مَتّا 5

بَهتاوری

(لوکا 6‏:20‏–23)

1وهدے ایسّایا مردمانی مُچّی دیست، کۆهێئے سرا سر کپت و نِشت. آییئے مُرید آییئے کِرّا آتکنت. 2گڑا اے ڈئولا آیانی تالیم دئیگا لگّت:

3”بَهتاور اَنت هما که وتی روهئے گریبیا سرپد اَنت، چێا که آسمانی بادشاهی همایانیگ اِنت.

4بَهتاور اَنت هما که گَمیگ اَنت، چێا که آیان تسلّا رَسیت.

5بَهتاور اَنت هما که نَرم‌دل اَنت، چێا که زمینئے میراسدار#5‏:5 میراسدار، بزان میراس بَرۆک، میراسا شریکدار، وارِس. هما بنت.

6بَهتاور اَنت هما که په هَکّ و اِنساپا شدیگ#5‏:6 شُدیگ، بزان گُژنَگ. و تُنّیگ اَنت، چێا که آ سێرَ بنت.

7بَهتاور اَنت هما که په دگران رهمَ کننت، چێا که آیانی سرا رهم کنگَ بیت.

8بَهتاور اَنت هما که دِلِش پاک اِنت، چێا که آ هُدایا گندنت.

9بَهتاور اَنت هما که سُهل و اێمنیَ کارنت، چێا که آ هُدائے چُکّ گوَشگَ بنت.

10بَهتاور اَنت هما که هَکّ و اِنساپئے راها آزار دئیگَ بنت، چێا که آسمانی بادشاهی همایانیگ اِنت.

11بَهتاور اێت شما که منی سئوَبا مردم شمارا بےاِزّتَ کننت و آزارَ دئینت و شمئے بارئوا درۆگَ بندنت و بدێن گپَّ جننت. 12گَل ببێت و شاتکامی بکنێت، چێا که آسمانا شمئے مُزّ باز اِنت. پێسریگێن نبی‌اِش همے پئیما آزار داتگ‌اَنت.

جهانئے واد و نور

13شما جهانئے واد اێت، بله اگن وادئے تام برئوت، گڑا چۆن پدا وادۆک کنگَ بیت؟ دگه هِچّ کارا نئیئیت، اَبێد چه#5‏:13 اَبێد چه، بزان گئیر چه. اِشیا که دئور دئیگ ببیت و مردمی لتگمال بکننت.

14شما جهانئے نور و رُژن اێت، شهرے که کۆهێئے سرا اِنت، چێر و اَندێم#5‏:14 اَندێم، بزان چێر، پۆشیده. بوتَ نکنت. 15هچکَس رۆکێن چِراگا کاسگئے چێرا اێرَ نکنت، چِراگدانئے سرا اێریَ کنت تانکه آییئے رُژن لۆگئے سجّهێن مردمان برسیت. 16همے ڈئولا شمئے نور مردمانی نیاما تالان ببیت، تانکه آ شمئے نێکێن کاران بگندنت و شمئے آسمانی پتئے ستایا بکننت.

شَریَتئے سَرجم کنگ

17گُمان مکنێت که من په شَریَت و نبیانی هبرانی دور کنگ و ناکار کنگا آتکگان. من په آیانی ناکار کنگا نئیاتکگان، په آیانی سَرجم کنگا آتکگان. 18شمارا راستێنَ گوَشان، آسمان و زمینئے تَباه بئیگا پێسر، شریَتئے یکّ آب#5‏:18 آب، بزان هرپ، اَنگرێزیا: ”letter in the alphabet“. و ٹِکّے هم گارَ نبیت، تان هما وهدا که شریَتئے هر چیزّ سَرجم مبیت. 19پمێشکا اگن کَسے چه شَریَتئے پرمانان گوَنڈترێنے هم مان مئیاریت و دگران همے تالیما بدنت، آسمانی بادشاهیا کَسترێن زانگَ بیت. بله کَسے که اے پرمانانی سرا اَملَ کنت و دگران هم همے تالیما دنت، آسمانی بادشاهیا مزن زانگَ بیت. 20گُڑا شمارا گوَشان، اگن شمئے پهرێزکاری چه پَریسی و شَریَتئے زانۆگرانی پهرێزکاریا گێشتر مبیت، هچبر آسمانی بادشاهیا شُتَ نکنێت.

