Nùb róòm 1
1
Nyìndí
1Mɨ Pôl, mɨ nò du nɨ̀kɨ̧́ɨ̧ Yésù Krístùù, mɨ nò Mèín ya ca dù nò tómé, ŋgə́ ɨ́ ɗòb mɨ ə́r ɓéhèé Kìn Nyɔ̧ɔ̧́ noò, mɨ ɨ́ tɨin káàtà rè ru.
2Kùb yi tɨintɨ́ àm Kìn kíì káàtà Mèèín no. Á ɓàcɨ̀ kúríí, Mèín ya ɓwáíwonaá nɨ̀vɨ́tɨ̀b Kìn Nyɔ̧ɔ̧́ kɨ́ tɨ́kɨ̀nɨ́b noò ɓɔ̧ɔ̧. 3Kìn Nyɔ̧ɔ̧́ kɨ́ nyin ɓe ɨ́r mwin nóò Yésù Krístù nò du Kéké nɨ́mè á. Kɨ́ ŋgə́ du nɨ̀vɨ́tèé, ŋgə́ nyȩ Dàvíìt á, 4ɨ́dù péín Nyéhè Sarɨ́nne, Mèín yi túumɓatɨ́ ɓe nyòm noò ɨnayâna ŋgə́ mwin níì á, ɓe sə̀ə̀mnèé ŋgə́ ya səəmcuhó̧ ŋgə́ mvókín nɨ̀kwíbí rè. 5Ɓe ɨ́r ŋgéé á Mèín ɗob mɨ ə́r nò tómé ru, àm dɨmɨ Krístùù, ɗà mɨ a ndɨ̀ŋ nùb tɨb lâs noò a ə́mnè ŋgə́, ŋgáb a jə̀ŋɓwê ŋgə́. 6Nyí ɓwê, nyí nùb Mèín ya ɓé gò óknɨ ɓe Yésù Krístùù, nyí á kpáín kɨ́ no.
7Nyí nùb du dùnɨ Róòm, nyí nùb Mèín du ɗúniì lâs, nyí nùb ŋgə́ ya ɓé gò ɓe ní ókniì, mɨ tɨnna nyí á. Mɨ yóóŋ Mèín nò du Tá nɨ́mè, ɓe Yésù Krístù nò du Kéké nɨ́mè, ŋgáb nà nyí faám ɓe ju ɗóóŋ.
Pôl á ɗúnɨ gìnɨ Rôm, ɓànnɨ ɓe nùb ə́mní kwe
8Tíí yàyè, ɓe ɨ́r Yésù Krístùù, mɨ sáktií Mèín móò ɓe ɨ́r nyí lâs, ɓetí ɗɔ̀ɔ́b lè bɨ̂ŋ kùb á nyìnnɨ ɓe ɨ́r ə́ə́m nyí du ɓe kí rè. 9Mèín ɗəəŋtɨ́ mɨ ta àmɨɨr á, ŋgə́ nò mɨ du ə́nnànɨ ɓe njɔ̧̀ moò lâs ə́r ɓéhèé Kìn Nyɔ̧ɔ̧́ du ɓe ɨ́r mwin nóò rè. Ŋgə́ ɗəəŋtɨ́ mɨ á nyí lə́ə̀mnɨ ɓwâ lâs. 10Ɓwâ lâs mɨ du Mèín yóŋniì, mɨ á ɓwèìnɨ Mèín ɓè ɗûnɨ́m nóò tɨ ndɨŋháye mɨ kwà mvókín mɨ gɨso yɨ́ nyínè naa! 11Ɓetí mɨ á ɗúɓànɨ nɨ́me nyí ɓàntɨ, àm mɨ gena nyí nyər Nyéhè Sarîn du nàniì, ɗà nyí a dù tamnì. 12Mɨ á ɗúɓàcéyènɨ ɓè nɨ́me náb tɨ du yɨ́ mwi̧í̧, àm njɔ̧̀ a tàm nɨ́m lâs. Ə́ə́m móò taamnaá nyí njɔ̧̀, kɨ́ nyínè a tààmnàcê mɨ njɔ̧̀.
