مَتّا 3

پاکشۆدی دئیۆکێن یَهیائے کُلئو

(مَرکاس 1‏:1‏–8؛ لوکا 3‏:1‏–17)

1آ رۆچان، پاکشۆدی#3‏:1 پاکشۆدیئے لبز، یونانی زبانا ”بَپْتیسْمَه“ گوَشگَ بیت و اِشیئے مانا ”آپا بُکّ دئیگ“ یا ”گۆن آپا شۆدگ“ اِنت. دئیۆکێن یَهیا آتک و یَهودیَهئے گیابانا جاری پِرّێنت: 2”تئوبه بکنێت، چێا که آسمانی بادشاهی آتکگ و سر بوتگ.“ 3یَهیا هما اِنت که اِشئیا نبی آییئے بارئوا گوَشیت:

گیابانا، کَسے گْوانکَ جنت: # 3‏:3 گْوانک جنَگ، بزان تئوار کنگ، لۆٹاێنگ.

”هُداوندئے راها تئیار بکنێت،

هُداوندئے کِشکان راست و تچک بکنێت.“ # 3‏:3 اِشئیا نبیئے کتاب 40‏:3.

4یَهیایا چه اُشترئے مودان گوَپتگێن پۆشاک گوَرا اَت و پۆستێن کمربندے لانکا اَت. آییئے وَرد و وراک مَدَگ و گیابانی بێنگ#3‏:4 بێنگ، بزان شَهد، اَسَل. اَت. 5اورشَلیمئے نندۆک، یَهودیَهئے سرجمێن دَمگئے مردم و اُردُنئے کئورئے کِرّ و گوَرئے سجّهێن جَهمنند آییئے کِرّا شتنت. 6وتی گُناهِش مَنّتنت و یَهیایا اُردُنئے کئورا آ پاکشۆدی داتنت.

7وهدے یَهیایا دیست که بازێن پَریسی و سَدوکیے پاکشۆدی گِرَگا منی کِرّا آیگا اِنت، گۆن آیان گوَشتی: ”او سْیَه‌مارزادگان! کئیا شمارا گوَشتگ که چه آیۆکێن کَهر و گزبا تَتکَ کنێت؟ 8اَنچێن کار بکنێت که چه آیان زاهر ببیت که شما تئوبه کرتگ. 9چه وتی دلا اے هئیالا در بکنێت که اِبراهێم مئے پِت اِنت. من شمارا گوَشان که هُدا چه اے سِنگان هم په اِبراهێما چُکّ و ائولاد پێدا کرتَ کنت. 10نون تَپَر تئیار اِنت که درچکان چه بُنا بگُڈّیت#3‏:10 گُڈّگ، بزان سِندَگ، بُرّگ، دور کنگ. و هر درچکے که شَرّێن بَرَ نئیاریت، گُڈّگ و آسا دئور دئیگَ بیت.

11من په شمئے گناهانی پشۆمانیا، شمارا گۆن آپا پاکشۆدیَ دئیان، بله هما که چه من و رَندَ کئیت، چه من زۆرمندتر اِنت و من آییئے کئوشانی چِست کنگئے لاهک هم نه‌آن. آ شمارا گۆن پاکێن روه و آسا پاکشۆدیَ دنت. 12آییا هَنشۆنے#3‏:12 هَنشۆن دارے که په دان و پُگانی جتا کنگا کارمرزَ بیت. دستا اِنت و جۆهانا#3‏:12 جۆهان، بزان کِشارانی مُشگ و دانانی مُچّ کنگئے جاگه. سَپا کنت. دانان اَمبارا اێرَ کنت و پُگ و پَلاران#3‏:12 پُگ و پَلار، بزان دانئے پۆست و هُشک بوتگێن کاه و سبزگ. اَنچێن آسێا سۆچیت که هچبرَ نمریت.“

ایسّائے پاکشۆدی

(مَرکاس 1‏:9‏–11؛ لوکا 3‏:21‏–22؛ یوهَنّا 1‏:31‏–34)

13گڑا ایسّا چه جَلیلئے دَمگا در آتک و اُردُنئے کئورا شت که یَهیا آییا پاکشۆدی بدنت، 14بله یَهیایا جُهد کرت که آییا په اے کارا مئیلیت. گوَشتی: ”باید اِنت من چه تئو پاکشۆدی بِگران، بله تئو په پاکشۆدی گرگا منی گوَرا کائے؟“ 15ایسّایا گوَشت: ”انّون بِلّ که اَنچُش ببیت، اے پئیما هُدائے واهگ و رَزایا سَرجمَ کنێن.“ گڑا آییا مَنِّت و ایسّایی پاکشۆدی دات. 16وهدے ایسّایا پاکشۆدی گپت و چه آپا در آتک، اَناگت#3‏:16 اَناگت، بزان یَبّرا، اَچانَک، ناگهان. آسمانئے دپ پَچ بوت و هُدائے پاکێن روهی دیست که کپۆتێئے شِکل و دْرۆشما#3‏:16 دْرۆشم، بزان شکل، سورت. اێر آتک و منی سرا نِشت. 17چه آسمانا تئوارے آتک: ”اے منی دۆستیگێن بَچّ اِنت و من چه اِشیا سکّ وشّ و رَزا آن.“

Sélection en cours:

مَتّا 3: HPKB

Surbrillance

Copier

Comparer