Mataio 19
19
O le Aleia o le Avā
(Mare 10.1-12)
1‘Ua fa‘ai‘u e Iesu o ia ‘upu, ‘ona tu‘ua lea e ia o Kalilaia, ‘ua o‘o atu i le lau‘ele‘ele o Iutaia i tala atu o Ioritana. 2‘Ua mulimuli mai fo‘i ‘iā te ia le motu o tagata e to‘atele. ‘Ona fa‘amālōlō lea e ia ‘iā te i latou i lea mea.
3‘Ona ō mai ai lea ‘iā te ia o faresaio, ‘ua tofotofo mai ‘iā te ia, ‘ua fa‘apea, mai ‘iā te ia, “Pe sā ‘ea i se tasi ‘ona fa‘ate‘a o lana avā ‘ona o mea uma?”#Mata 5.31-32
4‘Ona tali atu ai lea o ia ‘iā te i latou, “Tou te le‘i faitaulia ‘ea. O lē na faia le tagata i le amataga, na ia faia i lā‘ua ‘o le tane ma le fafine,’#Kene 1.27; 5.2 5na ia fetalai ane fo‘i, ‘O le mea lea e tu‘ua ai e le tane o lona tamā ma lona tinā, ‘ae fa‘atasi ma lana avā; ‘ona ‘avea lea o i lā‘ua o le tino e tasi?’#19.5 tino e tasi: po o le gagana Eleni ‘a‘ano e tasi. #Kene 2.24; Efe 5.31 6O lea e lē toe to‘alua ai, a o le tino e tasi i lā‘ua; o lenei, o ē ‘ua fa‘atasia e le Atua, ‘aua ne‘i fa‘ate‘a‘eseina e se tagata.”
7‘Ona latou fai mai ai lea ‘iā te ia, “Se a fo‘i le mea na poloa‘i mai ai Mose e avatu le tusi alei e fa‘ate‘a ai ‘iā te ia?”#Teu 24.1-4; Mata 5.31
8‘Ona fetalai atu ai lea o Iesu ‘iā te i latou, “‘Ona o ‘outou loto ‘inā ma‘a‘a na tu‘u mai ai e Mose ‘iā te ‘outou e fa‘ate‘a ‘iā ‘outou avā; ‘ae le‘i fa‘apea talu mai i le amataga. 9‘Ou te fai atu fo‘i ‘iā te ‘outou, ‘Ai sē fa‘ate‘a i lana avā, a o le‘i mulilua o ia ma fai avā i se tasi, ‘ua mulilua o ia; o sē fai avā i lē na fa‘ate‘aina, ‘ua mulilua fo‘i lea.”#Mata 5.32; 1 Kori 7.10-11
10‘Ona fai mai ai lea o ona so‘o ‘iā te ia, “‘Āfai e fa‘apea le tu a le tane ma le fafine, e ao ‘ina le fai avā.”
11A ‘ua fetalai atu o ia ‘iā te i latou, “E lē mafai ‘ona talia lenā ‘upu e tagata uma, ‘ua nā o ē ‘ua foa‘iina atu i ai;#1 Kori 7.7, 17 12auā o i ai eunuka o ē fa‘apea ‘inā fānau mai; o i ai fo‘i eunuka o ē ‘ua fa‘aeunukaina e tagata; o i ai fo‘i eunuka o ē ‘ua fa‘aeunukaina i latou e i latou, ‘ona o le mālō o le lagi. ‘Ai sē na te mafaia ‘ona talia, ‘inā talia lea e ia.”
‘Ua Fa‘amanuia Iesu i Tamaiti
(Mare 10.13-16; Luka 18.15-17)
13‘Ona ‘aumai ai lea ‘iā Iesu o tamaiti, ‘ina ‘ia fa‘ae‘e ona ‘a‘ao ‘iā te i latou ma tatalo; ‘ona vavao atu ai lea o ona so‘o ‘iā te i latou. 14A ‘ua fetalai atu Iesu, “‘Inā tu‘u mai ia o tamaiti e ō mai ‘iā te a‘u, ‘aua le vaoia i latou; auā e fa‘apei o i latou nei o ē o i le mālō o le lagi.”#Mata 18.2-3
15‘Ua fa‘ae‘e ona ‘a‘ao ‘iā te i latou, ‘ona maliu ‘ese ai lea o ia i lea mea.
