Népszerű bibliai igeversek innen: Матта 6

Megosztás

Сифтена-сифте учву Аллагьдин Паччагьлугъдихъ хъергай ва Дугъу кӀурайиб вари тамам апӀбахъ йихьай. Гьаци гъапӀиш, имбуб вари Дугъу тувдичвуз.

Гьаци вуйиган, закурин йигъан гъайгъушнаъ махьанай, закурин йигъаз чан гъайгъушнар а. Гьарсаб йигъаз чан гъайгъушнар чӀяаьн ву.

Гьаци вуйиган, кӀуразачвуз: ичв гъян бадали фу ипӀуруш, фу убхъуруш, ва ичв жан бадали фу алабхьуруш, гьаддин гъайгъушнаъ махьанай. Фицики уьмур – ипӀрубтӀан, хъа беден палаттӀан заан ву.

Уву ккарагруган, яв хулаъ учӀв ва, раккин хъябкьну, душваъ шлизкӀа дярякъру яв Адашдиз ккараг. Ва жиниди апӀурайибра рябкъру яв Адашди увуз пешкеш тувди.

Гьаддиз гьамци ккарагай: «Я аьршариъ айи ич Адаш! Яв ччвур гирами ибшри. Яв Паччагьлугъ улубкьри. Яв гаф аьршариъси жилиинра тамам ибшри.

Учуз лазим вуйи уьл гъийиз ча.

Учук кайи бурж учуз гьялал апӀин, ва учура жарадарик кайи ич буржар дурариз гьялал апӀурча.

Учу тямягьариъ мааан, писвалихьан уьрх».

Эгер учву инсанарилан хил алдабгъиш, Аьршарин ичв Адашдира учвлан хил алдабгъиди.

Завуъ айи жакьвариз лигай: дурари я убзури, я ккадабцӀури шулдар, я амбарханйириз тахил уч апӀдар. Хъа Аьршарин ичв Адашди дурар тухъ апӀура. Хъа учву дурартӀан хайлин артухъ дарнучвахъа?

Жилиин девлет уч мапӀанай, мушваъ думу сурарина мюркъю ипӀуру ва угърийири, хулаъ учӀвну, гьитӀибкӀуру. Аьршариин девлет уч апӀинай, душваъ думу сурарина мюркъю ипӀидар ва, угърийири, архьну, гьитӀибкӀидар, Гьаз гъапиш яв девлет наан аш, яв юкӀвра гьадушваъ хьибди.

Сарихьанра кьюр агъайиз сабси гъуллугъ апӀуз шулдар, фицики дугъаз санур даккун, хъа тмунур ккун хьиди; вая сариз ужуди гъуллугъ апӀиди, хъа тмунуриз – чӀуруди. Аллагьдизра, девлетназра сатӀиди гъуллугъ апӀуз хьибдарчвухьан.

Хъа гъи ади, закур цӀигъ убгурайи чюлин укӀ Аллагьди гьаци уччвуди балгурайиган, Дугъу учвʼин дицитӀан уччвуди палат алабхьидаринхъа, цӀибтӀан хътругърудар!

Уву ужʼвал апӀруган, яв арччул хили гьапӀраш, гагул хилиз аьгъю дарибшри. Яв ужʼвал жиниди ибшри. Жиниди апӀурайибра рябкъру Яв Адашди думуган увуз пешкеш тувди.

Лигай-гьа, учву апӀру ужʼвал варидарин улихь рябкъруганси мапӀанай: даршиш Аьршарин ичв Адашдин терефнаан учвуз пешкеш хьибдар.

Учву ушв бисруган, кьюб маш гъяйидар фици пашманвалиъ кӀул ипну лицураш, гьаци учвура машар пашман дапӀну милицанай. Фицики дурари, чпи ушв бисурайиб улупуз кӀури, чпин машар язухъ гъюру гьялнаъ дерккра. Гьякьди кӀуразачвуз, дурарихьна рубкьруб дурубкьна. Хъа уву кӀуруш, ушв бисруган, кушар журх, машар жикӀ, уву ушв бисурайиб инсанариз ваъ, хъа дярякъди увухъ хъайи яв Адашдиз аьгъю шлуганси апӀин. Гьадмуган жиниди апӀурайиб вари рябкъюрайи яв Адашди пешкеш тувдивуз.