KUTUHUKA 23
23
1Kanda ukambulula saki. Kanda ukalifutula ni yingulungulu kupwa chela cha uhenge. 2Kanda ukakaula mbunga mukulinga chipi. Chipwe ha kusopa mutonga kanda ukashindakenya nikukaula mbunga mukuhengesa upatwilo. 3Chipwe kanda ukalemesa chiswale ni chikuma chenyi.
4Nyi muwana ngombe wa mukwa kole ye, hanji chimbulu chenyi kanapianguka, ukamuhilwise wate kuli iye nawa. 5Nyi mumona chimbulu cha yoze wakukuvwila kole kanashachiwa ni chiteli chenyi, kanyama, kanda ukachina kumukwasa. Uchimukwase lume kumulelumuna.
6Kanda ukahengesa upatwilo wa mukwenu chiswale ku chikuma chenyi. 7Usosoloke kusuku ni chuma cha mahuza. Kanda ukashiha mukwa kusamba chipwe mukwa ululi, mumu ami chichi kusambisa yingulungulu. 8Kanda ukatambula chijiko, mumu chijiko kuchakupupuchisa waze akwete meso. Kuchakuhengesa maliji a mukwa ululi.
9Kanda ukamwesa lamba njize, mumu nunanyingika mbunge ya njize, se yenwene nwapwile njize mu chifuchi cha Engitu.
10Ukalime minda ye ha miaka yisambano. Ukache mbuto yayo. 11Alioze ha mwaka wamuchishimbiali hikuyecha lume, yikapwe yihutu, hanga yiswale a atu jami akalie. Mba yize makahichika, tushitu a mu yambu akalie. Chizechene ukalinge ni munda we wa uva ni wa olevwe nawa.
12Ha matangwa asambano ukalinge milimo ye. Ha tangwa liamuchishimbiali hikuhwima, ni ngombe ye, ni chimbulu che akahwime, hanga mwana wa ndungo ye wa pwo ni njize akasanguluke. 13Nukafunge yuma yeswe hinamba kuli yenu. Kanda nukavuluka majina ja tuzambi tweka, chipwe kanda akaevwa ku makanwa jenu.
14Mwaka ha mwaka, yisuho yitatu, ukangulingile chiwanyino. 15Ukafunge chiwanyino cha mbolo kuyishi futunwiso. Ukalie mbolo kuyishi futunwiso matangwa shimbiali ngwe nakwambile, haze naselele ha kakweji ka Ambimbi,#23.15 Kunake. mumu ha yoze mwene yena wakatukile ku Engitu. Kanda akasoloka kumeso jami mokomoko. 16Chiwanyino cha kuhela mbuto, (mbuto yitangu ya ku kuhondangana che), wakulima ku munda, ni chiwanyino cha kukungila mbuto ha kuhwa cha mwaka, muze mukunga ya ku kuhondangana che ku munda. 17Malunga je eswe akasoloke kumeso ja Mwene Yehova mwaka ha mwaka, yisuho yitatu.
18Kanda ukalambula manyinga a chitapo chami hamwe ni mbolo ya futunwiso. Chipwe maji a chiwanyino chami kanda asala ufuku weswe ndo mu kucha.
19Ukahetese mu zuwo lia Yehova Zambi ye, yitangu ya kuhia ya ku mbuto ya mu minda ye.
Kanda ukateleka mwana-pembe mu yamwa ya naye.
20Mungutuma mungelo kulutwe lie mukukufunga mu jila, mukukuhetesa kuze hingunalulika. 21Ulifunge kumeso jenyi, uhalakane ku liji lienyi. Kanda ukamuvwisa kupiha mumu iye kechi kukonekena uvulumunyi we, mumu jina liami lili muli iye.
22Alioze nyi chamwenemwene muhalakana ku liji lienyi nikulinga yeswe mungwamba, mba kumungukapwa mukwa kole kuli akwa kole je, mukwa kumwesa luyinda kuli waze akukumwesa luyinda.
23Mumu mungelo wami kumakakutetekela, kumakakuhetesa ndo kuli A-Amore, ni kuli A-Hete, ni kuli A-Perize, ni kuli A-Kanana, ni kuli A-Hevwe, ni kuli A-Yepushe. Yami kumungukaateta. 24Kanda ukafukama kuli tuzambi two chipwe kwalingila, ka, chipwe kanda ukalinga nikulita ni yitanga yo alioze ukaapuzule liakulu. Ukapalwole yipinji tuponya two. 25Nukavumbike Yehova Zambi yenu. Iye kumakawahisa kulia chenu ni meya jenu. Kumungukachiza kuyiza hakachi kenu. 26Kukuchi kapwa mu chifuchi chenu niumwe yoze maselumuna mwanenyi, chipwe mumba, ka. Kumungukanuhetesa ku kuzuka cha matangwa jenu. 27Kumungukatuma mwongo wami kulutwe lienu. Mungukapinjisa atu eswe waze munukaaheta, mba akwa kole jenu eswe makanuchina. 28Kumungukatuma mboji kulutwe lienu, waze makahuma kumeso jenu A-Hevwe, ni A-Kanana, ni A-Hete. 29Chichi kwahuma kumeso jenu ha mwaka umuwika kuchina che chifuchi muchikapwa chahululu mba tushitu a mu yambu makanwokela. 30Hakehe hakehe mungukaahuma kulutwe lienu ndo munukapwa mbunga nikupita chifuchi. 31Mungukafunjika njiza jenu chize ku Kalunga-lwiji Muchila ndo ku kalunga-lwiji wa A-Filistea; chize ku puya ndo ku Lwiji, mumu mungukakunjika akwa chifuchi chize ku moko jenu mba yenu munukaahuma kulutwe lienu. 32Kanda nukakolesa no usendo niweumwe chipwe ni tuzambi two, ka. 33Kanda akatwama mu chifuchi chenu kuchina manuvulumwisa mu yuma yami. Mumu nyi munulingila tuzambi two, chamwenemwene kumuchikapwa kambwila kuli yenu.
Sélection en cours:
KUTUHUKA 23: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
