मत्ती 17
17
यीशु रा रूप बदलणा
(मरकुस 9.2-13; लूका 9.28-36)
1छहा धियाड़े बाद यीशु पतरस होर याकूब होर तेऊरअ भाई यूहन्ना आपू संघे आँणी, होर त्या एकान्ता में कासु उछटे पहाडा बे नीई। 2तखे त्याह रे सामने यीशु रा रूप बदलू, होर यीशु रअ मुँह सुरजा जेहअ चमकू होर तेऊरे झिकड़े ज्योति साई प्रयाशे होई। 3होर तखे चेले मूसा होर नबी एलिय्याह तेऊ संघे गला करदे त्याहे हेरी।
4एता में पतरसे यीशु बे बोलू, हे प्रभु, महारा अखे रहंणा ठीक साहा। अगर तेरी इच्छा साहा तेबा महा अखे चीण तांबू बणाऊंणे; एक ताहबे, एक मूसा बे, होर एक एलिय्याह बे। 5सह बोलदअ ही लागअद थी, कि एकु शेते बादले त्या ढोपी, होर तेऊ बादल़ा का यह शब्द शुणु: यह मेरअ प्यारअ शोहरू साहा, जासू का हाऊं खुश साहा एउरी शुणा। 6चेले यह शुणी करे मूंहाँ रे जोर संघा उटे पडी होर बहू डरी। 7यीशु त्यहा सेटा आउअ होर त्या छुहीं, होर बोलू, उठा होर डरे नांई। 8तेबा त्याहे आपणी आछी खोली होर यीशु छाडी करे कोहे नांई हेरू। 9तेबा त्या पहाडा का उतरदे लागे थी, तेबा यीशु त्याह बे आज्ञा दिंनी, जेबरे तणी मणशा रअ शोहरू मुएंदे मेज़ा का नांई जिऊंदअ होऊ, तेबरे तणी तमे जोह कुछ हेरू कासी बे नांई खोजे। 10एता में तेऊरे चेले तेऊका पुछु, तेबा शास्त्री किबे बोला कि एलिय्याह रा पहिले इहंणा जरूरी साहा? 11यीशु ये उतर दिना, जरुर एलिय्याह इहंणअं, होर सब कुछ सुधारना। 12पर हांऊ तमा का बोला कि एलिय्याह इच्छी छेकू दअ, होर लोके सह नांई पछेणु; पर जेड़ा चाहू तेडा ही तेऊ संघे करू। एसी रीति संघे मणशा रे शोहरू भी त्यारे हाथा का दुःख सहन करना पड़ना। 13तेबा चेले समझू कि तेऊ हामा बे यूहन्ना बपतिस्मा दिहंण आले रे बारे में बोलू।
दुष्टात्मा ग्रस्त बालक ठीक करणा
(मरकुस 9.14-29; लूका 9.37-43)
14जेबा त्या भिड़ा सेटा पूजी, तेबा एक मणश तेऊ सेटा बे आउअ, होर घुटने टेकी करे बोलदअ लागअ, 15हे प्रभु, मेरे शोहरू पैंदे दया कर! किबेकी तेऊ मिर्गी इहंदा, होर तेऊ बहू दुःख हुँदा, होर भी-भी आगि में होर भी-भी पाणी में पड़ा। 16मांई सह तेरे चेले सेटा बे आणु, पर त्या तेऊ ठीक करी नांई सकी। 17यीशु उतर दिंना, “हे अबिश्बासी होर हठीले लोको, महा कधु तणी तमे संघे रहंणा? केबरे तणी थारी सहणी? तेऊ अखे महा सेटा बै आँणा।” 18तेबा यीशु दुष्टात्मा ड़ांटी, होर सह तेऊका निकती होर शोहरू तेभरी ठीक करू।
19तेबा चेले यीशु सह कराणे मे पुछु, हामे तेऊ किबे नांई काहडी सकी? 20यीशु तेऊवै उतर दिना, आपणे बुशाह री कमी रै कारण, किबेकि हाऊं तमाबे सच बोला, अगर थारा बुशाह राई रे दाणे रे भी बराबर होला, कि एउ पहाडा बै बोली सका, अखा का सिकी करे तखा बै नाहं तेबा तेऊ नाहंणा; होर कोई भी गला तमाबे मुश्किल नांई हूँणी। 21पर यह जाति बिना प्रार्थना होर ब्रता रे नांई निखलती।
आपणी मऊती रे बारे भीआका भविष्यवाणी
(मरकुस 9.30-32; लूका 9.43-45)
22जेबा त्या गलीला प्रदेशा मे थी, तेबा यीशु तयाबे बोलू, “मणशा रअ शोहरू मणशा रे हाथे ही ढ़ाकणे बझयाल़ण; 23त्या सह मारण, होर सह चिउणे धयाड़े जिऊंदअ हूँणअं।” एता शूणी करे चेले बहु नराझ होई।
देहुरे रा कर
24जेबा त्या कफरनहूम नगरा में पूजे, तेबा देहुरे रे करा माँगण आले पतरसा सेटा इच्छी करे पुछु, “कैह थारअ गुरु देहुरे रा कर नांई दिंदअ?” 25पतरसे बोलू, “उअह, दिंदा।” जेबा सह घरे आउअ, तेबा यीशु तेऊरे पूछणे का पहिले ही तेऊबै बोलू, “हे सिमोन तूह कैह सोचा? धरती रअ राजा चुगी या कर कासु का माँगा? आपणे शोहरू का या पराए का?” 26पतरसे तेऊबै बोलू, “पराए का”। यीशु तेऊबै बोलू, तेबा शोहरू बचु। 27तेबा भी एतकी तणी कि हामे तयाबे ठोकर ना खलाए तूह झिला रे कनारे नाहीं करे कठयाल़ु पा, होर जोह माछी पहिले निखले, तेसकी खाखी खोलणे में ताह एक पुराण सिक्क भेटणं, तहू नी करे मेरे होर आपणे बदले दे।
Արդեն Ընտրված.
मत्ती 17: ISJNT
Ընդգծել
Կիսվել
Համեմատել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.