کُشت و کۆش

(لوکا 12‏:58‏–59)

21شما اِشکتگ که گۆن پێشیگێن مردمان گوَشگ بوتگ: هۆن مکن.#5‏:21 دَررئو 20‏:13. هرکَس هۆنَ کنت، هَکدیوانا#5‏:21 هَکدیوان، بزان آمیدگِس، دادگاه. مئیاربار کنگَ بیت. 22بله من شمارا گوَشان، هرکَس که وتی براتئے سرا زَهر اِنت، آ هم هَکدیوانا#5‏:22 هَکدیوان، بزان آمیدگِس، دادگاه. مئیاربار کنگَ بیت. کَسے که وتی براتا بد و ردَ کنت، مزنێن هَکدیوانا مئیاربار کنگَ بیت و کَسے که وتی براتا ’هۆڈ‘ و ’اَهمکَ‘ گوَشیت، دۆزهئے آسئے سِزاوارَ بیت. 23پمێشکا اگن کُربانجاها، کُربانیگ کنگئے وهدا یاتا کپتئے که تئیی براتا گۆن تئو گِلَگے هست، 24وتی کُربانیگا همۆدا کُربانجاها بِلّ و برئو پێسرا وتی براتا وَشّان بکن، رَندا بیا کُربانیگ بکن. 25اگن کَسێا گۆن تئو اَڑ و داواے هست و ترا هَکدیوانا بارت، گڑا راها گۆن آییا وتی اَڑا بگیشّێن و سُهل بکن. چۆ مبیت که آ ترا کازیئے کِرّا ببارت و کازی ترا اَپسرئے دستا بدنت و تئو زندانا دئور دئیگ ببئے. 26ترا راستێنَ گوَشان، تان زَرّانی گُڈّی#5‏:26 گُڈّی، بزان آهِری. پئیی و پئیسها پُرَّ نکنئے، چه اۆدا آزاتَ نبئے.

زِنا و تلاک

27شما اِشکتگ که گوَشگ بوتگ: زِنا مکن.#5‏:27 دَررئو 20‏:14. 28بله من شمارا گوَشان، اگن کَسے جنێنێا په بدێن چَمّے بچاریت، بزان وتی دلا گۆن هما جنێنا زِنایی کرت. 29پمێشکا اگن تئیی راستێن چمّ ترا دێم په گناها بارت، آییا کَشّ و دئور بدئے، چێا که چه سَرجمێن جانئے دۆزها کپگا په تئو شرتر همِش اِنت که تئیی جسمئے یکّ آزاے چه تئو جتا ببیت. 30همے ڈئولا، اگن تئیی راستێن دست ترا دێم په گناها بارت، آییا بُرّ و دئور دئے، چێا که چه سَرجمێن جانئے دۆزها رئوگا په تئو شرتر همِش اِنت که تئیی جسمئے یکّ آزاے چه تئو جتا ببیت.

31گوَشگ بوتگ: هرکَس که وتی جنا چه لۆگا دَرَ کنت، باید آییا تلاک‌نامَهے بدنت.#5‏:31 موسّائے واز 24‏:1. 32بله من شمارا گوَشان، اگن جنێنێا زِنا نکرتگ و مرد انگت هم آییئے سئون و تلاکان بدنت، بزان جنێنا زِناکاریئے نێمگا تێلانک دئیَگا اِنت و اگن کَسے گۆن تَلاک داتگێن جنێنێا سور و سانگ بکنت، گڑا بزان گۆن آییا زنا کنت.

