Забур 105
105
Аллагьдин берекат ва Исраилди шукур тавун
1Тариф ая Реббидин!
Шукур ая Реббидиз,
вучиз лагьайтӀа Ам хъсанди я,
Адан регьимни даим я!
2Нивай жеда къалуриз Реббидин къудрат,
нивай Адан вири баркалладикай хабар гуз жеда?
3Бахтавар я гьахъ-дувандин пад кьазвайбур,
вири вахтара гьахъ крар ийизвайбур.
4РикӀел хкваш зун, Ребби,
Жуван халкьдихъ къалурдайла майилар,
Вуна абур хиласдайла,
5зазни са куьмек це,
Вуна хкягъайбурун хушбахтвал акун патал,
Ви халкьдихъ галаз шад хьун паталди,
Ви ирсинал дамах авун паталди.
6Гьам чнани, гьам чи бан-бубайрини
гунагьар авуна,
къанунсузвилер авуна,
небгетдаказ тухвана чеб.
7Чи бубаяр акьунач гъавурда
Мисрида На къалурай аламатрин,
Ви регьимдин булвал алудна рикӀелай,
НацӀун гьуьлуьн патав абуру гъулгъула авуна.
8ЯтӀани Ада Вичин тӀварцӀин хатурдай
абуруз куьмек гана Вичин къудрат къалурун паталди.
9НацӀун гьуьлуьз кьве пай хьунухь эмирна Ада,
адай кьур акъатна,
абур Ада тухвана дериндай гьуьлуьн,
кьурумдайтӀуз хьиз.
10Абур такӀанбурун гъиликай хиласна абур,
душмандин гъиликай азадна абур.
11Цик акатна абурун душманар,
амукьнач садни.
12Гьа чӀавуз агъуна абур Адан гафарихъ,
Адаз тарифдин мани лагьана.
13Амма фад алудна рикӀелай крар Адан,
вилив хвенач меслят Адан.
14Абурук кьурумда зурба каш акатна,
кьурумда синагъна Аллагь.
15Абуруз кӀандайди гана,
амма абурал тӀегъуьн ракъурна.
16Кундал абуру пехилвална Мусадал,
Реббидин пак хахам тир Гьарунални.
17Чил ахъа хьана, Датан туькьуьнна,
гьакӀ Абираман вири шерикарни.
18КуькӀвена цӀай абурун арада,
кана ялавди небгетар.
19Харебдал кӀалуб авуна данадин,
бутрин кӀалубриз икрам авуна,
20Ребби, абурун баркалла, дегишна
векь незвай жунгавдин шикилдихъ.
21РикӀелай алудна Аллагь, чпин Хиласкар,
Мисрида чӀехи крар авурди,
22аламатар авурди Хаман чилерал,
кичӀ кутадай крар авурди НацӀун гьуьлуьв.
23Гьавиляй Ада Вичи абур терг авун кьетӀна,
Ада хкягъай Мусади абурун пад кьуначиртӀа
Адан вилик
Адан гъазаб алудун паталди,
Ада абур терг тавун паталди.
24Мурад авур чил абуру кваз кьунач,
чӀалахъ хьанач Ада гайи гафунин,
25къалурзавай наразивал чпин алачухрик,
Реббидин ванциз ябни гузвачир.
26Гьавиляй абурун аксина Ада Вичин гъил хкажна
абур барбатӀ авун патал кьурумда,
27гьакӀни абурун эвледар чукӀурна халкьарин арада,
абур кутун патал чара гьукумдик.
28Абур Багьал-Пеарак акахьна,
кьенвай аллагьриз ганвай къурбандар нез хьана.
29Чпин краралди абуру хъел гъизвай Реббидиз,
абур тӀегъуьндик акатна.
30Къарагъна Пингьас, дуван авуна,
тӀегъуьн алатна.
31И кар гьахъ-михьивал яз кхьена адаз
ва адан эвледриз даим яз.
32Мерибадин ятаривни абуру Адаз хъел гъанай,
абур себеб яз азаб ганай Мусадиз,
33вучиз лагьайтӀа абуру
адан руьгьдиз хъел гъанай,
ада вичин сивелди
кьил-кьилел алачир лагьана гаф.
34Чпикай Реббиди абуруз лагьай
халкьар абуру терг авунач,
35абурук акахьна,
гьабурун крар кьуна,
36гьабурун бутриз къуллугъ авуна,
абур патал а бутар элкъвена чилиниз.
37Рухваярни рушар чпин
иблисриз къурбандна;
38тахсир квачир экъична иви,
чпин рухвайрин, рушарин иви,
Къенандин бутриз къурбанд авур иви,
чил чиркин хьана ивидалди.
39Чиркинна чеб чпин краралди,
ява хьана чпи авур амалралди.
40Гьавиляй Реббидиз атай хъел
халкьдикай Вичин
акьван къатиз куькӀвена,
Адаз Вичин ирс лап такӀан хьана.
41Ада абур гъиле туна чара чилерин агьалийрин,
абурал агъавал авуна абур такӀанбуру.
42Абур душманри дарвиле твазвай,
абурукай лукӀар ийизвай.
43Гзаф гъилера абур Ада хиласнай,
амма абуру чпин терсвилив
хъел гъизвай Адаз,
чпин гунагьрай русвагьнай абур.
44ЯтӀани Ам килигзавай
хажалатдиз абурун;
абурун цӀугъ ван хьайила,
45абурухъ галаз кутӀуннавай Вичин Икьрар
хкизвай рикӀел,
Вичин зурба регьимдив кьадайвал
абурун язух чӀугвазвай.
46Ада абурун язух къвез тазвай
абур есирда кьунвай виридав.
47Куьмек це чаз, Ребби, Аллагь чи,
вири халкьарин юкьвай чун акъуда
чна шукур авун патал Ви пак ТӀварцӀиз,
чна дамах авун патал Ви тарифар авунал.
48Шукур хьуй Ваз, я Ребби,
Исраилдин Аллагь,
асиррилай асиррал кьван!
Вири халкьди лугьурай «Амин!»
Тариф ая Реббидин!
Արդեն Ընտրված.
Забур 105: ЛезПК
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Институт перевода Библии, 2010-2024