مَتّا 2

ایسّائے چارگا اِستارزانتانی آیگ

1بادشاه هیرودیسئے اَهد و زَمانگا، وهدے ایسّا یَهودیَهئے دَمگئے شهر بئیت‌لَهِما پێدا بوتگ‌اَت، گڑا چه رۆدراتکا#2‏:1 رۆدراتک، بزان هما نێمگ که رۆچ درَ کئیت، مَشرِک. لهتێن اِستارزانت اورشَلیمئے شهرا آتک. 2جُستِش گپت: ”هما نُنُّک که په یَهودیانی بادشاهیا پێدا بوتگ، کجا اِنت؟ ما آییئے اِستار در آیگا دیستگ و په آییئے سُجده کنگا آتکگێن.“ 3چه اے هبرئے اِشکُنگا هیرودیس بادشاه سَکّ پرێشان بوت و اورشَلیمئے سجّهێن مردم هم پرێشان بوتنت. 4هیرودیسا کئومئے سجّهێن دینی پێشوا و شَریَتئے زانۆگر#2‏:4 شَریَتئے زانۆگر، بزان دینی آلِم و موسّائے شَریَتئے زانتکار. لۆٹاێنت و جُست گپتنت که مَسیهئے پێدائِش کجا بیت؟ 5آیان پَسّئو#2‏:5 پَسّئو، بزان جواب. دات: ”یَهودیَهئے شهر بئیت‌لَهِما، چێا که نبیئے کتابا نبشته اِنت:

6 ’او یَهودائے شهر بئیت‌لَهِم!

تئو یَهودائے هاکمانی نیاما # 2‏:6 نیاما، بزان میانا، درنیاما، تها، تۆکا. کَسترێن نه‌ائے،

چێا که چه تئو هاکمے پێدا بیت و

آ منی کئوم بنی اِسراییلئے شپانکیا کنت.‘“ # 2‏:6 میکا نبیئے کتاب 5‏:2؛ سَموێل کازیئے دومی کتاب 5‏:2.

7گڑا هیرودیسا اِستارزانت چێرُکائی لۆٹاێنتنت و آ اِستارئے در آیگئے پَکّاێن وهدی جُست کرت. 8رندا آییا اِستارزانت بئیت‌لَهِما راه داتنت و گوَشتی: ”برئوێت و اے چُکّئے بارئوا شَرّ جُست و پُرس بکنێت. وهدے شما در گێتک، منا سهیگ بکنێت که من هم برئوان و آییا سُجده بکنان.“ 9بادشاهئے هبرانی اِشکنگا رند، اِستارزانت راه گپتنت. هما اِستار که آیان در آیگا دیستگ‌اَت، آیانی دێما پێش کپان اَت و هما جاگهئے سَربُرا اۆشتات که نُنُّک اۆدا اَت. 10گۆن اِستارئے گِندگا، آ گَلا بال بوتنت. 11هما لۆگا شتنت و چُکّ و آییئے مات مَریَمِش دیستنت. کۆنڈان کپتنت و چُکِّش سُجده کرت، کیمتی چیزّانی ڈَبّه‌اِش پَچ کرتنت و سُهر و کُندِرک#2‏:11 کُندِرک وَشبۆے که چه درچکێئے شیرگا جۆڑَ بیت. و مُرِّش#2‏:11 مُرّ زَهرتامێن دَرمانے. په نُنُّکا سئوگات کرت. 12رندا، هُدایا وابا آ هُژّار کرتنت که هیرودیسئے کِرّا پِر مترّنت. گڑا چه دگه راهے وتی مُلکا شتنت.

دێم په مِسرا

13اِستارزانتانی پِر ترّگا رند، هُداوندئے پرێشتگے ایسُّپئے وابا آتک و گوَشتی: ”پاد آ، چُکّ و چُکّئے ماتا بزور و مِسرا بتچ. تان من ترا نگوَشان همۆدا بدار، چێا که هیرودیسا اراده کرتگ که چُکّا در بگێجیت و بکُشیت.“ 14گڑا ایسُّپ پاد آتک، چُکّ و چُکّئے ماتی زرتنت و هما شپا دێم په مِسرا شت. 15تان هیرودیسئے مَرکا همۆدا منتنت و اے ڈئولا هما هبر راست و سرجم بوت که هُداوندا چه نبیئے زُبانا گوَشتگ‌اَت: من وتی بَچّ چه مِسرا لۆٹاێنت و آورت.#2‏:15 هوشا نبیئے کتاب 11‏:1.

هیرودیس چُکّانَ کۆشارێنیت

16وهدے هیرودیس سرپد بوت که اِستارزانتان منا رَد داتگ، سکّ زهر گپت. پرمانی دات: ”بئیت‌لَهِم و کِرّ و گوَرئے سرجمێن دَمگئے سجّهێن دو سالیگ و کَسترێن مردێن‌چُکّ کُشگ ببنت.“ چُکّانی اے اُمرئے هساب آییا اِستارزانتانی گپّانی بُنیادا جت. 17اے ڈئولا اِرِمیا نبیئے کرتگێن اے هبر راست و سَرجم بوت:

18 چه رامَهئے شهرا کوکّارے گۆشان کپت،

مۆتک # 2‏:18 مۆتک، بزان په مُردگا پِریات و زاری، گرێوگ و زار جَنَگ. و زاریے مزنێن،

راهیلا په وتی چُکّان گِرێت،

نلۆٹتی که کسے آییا تسلّا بِدنت،

چێا که چُکّ نمنتگ‌اَتنت. # 2‏:18 اِرِمیا نبیئے کتاب 31‏:15.

دێم په ناسِرَها

19هیرودیسئے مَرکا رَند، مِسرا هُداوندئے پرێشتگے ایسُّپئے وابا آتک. 20پرێشتگا گوَشت: ”پاد آ، چُکّ و چُکّئے ماتا بزور و وتی مُلک اِسراییلا پِر بترّ، چێا که هما مردم که چُکّئے کُشگئے رَندا اَتنت، مُرتگ‌اَنت.“ 21گُڑا ایسُّپ پاد آتک و چُکّ و چُکّئے ماتی زرتنت و پدا اِسراییلئے مُلکا آتک. 22بله وهدے سهیگ بوت که هیرودیسئے جاها آییئے چُکّ اَرکِلاووس یَهودیَهئے بادشاه اِنت، گڑا اۆدئے رئوگی تُرست. وهدے وابێئے تَها ایسُّپ هبردار کنگ بوت، پدا جَلیلئے دَمگا شُت. 23اۆدا، ناسِرَه نامێن شهرێا جَهمنند#2‏:23 جَهمنند، بزان جاگهێئے نِشتگێن مردم، ساکن، آباد. بوت و اے ڈئولا نبیانی هبر راست و سرجم بوت که آ چُکّ ناسِری گوَشگَ بیت.

Sélection en cours:

مَتّا 2: HPKB

Surbrillance

Copier

Comparer