने आलअ भाई तेरे बिरुध कोई अपराध करे, तेबा नाहं होर केल्हे में गला बाता करी करे तेऊ समझा, अगर सह तेरी शुणे तेबा तांई आपणें भाई बापिस भीआक पाऊ। 16अगर सह नांई शुणे, तेबा एक या दुई मणश आपु संघे होर नीह, कि हर एक गल दुई या चिण गुआही रे मुँहा का जरुर करनी। 17अगर सह त्यारी भी नांई मने, तेबा कलीसिया बे बोल, पर अगर सह कलीसिया री भी नांई मने तेबा तुह तेऊ अन्यजाति होर चुंगी माँगण आले ज़ाण।
रोकणा होर अबसर दींणा
18हाऊं तमाबे सच बोला, जोह कुछ तमे धरती में बानले, सहे स्वर्गा में बान्णा होर जोह कुछ तमे धरती में खोल्ले, सह स्वर्गे भी खुलणा। 19याह भी हाऊं तमाबे सच बोला कि, तमा मेज़ा का दुई जन धरती में कासु गला री तणी एकमन होई करे तेऊ का मागले, तेबा मेरे बापू री तरफा का जोह स्वर्गा में साहा, तयाबे हूँणी। 20किबेकी ज़खे दुई या चिण मेरे ना का कट्ठे हुँदा, तखे हाऊं त्याह मेंझे हुँदा।
निर्दयी सेबका रा दृष्टान्त
21तेबा पतरस सेटा इच्छी करे तेऊबै बोलू, हे परमेश्वर, अगर मेरअ बुशाह करने आलअ भाई अपराध करदअ रहे, तेबा हाऊं केतरी बारी तेऊबै क्षमा करू? कैह सात बारी तणी? 22यीशु तेऊबै बोलू, हाऊं ताहब यह नांई बोलदअ कि सात बारी तणी बरन सात गुणा रे सत्तर गुणा तणी। 23एतकी तणी स्वर्ग रा राज्य तेऊ राज रे बराबर साहा, जूणी आपणे नोकरा का लेखा लउंणा चाहू। 24जेबा सह ईसाबा माँगदअ लागअ, तेबा एक जन तेऊ सामने आणु जोह दस हज़ारा तोड़े सुने रअ सीके रअ कर्जदार थी। 25जेबा कि दींणे बे तेऊ सेटा किछे नांई आंन्धा, तेबा तेऊरे मालके बोलू, यह होर एउरी बेटड़ी होर बाल बच्चे होर जोह एउरा साहा सब कुछ बेचा, होर कर्जा चूकाऊ लोडी। 26एता में तेऊ नोकरे मालका रे पइरे में पड़ी करे नमस्ते करी, होर बोलू, हे मालक होसला डाह, महा सब कुछ भरना। 27तेबा तेऊ नोकरा रे मालके दया करी करे छाडू, होर तेऊरा कर्ज भी माफ करू।
28पर जेबा सह दास बागे निकतअ, तेबा तेऊरे संघे नोकरा मेंज़ा का एक तेऊ भेटअ जोह तेऊरे शआ दीनार धयाडी री मजदूरी रअ कर्जदार; तेऊ सह ढाकी करे तेऊरअ गल़े का ढाकु होर बोलू, जोह कुछ ताह सेटा कर्जा साहा तेऊ भर। 29एता में तेऊरे नोकरे संघे पड़ी करे बिनती करदअ लागअ, मोन्न मार महा सारा दीणा। 30तेऊ नांई मनु, पर नाहीं करे जेला में पाऊ कि जेबरे तणी यह कर्जा नांई भरलअ, तेबरे तणी तखी रहलअ। 31तेऊरे संघे दासे यह जोह होऊ, हेरी करे बहू नराझ होई, होर नाहीं करे आपणे मालका बे पूरा हाल खोजु। 32तेबा तेऊरे मालके सह शादी करे तेऊबै बोलू, हे दुष्ट दास, तांई जोह मांई संघे जोह दया बिनती करी, तेबा मांई तेरा सह सारा कर्ज माफ करू। 33एतकी तणी जेड़े माँई ताह पैंदे दया करी, तेड़ा ही कैह ताईं भी आपणे संघे नोकरा पैंदे दया नांई लोडी करी? 34होर तेऊरे मालक रोषा में इच्छी करे दण्डा दिण आले रे हाथे सह दास भेजू, कि तेबरे तणी यह सारा कर्ज नांई भरे, तेबरे तणी त्यारे हाथे रहे।
35एउ साबे अगर तमा मेंज़ा का हर एक आपणे बुशाह करने आलअ भाई रे पापा पुरे मना का क्षमा नांई करलअ, तेबा मेरअ स्वर्गीय बापू जोह स्वर्गा में साहा, तमा का भी तेडा ही करना।
Արդեն Ընտրված.
मत्ती 18: ISJNT
Ընդգծել
Կիսվել
Համեմատել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.