KUTUHUKA 24
24
1Iye yamba kuli Mose ngwenyi, Kandukenu kuli Yehova, yena ni Arone ni Nandambe ni Ambihu ni makumi shimbiali a makulwana a A-Izalele. Nukawayilile kusuku. 2Mose ukawenyi akakundame kuli Yehova. Alioze o kanda akakundama, chipwe e atu kanda akakanduka hamwe nenyi.
3Mose yaya, yambulwila atu maliji eswe a Yehova ni chiyulo cheswe. Atu eswe akumbulwile ni liji limuwika ngwo, Maliji ano eswe Yehova hahanjika kumutukaalinga. 4Mose yasoneka maliji eswe a Yehova, yalimeneka chimenemene mbwi, yatunga ku kulwa mulundu chilumbilo ni kumi lia manguji ni manguji aali nikulita ni mavungu a A-Izalele kumi ni aali. 5Yatuma akweze a A-Izalele o alambwile milambu ya kulumba, yalambula kuli Yehova ngombe apwe milambu ya sambukila. 6Mose yanda chihanda cha hakachi cha ku manyinga, yasa mu mbasia jimwe, mba chihanda chikwo yachisapwila ha che chilumbilo. 7Iye yanda we mukanda wa usendo, yautanga hanga atu akevwe. O yamba ngwo, Ye yeswe hahanjika Yehova yetu kumutukayilinga. Kumutukononoka. 8Mose yanda manyinga, yaasapwila hali e atu ngwenyi, Talenu manyinga a usendo Yehova hanakolesa ni yenu ha kutwala ku maliji ano eswe.
9Hohene akandukile Mose ni Arone ni Nandambe ni Ambihu ni makumi shimbiali a makulwana a A-Izalele. 10O yamona Zambi ya A-Izalele. Kushi lia yiliato yenyi kwapwile ngwe mawe a safwira a kwala, zwalala lume ngwe mwilu. 11Yilolo ja A-Izalele kaalingile chipi, yamona Zambi, yalia, yanwa.
12Yehova yamba kuli Mose ngwenyi, Kanduka ha mulundu ndo kuli yami, utwameko. Mungukwaha mawe ni shimbi ni maliji a shimbi, yize hingunasoneka, ukayilongese. 13Mose yakatuka hamwe ni Yoshua, kavumbi kenyi, mba Mose yakanduka ha mulundu wa Zambi. 14Iye yamba kuli e makulwana ngwenyi, Nututwaminyine kuno ndo mutwiza nawa kuli yenu. Arone ni Hure hamwe ni yenu ali, mweswawo uli ni liji ahete kuli ayo.
15Mose yakanduka ha mulundu. Lie lelwa liafukile mulundu. 16Uhenya wa Yehova Watwamine ha mulundu wa Sinai. Lie lelwa yiliufuka ha matangwa asambano. Ha tangwa liamuchishimbiali iye yatambika kuli Mose ni liji yilituhuka muchima lia lelwa. 17Kusoloka cha uhenya wa Yehova chapwile ngwe kahia ka kulalisa ha mbulwa mulundu kumeso ja A-Izalele. 18Mose yanjila mwe muchima lia lelwa. Yakanduka ha mulundu. Mose wapwile ha mulundu makumi awana a matangwa ni makumi awana a ufuku.
Sélection en cours:
KUTUHUKA 24: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