13Mwin yàá bɨ, mɨ ɗúú nyí ɗə̀ŋhɨ̀ ɨnayâna mɨ yaá ɓwáílɨ́ŋhánɨ gɨ̀sònɨ yɨ́ nyínè, àm ə́r mó rè a nàɓwêhácè gum yɨ́ nyínè hȩ yi na yɨ́ gbàŋ bɨ kwè, ɨ́dù há̧á̧ ɗàrò, nɨ́m kù ɨ́ du mɨ hàrɨ̀háyènɨ ru. 14Ɓetí á ɗúnɨ mɨ gómɨ̀ nùb lâs íí ya, dùgɨ̀ nùb ŋgób ŋgáréè, dùgɨ̀ nùb ŋgób ŋgáré ɗàwáá. Dùgɨ̀ nùb ɗəŋhɨ káàtàà, dùgɨ̀ nùb káàtà ɗə̀ə̀ŋwáá. 15Àm kɨ́ á mɨ du ɗúnɨ nyí nùb du dùnɨ Róòm, mɨ gènàɓwê nyí Kìn Nyɔ̧ɔ̧́ ru.
Kìn Nyɔ̧ɔ̧́ á ɓe nyòme
16Sə̀ré nɨ mɨ bìnɨ ɓe ɓéhèé kìn nyɔ̧né ɗàà. Ɓetí kìn kɨ́ ɨ́ du nyòm Mèín du ɓátɨ̀nɨ nɨ̀vɨ́tè lâs du ɓe ə́mní ɓe kíí ru. Wu dùgɨ̀ Jwîf, wu dùgɨ̀ Jwîf sé. 17Ɓetí Kìn Nyɔ̧ɔ̧́ á túùmnɨ ɨna á Mèín du ndɨ̀ŋnɨ nɨ̀vɨ́tɨ̀b sèì no tíí nùb ɗɨ́ɗɨ̧́, jɔ̀sé ɓe ə́ə́m ɗóò, yànɨ yàllì há̧á̧ cáŋhɨ̀rí, hȩ du tɨín káàtà Mèèín no ɨnè rè: «Nò du Mèèín íhín ɗɨ́ɗɨ̧́ ɓe àm ə́mní kwá ɓáí.»
Mèèín íhín, nò ɗɨ́ɗɨ̧́ nɨ ɗàà
18Kí du Mèín á túùmsówònɨ njùŋ noò ɓɨllin ɓe ɨ́r nɨ́ɨ́b du hàrɨ̀nɨ kìn àmɨrì éí ə́r nóò rɨ, nɨ́ɨ́b kɨ́ du cuum lâs, dùgɨ̀ ɓáŋhîn ŋge lâs nɨ̀vɨ́tè ndɨŋ kùŋ mwin yàá rɨ á. 19Ɓetí nɨ́m Mèín fɨ́tɨ kùb túùmnàniì á nà ŋgáb laŋtɨ̧ɨ̧́, Mèín nɨ̀mɨ́r túumnaceé nɨ́ ŋgáb. 20Nyòm mɨ̀cɨ̧̀ Mèín du ɓe kíí, ɓe ju ŋgə́ dumeɓa Mèèín, du bɨ nɨ́ɨ́b kùb du bɨ́ pénɨ ɗàwáá á. Ɨ́dù hȩ Mèín ya nyàŋhɨ̀ ɗɔ̀bí, ɓwâ nɨ̀vɨ́tɨ̀b du pénɨ ə́rɨ́b ŋgə́ ya ə́llé lâs, ŋgáb a ɗə̀ə̀ŋɓàgì ɨnayâna nɨ́ɨ́b kɨ́ á mè ku. Àm kɨ́ á du sàmàìn Mèín tɨ́í nɨ̀vɨ́tɨ̀bì ɗàà ru. 21Ŋgáb ɗəəŋɓatɨ́ Mèín, ɨ́dù ŋgáb bɨ ŋgə́ dɨ̀ɨ̀mnɨ ɗàà, ŋgáb cè bɨ́ ŋgə́ ɗómnɨ kùsùk hȩ du ɗúnɨ kùb ndɨ̀ŋnà Mèèín ɗàà. Ŋgáb du bɨ ŋgwé ŋgáré ɗàà á, kɨ̀cáàb ŋgábè nɨ hàrák ɗàà, á nɨ yú̧u̧ ɓe nɨ́ɨ́b ɓɨ́b. 22Ŋgáb á tànɨ vúm ɗəəŋɓɔ̧́ré á, ɗà àm ndè ŋgáb du bɨ yɨŋmɨ́b á. 23Ŋgáb mbɨ́ɨ́ bɨ́ ɗómnɨ Mèín mgbíhɨ́rí du nɨ́ kú̧u̧ kúnɨ ɗàwáá, ŋgáb ɨ́ ɗôm bɨ́ nɨ́ɨ́b saai, kí ta: ɓɨ̀m nɨ̀vɨ́tèé du nɨ́m kú kú̧ne, gààì, nyèém gurub nààsɨ̀bì ɓe nyó̧nɨ́b na á.
