Salmos 76
76
Diosqa venceq kasqanmanta
Asafpa takisqan
1Diosqa Judá nacionpim reqsisqa,
sutinpas Israel nacionpim reqsisqa.
2Templonpas Salem llaqtapim kachkan,
yachanan wasipas Sión llaqtapim kachkan.
3Chaypim escudokunata, espadakunata,
flechakunata hinaspa arcokunata pakiparurqa.
4Diosnilláy,
kancharichkaqmi qamqa kanki,
hatu-hatun orqomantapas aswan rikupasmi kanki.
5Allinnin qari-qari runakunam tukuy imankuta qechuchikurqaku,
kallpasapakunapas manam ima ruwaytapas atirqakuchu;
wañuy puñuywanmi hapirachikurqaku.
6Jacobpa yupaychasqan Diosnilláy,
qaqchaykuptikim carretawan caballopas
mana kuyuriqña rikurirqa.
7¡Manchakuna Diosmi qamqa kanki!
Qam piñakuptiki ¿pitaq ñawpaqnikipi sayayta atinman?
8Juzgaq kasqaykitam hanaq pachamanta reqsichikamunki,
kay pachapas manchakuymantam qasillalla takyarun.
9Diosnilláy, chaynaqa tarikun
juzganaykipaq hatarisqaykiraykum,
kay pachapi ñakariqkunata salvanaykipaq hatarisqaykiraykum.
10Runakunapa piñakuyninpas qamtam yupaychasunki,
pisilla piñakuyninkupas coronaykim kanqa.
11Señornikichik Tayta Diosman
prometekuspaqa cumpliychik;
muyuriqninpi kaqkuna
manchakuna Diosman ofrendaykichikta apamuychik.
12Payqa kamachikuqkunatam wañuchin,
kay pachapi reykunatam manchakuymanta katkatatachin.
Chuya Qellqa Revisión @ Sociedad Bíblica Peruana, 2012