Esita 2
2
Esita Waba Mwami Mukaintu
1Nishakamana sheshi, lelyo bukali bwa mwami Ahasuyelusi nibwakamana, wakachizhibaluka checho nchaakachita Vashiti u mulawo wezo ngwaakabika kumulwisha. 2Ngoona bana bakubushi balombwana bakaakusebezela mwami bakaamba ati, “Mwami naakapulilwe banakalindu babotu chiwa. 3Leka mwami asale beendelezhi mu shooko shoonse shili mu bulelo bwakwe, babunganye boonse banatulindu babotu shiwa kuŋanda ya bakaintu, yezho ili mu chizubilo chizumu cha Susa, babo bakaakwendelezhewa u Hegayi, muzhibe wa mwami, wezo usunga bakaintu. Leka bakanke kupewa mafhuta akunana. 4Nakalindu wezo ukaamubotela mwami, akabe mwami mukaintu mu busena bwaka Vashiti.” Chechi chakamubotela mwami, ubobo wakachita mbubona. 5Iinzho kakuli Mujuda mu chizubilo chizumu cha Susa, izhina lyakwe katewa ati Modekayi, mwanakwe Jaili, mwanakwe Shimeyi, mwanakwe Kishi Mubenjamini, 6#2 Bami 24:10-16; 2 Maka 36:10wezo wakatolwa buzhike kuhwa ku Jelusalemu, antoomwi u Jekoniya mwami wa Juda, wezo Nebukadineza mwami wa Babiloni ngwaakatola. 7Nguwakaakulela Hadasa, wezo wakutewa ati Esita, mwanakwe shimuzhaakwe, nkaambo kaina ushi na baina. Nakalindu kakwete chimo chibotu ulimwi kali mubotu chiwa. Lelyo ushi u baina nibakafhwa, Modekayi wakamukomenya ukoya mwanakwe wakuzhala. 8Ubobo lelyo malailile u mulawo wa mwami nishakaambilizhiwa, bana bashimbi banji-banji bakabunganyiwa antoomwi mu chizubilo chizumu cha Susa, mwitashi lyaka Hegayi. Aze Esita wakatolwa muŋanda ya bwami u kubikwa mwitashi lyaka Hegayi, wezo wakaakweendelezha bakaintu. 9Nakalindu wezu wakamubotela, ubobo wakayana luse luteeli kwa Hegayi. Ngoona wakamupa mafhuta a kunana chakufhwambaana u chipanzha cha shakulya shakwe. Wakasala banatulindu bali chiloba (7) kuhwa kuŋanda ya bwami u kubabika mu busena bubotusha muŋanda ya bakaintu. 10Esita wiina naakakanana sha bantu bakwe na lunungu lwakwe, nkaambo Modekayi wakamulailila kwaamba atakaamba. 11Mazuba oonse Modekayi keendeenda kumbele lya lubanza lwaŋanda ya bakaintu, kwaamba azhibe Esita mbwaabele u chakaakuchitika kwakwe.
12Chiindi chakubamba kwaamba babote u kwiiya milawo ya bakaintu kachili myezhi ikumi u myezhi yobile (12). Myezhi chisambomwi (6) keeli yakunana mafhuta a Mila, ayo imwi myezhi chisambomwi (6) keeli yakunana tununkilizho u mafhuta a bakaintu. Iinzho lelyo chiindi nichakashika kwaamba umwi wuumwi nakalindu aye ku mwami Ahasuyelusi, 13Esita wakenjila mukati ku mwami, wakapewa kufhumbwa nchakaakuzanda kutolelela kuhwa kuŋanda ya bakaintu, kuya kuŋanda ya bwami. 14Mangolezha kenjila mukati, chifhumo-fhumo kapiluka kuŋanda ya bakaintu yabili, kweendelezhewa u Shaashigazi, muzhibe wa mwami, wakakweendelezha ba mwanakasuwa. Katanjili ku mwami alimwi, chita kuti mwami wamubotela, ubobo wakaakoompololwa yiizhina.
15Lelyo nichakashika chiindi chaka Esita mwanakwe Abihaili, shimuzhaakwe Modekayi, wezo wakamukomenya ukoya mwanakwe wakulizhalila, kwaamba anjile mukati ku mwami, wiina nchaakazanda chita bulyo shesho nshaakamubula Hegayi muzhibe, wezo wakaakweendelezha bakaintu. Iinzho Esita wakayana choolwe mu menso a babo boonse bakamubona. 16Lelyo Esita naakatolwa ku mwami Ahasuyelusi, mukati muŋanda ya bwami yakwe, mu mwezhi wekumi (10), nguwena ngu mwezhi wa Tebeti, mu mwaka wa chiloba (7) wakulela kwakwe, 17mwami wakamufhuna Esita kubaala bakaintu boonse, ulimwi wakayana luse luteeli u choolwe mu menso akwe kubaala banatulindu boonse, chakuti mwami wakamusamika mushini wa bwami amutwi wakwe u kumubika kuba mwami mukaintu mu busena bwaka Vashiti. 18Ngoona mwami wakachita ipobwe ikando lya beendelezhi bakwe u batwangaakwe boonse; leli kalili ipobwe lyaka Esita. Bobo buzuba, wakaambilizha kulyookezha mu chishi choonse, ulimwi wakapa shipo kwiingaina u luse lwakwe mwami.
Modekayi Wafhutula Bumi Bwa Mwami
19Iinzho lelyo banakalindu nibakaakubungene antoomwi chiindi chabili, Modekayi kashite kumanjililo a mwami. 20Esita wiina naakakanana sha lunungu na sha bantu bakwe, mbubona Modekayi mbwaakamulailila, nkaambo Esita kamuteelela Modekayi ukoya lelyo naakaakumukomenya. 21Mu mazuba azo, Modekayi kakala kumanjililo a mwami. Bigitana u Teleshi, bazhibe bobile ba mwami, babo bakaakulindilila kumulyango bakalemana u kukanza kuyaya mwami Ahasuyelusi. 22Chechi wakachiteelelela Modekayi, ubobo wakashimwina mwami mukaintu Esita, aze Esita wakashimwina mwami mwizhina lyaka Modekayi. 23Lelyo nibakaakwaatifhwa-tifhwa makani aza, kwakayanwa kwaamba meni-meni. Ubobo balombwana baba bobile (2) bakatungwa chisamu ku matako kushikila shapola amutwi u kulengelela a shisamu. Ulimwi chakalembwa Mwibuka lya Makani kubushu bwa mwami.
Bible Society of Zambia