KUTUHUKA 25
25
1Yehova yamba kuli Mose ngwenyi, 2Hanjika ni A-Izalele ukangunehene milambu. Ukatambule mulambu wami kuli mweswe ukwete mbunge ya kutá. 3Mulambu mukatambula kuli ayo uno; ni oru, ni prata, ni unengu; 4ni mahina alauluka, ni a ufungo, ni a ngengu, ni apema atoma, ni uzangi wa pembe; 5ni malambu a kuji a mapanga a kulomba achila, ni malambu a yipanyundu, ni mitondo ya mukesha; 6ni maji a ndeya, ni tumbuto twa lupembo mupema twa maji a kuwayisa no, ni twa insensu; 7ni mawe a sardonica, ni mawe akaalamike ha efode ni ha chipwiko. 8Akangutungile zuwo lisandu hanga ngukatwame hakachi ko. 9Nikulita ni yeswe mungukulweza, cheseko cha tabernakulu, ni cheseko cha yikashi yayo, chochene ukayitunge.
10Akasonge mushete wa mutondo wa mukesha. Usuhe wawo ukapwe mbandu jiali ni chihanda cha hakachi. Utohe wawo ukapwe mbandu yimuwika ni chihanda cha hakachi. Chizundamo chawo chikapwe mbandu yimuwika ni chihanda cha hakachi. 11Ukalamikeho oru ya kusayisa ni muchima ni haze ukayilamike. Ukafulileho chipangula cha oru cha kujingilika kweswe. 12Ukauzuzulwile ngo jiwana ja oru. Ukajisele ku molu jawo awana. Ngo jiali jikapwe ku sali likwo, mba ngo jiali ku sali likwo. 13Ukasonge mikambo ya mutondo wa mukesha, ukalamikeho oru. 14Ukanjise ye mikambo mu ngo jayo ha malumbu a mushete, ya kumbachila mushete. 15Ye mikambo yikatwame mu ngo ja mushete. Kanda akayitomonamo. 16Ukanjise mu mushete ye shindakenyo yize mungukwaha. 17Ukasonge nawa chitwamo cha keke cha oru ya kusayisa. Usuhe wacho mbandu jiali ni chihanda cha hakachi. Utohe wacho mbandu yimuwika ni chihanda cha hakachi. 18Ukafule nawa akerupimi aali a oru. Ukaafule ku oru ya kutatula, ku masongo aali a chitwamo cha keke. 19Ukafule kerupimi umuwika ku songo limwe, mba kerupimi mukwo ku songo likwo. Ukafulile akerupimi ku masongo eswe ni aali, a ku chishinda chimuwika cha chitwamo cha keke. 20Akerupimi akazazulule mapulwa jo helu nikuzulamina ni mapulwa jo che chitwamo cha keke. Akatalikise meso jo umwe kuli mukwo. Akalitale meso jo ku chitwamo cha keke. 21Ukanangike chitwamo cha keke helu lia mushete. Ukase mu mushete ye shindakenyo yize mungukwaha. 22Kokwene mungukatakana ni yena. Mungukalishimwinya ni yena ni liji lia kukatuka helu lia chitwamo cha keke, mukachi ka akerupimi aali atwama ha mushete wa shindakenyo ha kutwala ku yuma yeswe mungukwambayo hali A-Izalele.
23Ukasonge mesa ya mutondo wa mukesha. Usuhe wayo mbandu jiali. Utohe wayo mbandu yimuwika. Chizundamo chayo mbandu yimuwika ni chihanda cha hakachi. 24Ukalamikeho oru ya kusayisa. Ukafulileho nawa chipangula cha oru cha kujingilika kweswe. 25Ukayisongele mukomo. Utohe wawo ukapwe mbanda-kwoko limuwika, wa kujingilika kweswe. Ukafule nawa chipangula cha oru ha mukomo wayo, cha kujingilika kweswe. 26Ukayifulile ngo ja oru jiwana nikusa je ngo ha mbango jize jili ku molu jayo. 27Akakunjike je ngo hehi ni mukomo jikapwe ja kunjishilamo mikambo mukumbachila mesa. 28Ukasonge mikambo ya mutondo wa mukesha. Ukalamikeho oru. Ukambate nayo ye mesa. 29Ukafule yenga yayo, ni misenge yayo, ni ndeho jayo, ni mitondo yayo ya kutehwina. Ukayifule ya oru ya kusayisa. 30Ukatumbike ha mesa mbolo ja kutumbieka kumeso jami matangwa eswe.
31Ukafule chikwachilo cha ndeya cha oru ya kusayisa. Ukafule che chikwachilo cha ndeya ku milimo ya kutatula ni nganda yacho ni mukungo wacho, ni misenge yacho, ni mawundu jacho, ni yitemo yacho, yeswe yikapwe ya chishinda chimuwika. 32Kukapwe nawa mitango yisambano ya kuhachika ku malumbu jacho. Mitango yitatu ya chikwachilo cha ndeya ya kuhachika ku lumbu limuwika liacho, mba mitango yitatu ya chikwachilo cha ndeya ya kuhachika ku lumbu likwo. 33Ku mutango umuwika kukapwe misenge yitatu ya kulifwa ni amendoa, ni wundu ni chitemo. Ku mutango ukwo kukapwe nawa misenge yitatu ya kulifwa ni amendoa, ni wundu ni chitemo. Chochene ku mitango yisambano yize ya kuhachika ku chikwachilo cha ndeya. 34Kukapwe nawa ku chikwachilo cha ndeya misenge yiwana ya kulifwa ni amendoa, ni mawundu jacho ni yitemo yacho. 35Wundu mushi lia mitango yiali lia chishinda chimuwika nacho, ni wundu mushi lia mitango yiali lia chishinda chimuwika nacho, ni wundu mushi lia mitango yiali lia chishinda chimuwika nacho, ku mitango yisambano yize ya kuhachika ku chikwachito cha ndeya. 36Mawundu jacho ni mitango yacho yikapwe ya chishinda chimuwika. Milimo ya chishinda cheswe yikapwe ya oru ya kusayisa ni kutatula. 37Ukafule ndeya jacho shimbiali. Akawike je ndeya, jikatemukine kulutwe liacho. 38Ni mana jacho ni yenga yacho ya kukwachilaho mwelela, yikapwe ya oru ya kusayisa. 39Ukayifule ku *talentu yimuwika ya oru ya kusayisa ni yikashi yino yeswe. 40Utale kanawa, ukayilinge nikulita ni cheseko hinakulweza ha mulundu.
Sélection en cours:
KUTUHUKA 25: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