O le Taule‘ale‘a Mau‘oa
(Mare 10.17-31; Luka 18.18-30)
16Fa‘auta fo‘i, ‘ua sau le tasi tagata, ‘ua fa‘apea mai ‘iā Iesu, “Le a‘oa‘o lelei e, se ā se mea lelei ‘ou te faia ‘ou te maua ai le ola e fa‘avavau?”
17‘Ona fetalai atu ai lea o Iesu#19.17 Iesu: O le fa‘aliliuga tuai; ia. ‘iā te ia, “Se ā le mea ‘e te fesili mai ai ‘iā te a‘u i se mea e lelei? E to‘atasi lē o lo‘o lelei. ‘Āfai ‘e te fia o‘o i le ola, ‘ia e tausi i poloa‘iga.”#Luka 10.26-28 18‘Ua fai mai o ia ‘iā Iesu, “Po o a ia poloa‘iga?”
‘Ona fa‘apea atu ai lea o Iesu, “‘Aua ‘e te fasioti tagata, ‘aua ‘e te mulilua; ‘aua ‘e te gaoi, ‘aua ‘e te molimau pepelo.#Eso 20.12-16; Teu 5.17-20 19‘Ia e āva i lou tamā ma lou tinā; ma ‘ia e alofa atu i lē lua te tuā‘oi, ‘ia pei o oe lava ‘iā te oe.”#Eso 20.12; Teu 5.16; Levi 19.18
20‘Ona fai mai ai lea o le taule‘ale‘a ‘iā te ia, “‘Ua ‘ou tausia na mea uma talu ‘ina ‘ou itiiti, se ā se mea o toe ‘ou te le‘i faia?”
21‘Ua tali atu Iesu ‘iā te ia, “‘Āfai ‘e te mana‘o ‘ina ‘ia ‘ato‘atoa ‘ona lelei o lau amio, ‘ia e alu ma e fa‘atau atu au mea, i le e avatu ai i ē matitiva; ‘ona ‘iā te oe lea o le faulaiga‘oloa i le lagi, i le e sau ma mulimuli mai ‘iā te a‘u.”#Mata 6.20; Luka 12.33
22‘Ua fa‘alogo le taule‘ale‘a i lea ‘upu, ‘ona alu ‘ese ai lea o ia ma le tigā, auā e tele lava ana mea.#Sala 62.10
23‘Ona fetalai atu ai lea o Iesu i ona so‘o, “E moni, ‘ou te fai atu ‘iā te ‘outou, e faigatā ‘ona sao atu o le mau‘oa i le mālō o le lagi. 24‘Ou te fai atu fo‘i ‘iā te ‘outou, e faigofie ‘ona ui atu o se kamela i le pū o le au, ‘ae faigatā ‘ona sao atu le mau‘oa i le mālō o le Atua.”
25‘Ua fa‘alogo ai ona so‘o, ‘ona latou matuā taufaiofo ai lea, ‘ua fa‘apea ane, “‘Āfai o lea, o ai sē tasi e mafai ‘ona fa‘aolaina?”
26‘Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”#Kene 18.14; Iopu 42.2; Saka 8.6
27‘Ona tali mai ai lea o Peteru ‘ua fa‘apea mai ‘iā te ia, “Fa‘auta, ‘ua matou tu‘ua mea uma, ‘ae matou mulimuli atu ‘iā te oe, se a fo‘i se mea matou te maua?”
28‘Ona fetalai atu ai lea o Iesu ‘iā te i latou, “E moni ‘ou te fai atu ‘iā te ‘outou, o ‘outou ‘ua mulimuli mai ‘iā te a‘u, pe a ti‘eti‘e le Atali‘i o le tagata i lona nofoāli‘i mamalu i le toefuata‘iga, tou te ti‘eti‘e ai fo‘i i nofoāli‘i e sefulu ma le lua, e fa‘amasino ai i itū‘āiga o Isaraelu e sefulu ma le lua.#Luka 22.30; Tani 7.9-10 29‘Ai sē tasi ‘ua ia tu‘ua o fale, po o uso, po o tuafafine, po o le tamā, po o le tinā, po le avā, po o le fānau, po o fanua ‘ona o lo‘u igoa, e maua e ia e ta‘isautuaselau, e fai fo‘i mōna tofi le ola fa‘avavau.#Epe 10.34 30‘Ae to‘atele o ē ‘ua muamua e ‘avea ma mulimuli; o ē ‘ua mulimuli fo‘i e ‘avea ma muamua.#Mata 20.16; Luka 13.30
اکنون انتخاب شده:
Mataio 19: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.