Roma 6
6
‘Ua Fai ma ‘Au‘auna a le Amiotonu lē ‘ua Ta‘uamiotonuina i le Fa‘atuatua
1O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? 2‘Aua ne‘i fa‘apea. O i tatou ‘ua oti i la le agasala, pe fa‘apefea ‘ona tatou ola pea i ai? 3Tou te le‘i iloa ‘ea, o i tatou nei uma na papatisoina ‘iā Keriso Iesu, na papatisoina i tatou i lona maliu? 4O lenei, ‘ua tatanu fa‘atasi i tatou ma ia i le papatisoga i lona maliu; ‘ina ‘ia tatou sāvavali i le ola toefuata‘iina pei ‘ona toe fa‘atūina mai o Keriso nai ē ‘ua oti, i le mamalu o le Tamā.#1 Pete 3.21; Kolo 2.12
5Auā ‘āfai ‘ua fa‘atasia i tatou i le fa‘atusa i lona maliu, e fa‘apea fo‘i i tatou i lona toetū mai.#Fili 3.10, 11 6‘Ua tatou iloa lenei mea, ‘ua fa‘asatauroina fa‘atasi ma ia lo tatou tagata tuai, ‘ina ‘ia fa‘aumatia ai le tino o le agasala, ‘ina ‘ia lē toe fa‘apologaina i tatou i le agasala.#Kala 5.24 7Auā o lē ‘ua oti ‘ua tu‘usaunoa ia nai le agasala.#1 Pete 4.1 8‘Āfai fo‘i ‘ua oti fa‘atasi i tatou ma Keriso, ‘ua tatou tāofi, tatou te ola fo‘i fa‘atasi ma ia. 9‘Ua tatou iloa ‘ua toetū mai Keriso nai ē ‘ua oti, e lē toe maliu lava o ia, e lē toe pule le oti ‘iā te ia. 10Auā o lona maliu ‘ua tasi lona maliu i la le agasala; a o lona soifua, e soifua lava ia i la le Atua.#Epe 9.26-28; Kala 2.19; 1 Pete 2.24 11‘Ia fa‘apea fo‘i la ‘outou tāofi ‘ua ‘outou oti i la le agasala, a ‘ua ‘outou ola lava i la le Atua i lo tatou Ali‘i o Keriso Iesu.
12O lenei, ‘aua ne‘i mālō le agasala i o ‘outou tino ‘auga vale, i lo ‘outou gaua‘i i ai i ona tu‘inanau; 13‘aua fo‘i ne‘i tu‘uina atu o ‘outou tino i le agasala e fai ma ‘au‘upega a le amio leaga; a ‘ia ‘outou tu‘uina atu ‘outou i le Atua, e pei o ē ‘ua ola nai ē ‘ua oti, ma ia tu‘uina atu ‘outou tino i le Atua e fai ma ‘au‘upega a le amiotonu.#Roma 12.1; Efe 2.5; 5.14 14Auā e lē pule le agasala ‘iā te ‘outou; auā ‘ua ‘outou lē nonofo i le tulafono, a o le alofa tunoa.#1 Ioane 3.6
‘Ia fai ma ‘Au‘auna a le Amiotonu
15O lenei, pe fa‘apefea? Tatou te agasala ‘ea, ‘ina ‘ua tatou lē nonofo i le tulafono, a o le alofa tunoa? ‘Aua ne‘i fa‘apea.#Roma 5.17, 21 16Tou te le‘i iloa ‘ea, o lē tou te tu‘uina atu i ai ‘outou e fai ma ‘au‘auna e ‘ana‘ana i ai, o ana ‘au‘auna ‘outou tou te ‘ana‘ana i ai, po o le agasala e o‘o ai le oti, po o le ‘ana‘ana e o‘o ai le amiotonu?#Ioane 8.34; 2 Pete 2.19 17A ‘ia fa‘afetai i le Atua, e ui lava ‘ina fai ‘outou ma ‘au‘auna a le agasala, a ‘ua ‘outou gaua‘i nei ma le loto i le fa‘aa‘oa‘o o le matā‘upu na tu‘uina atu ‘iā te ‘outou. 18‘Ua tu‘usaunoa fo‘i ‘outou nai le agasala, a ‘ua fai ma ‘au‘auna a le amiotonu.#Ioane 8.32 19O ‘upu a tagata ‘ou te fai atu ai nei, ‘ona o le vaivai o ‘outou tino; auā fa‘apei ‘ona ‘outou tu‘uina atu o ‘outou tino e fai ma ‘au‘auna a le amio leaga ma le ulavale, e ulavale ai; ia fa‘apea fo‘i ‘ona tu‘uina atu nei o ‘outou tino e fai ma ‘au‘auna a le amiotonu, e i‘u i le fa‘apa‘iaina.
20Auā sa aunoa ‘outou ma le amiotonu, ‘ina o ‘au‘auna ‘outou i le agasala. 21Ni a fo‘i ni fua na ‘iā te ‘outou anamua i na mea ‘ua ‘outou mamā ai i nei ona po? Auā o le i‘uga o ia mea o le oti lea.#Eseki 16.61, 63; Roma 8.6, 13 22A o lenei, ‘ua tu‘usaunoa ‘outou nai le agasala ma ‘ua fai ma ‘au‘auna a le Atua, ‘ua ‘iā te ‘outou ni a ‘outou fua e o‘o ai i le fa‘apa‘iaina o lona i‘uga fo‘i o le ola e fa‘avavau. 23Auā o le oti, o le totogi lea o le agasala; a o le ola e fa‘avavau, o le mea foa‘ifuaina mai lea e le Atua, i lo tatou Ali‘i o Keriso Iesu.#Roma 5.12
اکنون انتخاب شده:
Roma 6: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.