مَتّا 4

شئیتان ایسّایا چَکّاسیت

(مَرکاس 1‏:12‏–13؛ لوکا 4‏:1‏–13)

1رَندا پاکێن روها ایسّا گیابانا بُرت که شئیتان آییا بچَکّاسیت.#4‏:1 چَکّاسگ، بزان آزمائِش کنگ، اِمتهان گِرگ. 2چِلّ شپ و چِلّ رۆچ رۆچگ دارگا رند ایسّا گُژنَگ بوت. 3گڑا شئیتان په آییئے آزمائش کنگا آتک و گوَشتی: ”اگن تئو هُدائے چُکّ ائے، اے سِنگان بگوَش نگن ببنت.“ 4ایسّایا پَسّئو دات: ”پاکێن کتابا نبیسگ بوتگ:

’مردم تهنا په نان زندگَ نبیت،

چه هُدائے زبانئے سجّهێن هبرانی مَنّگا زندگَ بیت.‘“ #4‏:4 موسّائے واز 8‏:3.

5پدا شئیتانا ایسّا پاکێن شهر اورشلیما برت و مزنێن پرستشگاهئے دیوالئے بُرزترێن جاگها اۆشتارێنت و 6گوَشتی: ”اگن تئو هُدائے چُکّ ائے، گڑا وتا چه اِدا جَهلا دئور بدئے، چێا که نبیسگ بوتگ:

هُدا تئیی بارئوا وتی پرێشتگان هُکمَ کنت و

آ ترا وتی دَستانی دلا دارنت

که تئیی پاد ڈۆکێا ملگّیت.“#4‏:6 زَبور 91‏:11‏–12.

7ایسّایا گوَشت: ”هئو، بله چُش هم نبیسگ بوتگ: وتی هُداوندێن هُدایا آزمائِش مکن.“#4‏:7 موسّائے واز 6‏:16.

8پدا شئیتانا ایسّا سکّێن بُرزێن کۆهێئے سرا برت و چه اۆدا دنیائے سجّهێن بادشاهی و آیانی شان و شئوکتی پێش داشتنت و 9گوَشتی: ”اگن تئو منی دێما کۆنڈان بکپئے و منا سُجده بکنئے، من اے سجّهێنان ترا دئیان.“ 10ایسّایا گوَشت: ”او شئیتان! چه منی دێما گُم بئے! پاکێن کتابا نبیسگ بوتگ: وتی هُداوندێن هُدائے پرستشا بکن و تهنا هماییئے هِزمتا بکن.“#4‏:10 موسّائے واز 6‏:13. 11گُڑا شئیتانا ایسّا یله دات و شت. نون پرێشتگ آتکنت و ایسّائے هِزمتِش کرت.

ایسّائے هِزمتکاریئے بُنگێج

(مَرکاس 1‏:14‏–15؛ لوکا 4‏:14‏–15؛ یوهَنّا 4‏:43‏–45)

12وهدے ایسّا سَهیگ بوت که یَهیا دَزگیر کنگ بوتگ، گڑا جَلیلا شت. 13ناسِرَهئے شهری یله دات و کَپَرناهومئے شهرا جَهمنند بوت. کَپَرناهوم، جَلیلئے مَزَن‌گوَرمئے#4‏:13 مَزَن‌گوَرم، بزان دریاچه. کِرّا، زِبولون و نَپْتالیئے کَبیلهانی دَمگا اِنت. 14اے ڈئولا اِشئیا نبیئے کرتگێن اے هبر راست و سَرجم بوت:

15 زِبولون و نَپْتالیئے دَمگا، گوَرمئے کشئے مزن‌راهئے سرا،

اُردُنئے کئورئے آ دستا، جَلیلئے هما هَند و دَمگا که درکئوم جَهمنند اَنت،

16 هما مردم که تهاریا نِشتگ‌اَنت،

آیان مزنێن رُژنے دیست و

هما مُلکا که اۆدا مَرک ساهێل # 4‏:16 ساهێل، بزان ساهِگ کنگ. اِنت،

اۆدئے جَهمنندانی سرا رُژنے تالان بوت. # 4‏:16 اِشئیا نبیئے کتاب 9‏:1‏–2.