سئوگند

33شما اے هم اِشکتگ که گۆن پێشیگێن مردمان گوَشگ بوتگ: وتی سئوگندا مپرۆش#5‏:33 لاویان 19‏:12 و هُداوندئے نامئے سرا وارتگێن سئوگندان پوره بکن.#5‏:33 موسّائے واز 23‏:21. 34بله من شمارا گوَشان، هچبر سئوگند مئوَرێت، نه اَرشئے، چێا که هُدائے تَهت اِنت، 35نه زمینئے، چێا که هُدائے پادانی چێرئے کُرسی اِنت، نه اورشَلیمئے چێا که ’مزنێن بادشاهئے‘ شهر اِنت. 36وتی سرئے سئوگندا هم مئوَر، چێا که تئو وتی مودانی یکّ ٹالے هم اِسپێت یا سیاه کرتَ نکنئے. 37پمێشکا اۆدا که شمارا ’هئو‘ گوَشگی اِنت، بگوَشێت ’هئو‘ و اۆدا که ’اِنّه‘ گوَشگی اِنت، بگوَشێت ’اِنّه‘. چه اِد و گێشتر گوَشگ شئیتانئے کار اِنت.

بێرگیری

38شما اِشکتگ که گوَشگ بوتگ: چمّئے بدل چمّ و دَنتانئے بدل دَنتان.#5‏:38 دَررئو 21‏:24. 39بله من شمارا گوَشان، رَدکارێن مردمئے دێما مه‌اۆشتێت. اگن کَسے تئیی راستێن گُبّا#5‏:39 گُبّ، بزان گۆنگ. شَهماتے جنت، دومی گُبّا هم آییئے نێمگا بتَرّێن. 40اگن کَسے په تئیی جامگئے کَشّگا ترا هَکدیوانا بارت، وتی کباها#5‏:40 کَباه، بزان جُبّه که پَشکئے سربرا گوَرا کننتی. هم آییا بدئے. 41اگن کَسے ترا په زۆر و بیگاری هزار گامئے#5‏:41 اَسلیگێن یونانی نبشتانکَ گوَشیت: ”میلیُن“، بزان کِساس یکّ و نێم کیلومیتر. پَند جنَگَ پرماییت، دو هزار گام آییئے همراهیا برئو. 42کَسے که چه تئو لۆٹیت، آییا بدئے و اگن یکّێا وامے لۆٹت، دئیگا چَکّ و پَد مبئے.

مِهر

(لوکا 6‏:27‏–36)

43شما اِشکتگ که گوَشگ بوتگ: وتی همساهگا دۆست بدار#5‏:43 لاویان 19‏:18. و گۆن وتی دژمنا نپرت بکن. 44بله من شمارا گوَشان، وتی دژمنان دۆست بدارێت و په همایان که شمارا آزارَ دئینت، نێکێن دْوا بلۆٹێت، 45تانکه شُما وتی آسمانی پتئے چُکّ ببێت، چێا که آ وتی رۆچا په نێک و بد دوێنانَ دْرپشێنیت#5‏:45 دْرپشێنگ، بزان شهم دئیگ، رُژنا کنگ، جلَشکێنگ. و وتی هئورا په پهرێزکار و رَدکار دوێنانَ گوارێنیت. 46اگن شما تهنا هما مردمان دۆست بدارێت که شمارا دۆستَ دارنت، شمارا چه هُدائے نێمگا هِچّ مُزّے نرسیت. سُنگی#5‏:46 سُنگی، بزان مالیات‌گیر، ٹئیکسئے گِرۆک. و مالیاتگیر#5‏:46 بنی اِسراییلیان، سُنگی و مالیاتگیرێن مردم نادۆست اَتنت، چێا که آ رومئے هکومتئے کارنده اَتنت و بازێنێا په وتی نپ و سوتّا چه مردمان گێشێن سُنگ و مالیاتَ گپت. هم وتی دۆست دارۆکان دۆستَ دارنت. 47اگن شما تهنا وتی براتان سلام و دْرۆت بگوَشێت، گڑا شما چه اے دگران شرتر نه‌اێت. هُداناپرمانێن مردم هم وتی براتان سلام و درۆتَ گوَشنت. 48پمێشکا شما باید اِنت کامِل ببێت، اَنچُش که شمئے آسمانی پت کامِل اِنت.

Sélection en cours:

مَتّا 5: HPKB

Surbrillance

Copier

Comparer