24Ɓe àm kɨ́ á Mèín yi mbɨ́k ŋgáb ndɨ̀ŋnɨ nɨ́ɨ́b ɓáŋhɨ́b ŋgáb yi ɗúré ru, ɓe ndɨ̧̀ɨ̧́ u̧nè kɨ́ á ŋgáb du éícùɓànɨ ə́r sə̀réé mvókín ŋgábè no ru. 25Ŋgáb ɓandɨkíí bɨ́ àmɨɨr Mèèín dùcù kààŋ; ŋgáb á bɨ́ ɗómnɨ ŋgáb a jəŋce nɨ́ɨ́b Mèín yi nyaaŋndé, ŋgáb a mbɨ̂ bɨ́ ŋgə́ nɨ̀mɨ́r nò du nɨ̀nyàŋhȩ̀, du ɗúnɨ kùb ŋgə̀mlɨ́ŋ tɨ́ɨ́. Àmèn.
26Ɓe àm kɨ́ á Mèín mbɨ́k ŋgáb ndɨ̀ŋnɨ nɨ́ɨ́b sə̀réé ru. Gub ŋgábè bɨ ndɨ̀ŋnɨ nɨ́m hàrák hȩ du ɗúniì ɗàà, ɓetí ŋgáb mbɨ́ɨ́ bɨ́ gúnèé ɓe nɨ̀ŋgwábì, ŋgáb a gwíncù bɨ́ ɓe kùb nɨ̀gub. 27Nɨ́m mwi̧ ɓwê ɓe nɨ̀ŋgwáàb, ŋgáb mbɨ́ɨ́ bɨ́ gúnèé ɓe nɨ̀gubì, ɨ́dù njɔ̧̀ á ŋgáb ɓə́nnɨ àm gwíncu ɓe kùb nɨ̀ŋgwábì. Ɓe ndɨ̀ŋtèé nɨ́ɨ́b sə̀réé u̧ kɨ́ á ŋgáb nɨ̀miib du gèwúnɨ jábɨ́r ɗóhe ɓe lɨ́lɔ̧́ ŋgábè kíì só ru.
28Hȩ ŋgáb mvú bɨ́ ɗə̀ə̀ŋnɨ Mèèín, Mèín mbɨ́knaá ŋgáb kɨ̀cáàb ŋgábè ŋgəmnîn kɨ́, ŋgáb ndɨ̀ŋ bɨ nɨ́m tɨ du ɗúwa ŋgáb ndɨ̀ŋte. 29Ŋgáb á ndɨ̀ŋtèènɨ nɨ́ɨ́b du ɗɨ́ɗɨ̧́ ɗàwáá. Ŋgáb á ɓe ndɨ̀ŋɓáàŋ, sunɨ̀b, ɓáŋnjɔ̧̀, ŋgáb á ɓà ɓe ɓi̧í̧, ɓe kwíhèé nɨ̀rì, ŋgáb á ɗúɓànɨ mɨ̀ndárɨ̀b, ŋgáb á ɓe mbááŋ, ŋgáb ndɨŋteesoɓa há bɨ́ nɨ́m ɗàá ku u̧. Ŋgáb á ɓe tàtùùb. 30Ŋgáb á ɗúɓànɨ nyìnɓáàŋnɨ ɓe ɨ́r kùùŋ. Ŋgáb á ɓə̀ndɨ̀nɨ Mèín, ŋgáb jɨ̧ só ɗàà, ŋgáb á ɓe wútèé síhé, ɓe â síhé cúk. Ŋgáb á kə̀bndóŋnɨ ndɨ̧̀ɨ̧́ ɓáŋhɨ́nne tíí tíí, ŋgáb cè jə̀ŋnɨ tá bi ɓe yà bí ɗàà. 31Ŋgáb ɓe njɔ̧̀ ca nɨ́mí ɗàà, ŋgáb cè jə̀ŋnɨ ɓwáár ŋgábè ɓɔ̧ne ɗàà. Ŋgáb á ɓe njɔ̧̀ tamnì, ŋgáb cè mwàm íhín ɗàà. 32Ŋgáb ɗəəŋɓatɨ́ ŋgwìn Mèèín mîn. Nùb du ɓe kúúŋ ɗíím kíì á ɗóhîn ɓe cwé. Ŋgáb á ndɨ̀ŋtèèɓànɨ kúúŋ nɨ́ɨ́b kwè u̧, nùb duce ndɨ̀ŋɓwênɨ u̧nèé, ŋgáb á yà nùb kɨ́ ə́ə̀mnànɨ.
© 2007 Alliance Biblique du Cameroun, B.P. 1133, Cameroon