Забур 106
106
ВАД ЛАГЬАЙ КТАБ
(106–150-кьилер)
Хилас хьайибуру Аллагьдиз шукур авун
1Шукур ая Реббидиз, ам хъсанди я,
регьимни Адан мидаимди я!
2ИкӀ лугьурай Ада азад авурбуру,
душмандин гъиликай Ада азад авурбуру,
3рагъэкъечӀдай патай, рагъакӀидай патай,
кефердихъай, гьуьлуьхъай –
гьар жуьре чилерай
Ада кӀватӀ авурбуру.
4Рехъ алатна къекъвезвай
абур кьурумда
кас авачир рекьера,
уьмуьр тухун патал жагъанач шегьер,
5гишин яз, цихъ къаних яз
абурук квай чан зайиф жезвай.
6Гьа чӀавуз чпиз бахт авачирла, абуру
Реббидиз минетна,
Ада абур хиласна бедбахтвилерикай.
7Тухвана дуьз рекьяй абур
чеб уьмуьр тухуз амукьдай
фин патал шегьердиз.
8Шукур хьурай Реббидиз
регьимдай Адан,
инсанар патал Ада авур кьван
аламатдин крарай!
9Ада къанихбуруз гана регьятвал,
няметралди тух авуна гишинбур.
10Ацукьнавай мичӀивиле абур хъендик ажалдин,
бедбахтвилинни ракьун бухавар алаз,
11куьз лагьайтӀа къарагънавай акси яз
Аллагьдин гафариз,
кваз кьуначир меслятни
виридалай Виневайдан.
12Гьавиляй Ада абурун рикӀер
четинвилерив ислягь авуна.
Ярх жезвай абур,
куьмекдайди авачир.
13Гьа чӀавуз чпиз бахт авачирла, абуру
Реббидиз минетна,
Ада абур хиласна бедбахтвилерикай.
14МичӀивиляйни ажалдин хъендай
акъудна абур,
абурун бухавар хана, кӀус-кӀусна.
15Шукур хьурай Реббидиз
регьимдай Адан,
инсанар патал Ада авур кьван
аламатдин крарай,
16куьз лагьайтӀа хана Ада
буьруьнждин варар къазаматрин,
ракьун шефтеяр атӀана.
17Акьул авачирбуру азаб чӀугвазвай
чпин чӀуру рекьерай, чпин гунагьрай.
18Гьар акатай тӀуьникай
такӀан хьана, абур катзавай,
абур мукьув агатзавай
ажалдин варарин.
19Гьа чӀавуз чпиз бахт авачирла, абуру
Реббидиз минетна,
Ада абур хиласна
бедбахтвилерикай.
20Вичин гаф ракъурна, абур дири хъувуна,
ажалдикай абур хилас авуна.
21Шукур хьурай Реббидиз
регьимдай Адан,
инсанар патал Ада авур кьван
аламатдин крарай,
22 къурбандар гъурай Адаз шукур авун яз,
рахурай Адан крарикай шаддаказ.
23Гимийраваз физвайбуруз гьуьлелай,
зурба ятарал зегьмет чӀугвазвайбуруз
24аквазвай Реббидин крар,
Адан аламатар деринра.
25Ада эмирзавай, къарагъзавай къати гар,
хкажиз кьакьан лепеяр.
26Цаварив кьван хкаж жезвай гимияр,
мадни агъуз ахватзавай деринриз,
бедбахтвилик гьуьлербанриз хаф язавай.
27Абуру чархар язавай, галтад жезвай,
чехирдикай сархуш хьанвайбуру хьиз,
абурун вири камал квахьзавай.
28Гьа чӀавуз чпиз бахт авачирла, абуру
Реббидиз минетна,
Ада акъудна
абур бедбахтвилерай.
29Ада тӀурфан элкъуьрзавай лал-кьейивилиз,
ван атӀузвай гьуьлуьн лепейрин.
30Лепеяр секин хьайивиляй
шад тир инсанар,
Ада абур чпиз кӀани
гъизвай муказ гимийрин.
31Шукур хьурай Реббидиз
регьимдай Адан,
инсанар патал Ада авур кьван
аламатдин крарай!
32Адан тӀвар хкажрай
инсанрин кӀватӀалда,
тарифрай Адан
агъсакъалрин арада!
33Ада вацӀар элкъуьрзавай кьурумдиз,
цин чешмеяр – къураматдиз,
34мублагь чил – явандаз
небгетвиляй анал уьмуьр тухузвайбурун.
35Ада кьурум вириз элкъуьр хъийизвай,
кьуру чилни – чешмедиз.
36Ана гишинбур ацукьарзавай,
уьмуьр тухудай
шегьер чпиз эцигун паталди;
37тум вегьена никӀериз,
ципицӀ багълар кутуна
чпивай бул майваяр гъиз жедай.
38Ада абуруз рухсат гузвай,
инсанрин кьадар артух жезвай лап гзаф,
Ада абурун маларин кьадардив
тӀимил жез тазвачир.
39Мадни абур тӀимил хьана,
ярх хьана абур,
азаб чӀугваз басхасдикай,
бедбахтвиликай, хажалатдикай.
40Ада такӀанвал ичӀирзавай регьберрал,
тазвай абур рехъ алатна кьурумда
рекьер авачир.
41Кесибни Ада саилвиляй акъудзавай,
адан тухум артухзавай,
хперин суьруь хьиз.
42Дуьзбуруз аквада и кар,
шад жеда,
небгетвили вичин сив агалда.
43Нихъ камал аватӀа,
гьадаз и кар акурай,
ам Реббидин регьимдин
гъавурдани акьурай.
Արդեն Ընտրված.
Забур 106: ЛезПК
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Институт перевода Библии, 2010-2024