17چه هما وهدا ایسّایا اے جارئے جنَگ بُنگێج#4‏:17 بُنگێج، بزان بِندات، شُرو. کرت. گوَشتی: ”چه وتی گناهان پشۆمان ببێت و تئوبه بکنێت، چێا که آسمانی بادشاهی آتکگ و سر بوتگ.“

ایسّائے ائولی چارێن مُرید

(مَرکاس 1‏:16‏–20؛ لوکا 5‏:2‏–11؛ یوهَنّا 1‏:35‏–42)

18وهدے ایسّا جَلیلئے مَزَن‌گوَرمئے لَمبا#4‏:18 لَمب، بزان دامن، کِرّ. تَرّگا اَت، دو براتی دیست، شَمون که دومی نامی پِتْرُس اَت و آییئے برات اَنْدْریاس. آیانی کار ماهیگیری اَت و آ وهدا په ماهیگیریا وتی دام و ماهۆران گوَرما دئور دئیگا اَتنت. 19ایسّایا گۆن آیان گوَشت: ”بیاێت، منی رَندگیریا بکنێت و من شمارا اَنچُشَ کنان که ماهیگ گِرگئے بدلا، مردمانی دلان شکارَ کنێت.“#4‏:19 دلئے شکار کنگئے مکسد مردمان هُدائے راها آرگ اِنت. 20آیان هما دمانا وتی دام یله داتنت و آییئے همراه بوتنت. 21وهدے کمّے دێما شت، دگه دو براتی دیست، زِبدیئے چُکّ آکوب و یوهَنّا که بۆجیگا#4‏:21 بۆجیگ، بزان لانچ، کَشتی. گۆن وتی پت زِبْدیا نِشتگ‌اَتنت و وتی ماهۆران سْراچگ#4‏:21 سْراچگ، بزان دِرتگێن دۆچگ و اَڈّ کنگ. و شَرّ کنگا اَتنت. ایسّایا دوێن گوانک جتنت. 22آیان هم هما دمانا وتی پت گۆن بۆجیگا یله دات و آییئے همراه بوتنت.

جَلیلئے دَمگا، ایسّائے کار و هِزمت

(مَرکاس 1‏:35‏–39؛ لوکا 4‏:42‏–44)

23ایسّایا سجّهێن جَلیلا تَرّ و گردَ کرت. آییا کَنیسَهانی#4‏:23 کَنیسَه، بزان یَهودیانی پرستشگاه. تها مردم تالیمَ داتنت، هُدائے بادشاهیئے مِستاگَ#4‏:23 مِستاگ، بزان وشّێن هال، بشارت. رسێنت و مردم چه هر پئیمێن ناجۆڑی و نادْراهیان دْراهَ کرتنت. 24سجّهێن سوریَها آییئے نام و تئوار شِنگ بوت و مردمان جِنّی و مَریئے نادْراه#4‏:24 مَری اَنچێن نادْراهیے که مردما بێهۆش و گجّ و کَپَ کنت. اَربی و پارسیا ”صرع“. و لَنگ و مُنڈ و هما سجّهێن ناجۆڑ که وَڑ وَڑێن نادراهی و دَرد و دۆرانی تها اَتنت، ایسّائے کِرّا آورتنت و آییا دْراهَ کرتنت. 25جَلیل و دِکاپولیس و اورشَلیم و یَهودیَه و اُردُنئے کئورئے آ دستئے هَند و دَمگانی بازێن مردمے آتک و ایسّائے همراه بوت.

Sélection en cours:

مَتّا 4: HPKB

Surbrillance

Copier

Comparer